Hangtud Kita Magkita Pag-usab
Mga Panalangin sa Templo Karon ug sa Kahangturan
Ang akong pagsabut kalabut sa mga panalangin sa templo milambo samtang ang akong panginahanglan niini nagkadugang.
Nakahinumdom ko nga nagtan-aw sa mga litrato sa templo niadtong bata pa ko kaayo. Bisan og bata pa kaayo nga masabtan ang mga panalangin sa templo, nasayud ko nga gusto kong moadto didto sa umaabut nga adlaw. Sa Young Women, nasabtan nako og sugod ang mga panalangin nga moabut gikan sa templo. Nianang higayuna ang akong pamilya dili kaayo aktibo, ug nag-ampo ko kada adlaw nga unta mabugkos kami isip usa ka mahangturong pamilya.
Sa tinglarag sa 1993, duha ka semana sa wala pa ko mo-edad og 18, ang akong pamilya miadto sa templo. Nakahinumdom ko sa akong gibati didto sa Templo sa Provo Utah, nga mahimong usa ka mahangturong pamilya uban sa akong mga ginikanan ug mga igsoon. Sa akong pagbiya sa templo nianang adlawa, nagtuo ko nga nasabtan na nako ang mga panalangin nga gihatag niini kanako.
Duha ka tuig ang milabay, sa ting-init sa 1995, minyuonon ako, busa miadto ko sa templo aron madawat ang akong kaugalingong endowment. Pagkaanindot nga makadawat og laing panalangin sa templo! Tulo ka adlaw human madawat ang akong endowment, nabugkos ko ngadto sa akong bana alang sa karon ug sa tibuok kahangturan didto sa Templo sa Manti Utah. Akong naamguhan ang laing panalangin nga wala pa nako nasinati kaniadto—ang akong bana ug ako mahimong usa ka mahangturong pamilya. Nagtuo usab ako nga nasinati na nako ang tanang mga panalangin sa templo.
Unom ka tuig sa kaminyoon, among namatngunan nga mapun-an na ang among pamilya. Naghinam-hinam kaayo kami sa pagpadako sa among anak nga lalaki ug sa pagtudlo kaniya sa ebanghelyo. Apan 24 ka semana sa pagmabdos, ang among gamayng anak nga lalaki nanlimbasug nga mabuhi. Human sa walo lamang ka semana mibalik siya ngadto sa Langitnong Amahan. Samtang gikugos ko siya sa katapusang higayon, akong naamguhan ang laing maanindot nga panalangin sa templo: ang among anak nga lalaki natawo diha sa pakigsaad ug mahimo namong maangkon hangtud sa kahangturan.
Diseotso ka bulan human sa kamatayon sa among anak nga lalaki, nakadawat kami og tawag sa telepono gikan sa LDS Family Services nga nag-ingon nga ang usa ka batan-ong babaye mipili kanamo nga maoy mosagup sa iyang anak. Nasayud nga dili na kami makaanak, dili matukib ang among kalipay.
Sa dihang ang among batang babaye nag-edad og unom ka bulan, among gihikay ang pagsagup kaniya ug gidala siya sa templo aron mabugkos ngari kanamo. Upat ka tuig human nga ang among batang babaye nahimong kabahin sa among pamilya, laing batan-ong babaye na usab ang mipili kanamo nga mahimong ginikanan sa usa ka maanindot nga batang lalaki. Napanalanginan na usab kami sa pagdala sa unom ka bulan nga bata ngadto sa templo. Dili gayud nako makalimtan ang akong gibati sa dihang nagtan-aw ko sa akong gagmayng mga anak, nagsul-ob og puro puti, sulod sa templo uban sa akong bana ug kanako aron mabugkos ngari kanamo alang sa kahangturan.
Karon akong naamguhan nga wala nako masabti ang tanan nga mga panalangin nga mahatag sa templo sa diha pa ko sa Young Women o sa dihang nabugkos ako ngadto sa akong bana o bisan sa dihang namatay ang among anak nga lalaki. Ug bisan tuod ako nakaamgo og mas daghan pa nga mga panalangin kay sa akong naangkon sa miaging katuigan, karon nakasabut na ko nga ang templo usa ka dapit sa mahangturon nga mga panalangin, mga panalangin nga moabut kanato niini nga kinabuhi ug sa kahangturan. Ang pipila mahimong dali natong maamguhan karon, ug ang uban motudlo kanato, molig-on sa atong mga pagpamatuod, ug motabang kanato sa umaabut nga adlaw nga makaabut sa atong mahangturong panimalay.
Ang templo usa ka dapit sa kalinaw ug kahupayan, kalipay ug kabag-o. Mas mapasalamaton ako sukad alang sa templo ug nag-ampo nga sa akong pagbalik didto, makapadayon ako sa pagkat-on ug pagdayeg sa mga panalangin sa templo.