Ang Espiritu Namulong pinaagi Kanako
Christy Rusch Banz, Utah, USA
Sa dihang nadawat nako ang akong call nga moserbisyo sa France Toulouse Mission, naghinam-hinam ko nga moserbisyo sa laing nasud ug makat-on og bag-ong pinulongan. Bisan pa kon wala makatuon og French kaniadto, ako masaligon nga makakat-on ko sa pagsulti sa pinulongan sa sayon nga paagi.
Ang akong presidente sa stake mipanalangin kanako og gasa sa mga pinulongan sa dihang iya kong gi-set apart isip misyonaryo. Kini nga panalangin nakadugang sa akong pagsalig nga makakat-on dayon ko og pinulongan nga French.
Sa dihang miabut ko sa missionary training center sa Provo, Utah, madasigon akong mosugod, apan ang akong panahon sa MTC nakapahimo kanako nga mapaubsanon. Nabug-atan ko ug nanlimbasug kada adlaw. Sa dihang mibiya ko sa MTC, ako mibati nga nakahimo ko og pipila ka kalamboan sa pinulongan nga French. Naghunahuna ko kon kanus-a moabut ang gasa sa mga pinulongan.
Ang akong unang assignment sa misyon mao ang gamay nga lungsod sa habagatang France. Usa ka hapon, pipila lang gayud ka adlaw human ko miabut, ang akong kompanyon ug ako nag-street contacting. Wala kaayo koy gisulti sa dihang nakig-istorya kami sa mga tawo—dili kaayo nako sila masabtan, ug dili kaayo sila makasabut nako.
Among giduol ang usa ka babaye, ug ang akong kompanyon misugod sa pagsulti kaniya mahitungod sa Simbahan. Ang babaye naminaw sulod sa pipila ka minuto ug dayon kalit nga milingi nako ug miingon, “Unsa may imong masulti?”
Sa madasigon ug naglisud nga paagi misulay ko sa paghinumdom og butang nga akong nakat-unan. Sa nagkurog nga tingog, mihatag ko og yano nga pagpamatuod mahitungod sa Langitnong Amahan ug sa Basahon ni Mormon. Sa pagbuhat nako niini, ang Espiritu mihatag og pagsaksi ngari kanako nga ang akong nasulti tinuod. Wala ko masayud kon ang babaye adunay nasabtan, apan mipahiyum siya, milingi sa akong kompanyon, ug mihangyo kaniya sa pagpadayon sa iyang mensahe.
Kini nga kasinatian nagtudlo kanako og importante nga leksyon. Akong nakat-unan nga bisan dili ako maayong makasulti og pinulongan nga French, ang Espiritu makapamulong pinaagi kanako. Akong nakat-unan nga tingali ang panalangin nga akong nadawat gikan sa akong presidente sa stake sa tinuod lang usa ka panalangin nga makasulti sa pinulongan sa Espiritu.
Si Presidente Thomas S. Monson mitudlo: “Adunay usa ka pinulongan … nga komon sa matag misyonaryo—ang pinulongan sa Espiritu. Dili kini makat-unan gikan sa mga libro nga gisulat sa mga iskolar, ni makuha kini pinaagi sa pagbasa ug pagsag-ulo. Ang pinulongan sa Espiritu moabut ngadto kaniya kinsa nagtinguha sa tibuok niyang kasingkasing nga makaila sa Dios ug mosunod sa Iyang balaang mga sugo. Ang kabatid niini nga pinulongan makatugot sa usa ka tawo sa pagbungkag sa mga ali, pagbuntog sa mga babag, ug pagtandog sa tawhanong kasingkasing” (“The Spirit Giveth Life,” Liahona, Hunyo 1997, 4).
Paglabay sa mga tuig, kini nga kasinatian padayon gihapon nga nakaimpluwensya kanako. Dili na kinahanglan nga mosangyaw ko sa ebanghelyo sa pinulongan nga French, apan nagkinahanglan ko sa tabang sa Espiritu sa higayon nga hangyoon ko nga motudlo og leksyon o mohatag og pakigpulong diha sa simbahan. Kon mobati ko nga nanlimbasug sa pagpahayag sa akong kaugalingon, mobati ko og kahupayan sa paghinumdom nga ang Espiritu makahimo sa pagpamulong ngadto sa mga kasingkasing sa tanang mga anak sa Dios.