Naglig-on sa mga Pamilya pinaagi sa Pagdugang sa Pagka-espirituhanon

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana aron sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Si Julie B. Beck, kinatibuk-ang presidente sa Relief Society, miingon: “Adunay mitubo kanako nga usa ka dili mapugngan nga pagpamatuod mahitungod sa bili sa mga anak nga babaye sa Dios. … Akong gibati nga wala gayuy mas dako nga panginahanglan alang sa gipalambo nga pagtuo ug personal nga pagkamatarung. Wala pa gayuy mas dako nga panginahanglan alang sa lig-on nga mga pamilya ug mga panimalay.”

Ang mga sister makatabang sa paghimo og lig-on nga mga panimalay ug mga pamilya samtang sila naglihok diha sa personal nga pagpadayag. “Ang abilidad nga mahimong sarang, makadawat, ug makalihok sa personal nga pinadayag mao lamang ang labing importante nga kahanas nga mahimong maangkon niining kinabuhia,” mipadayon si Sister Beck. “Ang pagkahimong sarang alang sa Espiritu sa Ginoo nagsugod sa usa ka tinguha alang niana nga Espiritu ug nagpakita og ang-ang sa katakus. Ang pagsunod sa mga sugo, paghinulsol, ug pagbag-o sa mga pakigsaad nga gihimo atol sa bunyag nagdala ngadto sa panalangin sa pagbaton kanunay sa Espiritu sa Ginoo uban kanato. Ang paghimo ug pagtuman sa mga pakigsaad sa templo nagdugang usab og espirituhanon nga kalig-on ug gahum ngadto sa kinabuhi sa usa ka babaye. Daghang mga tubag sa lisud nga mga pangutana ang makit-an pinaagi sa pagbasa sa mga kasulatan tungod kay ang mga kasulatan mao ang katabang sa pinadayag. … Ang matag adlaw nga pag-ampo mahinungdanon aron sa pagbaton sa Espiritu sa Ginoo uban kanato.”¹

Naglig-on usab kita sa atong mga sakop sa pamilya sa espirituhanong paagi samtang nagtabang kita kanila sa pagsabut sa mahangturong plano sa Langitnong Amahan. “Unsa ang atong mabuhat aron mas maandam ang atong mga bata sa espirituhanon nga paagi alang sa ilang mahangturon nga mga tahas?” nangutana si Elder M. Russell Ballard sa Korum sa Napulog Duha ka mga Apostoles. “Tingali ang labing hingpit nga tubag mao: Tudloi sila sa pagsunod sa mga baruganan sa ebanghelyo.” Kini nga pagtulun-an moabut pinaagi sa kada adlaw nga pag-ampo, pagtuon sa mga kasulatan, ug mga panahon sa tingkaon sa pamilya ingon man sa senimana nga family home evening ug pagsimba. Si Elder Ballard nagpasabut: “Nag-andam kita kada adlaw, karon dayon, alang sa kinabuhing dayon. Kon kita wala mag-andam alang sa kinabuhing dayon, kita nag-andam alang sa usa ka butang nga minos, tingali sa usa ka butang nga mas minos kaayo.”²

Gikan sa mga Kasulatan

Mga Proverbio 22:6; 1 Juan 3:22; Doktrina ug mga Pakigsaad 11:13–14; 19:38; 68:25

Gikan sa Atong Kasaysayan

Gitudloan ni Propeta Joseph Smith ang mga sister diha sa Abril 1842 nga miting sa Relief Society nga sila adunay ligdong nga obligasyon sa pagpaninguha sa ilang kaugalingon nga kaluwasan. Miingon siya, “Human sa [akong] panudlo, kamo responsable sa inyong kaugalingong mga sala; kini usa ka tilinguhaon nga dungog nga kamo kinahanglan nga maglakaw sa ingon atubangan sa atong langitnong Amahan aron sa pagluwas sa inyong mga kaugalingon; kitang tanan responsable sa Dios sa matang sa atong paglambo sa kahayag ug kaalam nga gihatag sa Ginoo aron makahimo kita sa pagluwas sa atong mga kaugalingon.”³ Gitudlo niya kanila ang pagmatarung nga mga indibidwal, nga mahimong usa ka balaan nga mga katawhan, ug sa pagpangandam alang sa mga ordinansa ug mga pakigsaad sa templo.

Paghulagway sa litrato pinaagi ni Welden C. Andersen