Walay Paglubad nga mga Istorya sa Ebanghelyo
Ang Mahangturong Kinaiyahan sa Kaminyoon
Si Nathan Eldon Tanner natawo niadtong Mayo 9, 1898, sa Siyudad sa Salt Lake, Utah. Na-ordinahan siya nga Apostol niadtong 1962 ug, tunga-tunga sa 1963 ug 1982, miserbisyo isip magtatambag sa Unang Kapangulohan ubos sa upat ka mga Presidente sa Simbahan. Ang mosunod kinutlo gikan sa iyang pakigpulong nga “Celestial nga mga Kaminyoon ug Mahangturong mga Pamilya [Celestial Marriages and Eternal Families],” nga gipamulong niadtong Abril 1980 nga kinatibuk-ang komperensya. Alang sa tibuok nga pakigpulong sa Iningles, adto sa conference.lds.org.
Usa sa labing malipayong mga panahon sa kinabuhi sa tawo mao ang higayon nga maghunahuna na og kaminyoon. … Maayo ra kining hunahunaon nga sa panahon sa kaminyoon kadaghanan sa mga magtiayon sigurado nga nakahimo sila og sakto nga mga pagpili; apan kasagaran gayud ang honeymoon mahuman, ug ang kagubot magsugod, ug ang kaminyoon matapos sa diborsyo.
Ang pagsaka sa gidaghanon sa diborsyo nakadala sa uban ngadto sa istilo sa kinabuhi nga gusto nila aron makalingkawas sa daw walay kahulugan nga mga ritwal, nga walay kasal o uban pang legal nga mga pagtugot. Maghunahuna ko kanunay kon nakahibalo ba gayud sila mahitungod sa katuyoan sa Paglalang sa yuta nga ilang gipuy-an ug nasiksik ba nila og maayo ang mga kasulatan aron masayud kon nganong gilalang sa Dios ang lalaki ug babaye ug gipasiugdahan ang sagrado nga ordinansa sa kaminyoon.
Atong hunahunaon og una ang katuyoan sa Paglalang sa yuta. Ang mga kasulatan miklaro niini nga kini alang sa walay laing katuyoan kondili sa paghatag og usa ka dapit alang sa anak nga mga lalaki ug anak nga mga babaye sa Dios sa pagpuyo sa pagkamortal ug pamatud-an ang ilang kaugalingon nga takus, pinaagi sa pagsunod sa mga sugo, aron makabalik sa presensya sa Dios diin sila nagagikan.
Human sa Paglalang sa yuta, “Miingon ang Dios, Buhaton nato ang tawo sumala sa atong dagway, ingon sa kasama nato. …
“Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila.
“Ug gipanalanginan sila sa Dios, ug miingon ang Dios kanila, Sumanay, ug dumaghan kamo, ug pun-on ninyo ang yuta, ug magagahum kamo niini” (Genesis 1:26–28).
Sa dihang gilalang sa Dios ang babaye ug gidala siya ngadto sa lalaki, miingon Siya, “Tungod niini ang lalaki magabiya sa iyang amahan ug sa iyang inahan, ug moipon siya sa iyang asawa: ug sila mahimong usa ka unod” (Genesis 2:24).
Oo, ang kaminyoon gi-orden sa Dios, ug human nianang unang pagpasabut sa bana ug asawa, atong makita ang pagbalik-balik sa mga kasulatan isip ebidensya nga ang mga lalaki ug mga babaye nahimong mga bana ug mga asawa diha sa mga seremonya sa kaminyoon human sa mga kasaulogan sa kasal. Wala kita moanhi aron lamang sa “kaon, inom, ug paglipay” (2 Nephi 28:7). Gihatagan kita og yuta nga dumalaon ug mga panudlo sa pagdaghan ug pagpuno niini. Makapaikag kini nga timan-an nga ang Dios miingon nga “dumaghan” ug dili lamang “pun-on” ang yuta (tan-awa sa Genesis 1:28).
Importante nga atong masabtan, sama sa atong nakat-unan gikan sa mga kasulatan, nga ang Dios mahangturon, nga ang Iyang mga nilalang mahangturon, ug nga Iyang mga kamatuoran mahangturon. Busa, sa dihang Iyang gihatag si Eva ngadto ni Adan diha sa kaminyoon, kana nga panag-usa mahangturon. Ang kaminyoon ingon nga gi-orden sa Dios ug gipahigayon diha sa Iyang balaan nga mga templo mahangturon—dili lamang hangtud sa kamatayon. Diha sa Ecclesiastes atong mabasa, “Ako nasayud nga, bisan unsa ang buhaton sa Dios, kini alang man sa walay katapusan” (Ecclesiastes 3:14).
Sa dihang si Kristo nangutana ni Pedro sa pagsulti Kaniya kon si kinsa Siya, si Pedro mitubag, “Ikaw mao ang Kristo, ang Anak sa Dios nga buhi.” Si Jesus mihatag ni Pedro og kasigurohan nga siya nasayud niini pinaagi sa pagpadayag gikan sa Dios nga Amahan ug nga pinaagi niining bato sa pagpadayag nga Siya motukod sa Iyang Simbahan. Dayon Siya miingon, “Hatagan ko ikaw sa mga yawe sa gingharian sa langit: ug bisan unsay imong pagabugkuson dinhi sa yuta didto sa langit pagailhon kini nga binugkos; ug bisan unsay imong pagaluagan dinhi sa yuta didto sa langit pagailhon kini nga linuagan” (tan-awa sa Mateo 16:15–19).
Sa dihang ang mga Pariseo miduol kang Jesus, nagtintal Kaniya, sa pagpangutana mahitungod sa pakigbulag, ang Iyang tubag naglakip sa mosunod:
“Wala ba ninyo hibasahi, nga ang nagbuhat kanila sukad sa sinugdan nagbuhat kanila nga lalaki ug babaye,
“Ug nag-ingon, Tungod niining maong hinungdan kinahanglan pagabiyaan sa lalaki ang iyang amahan ug ang iyang inahan, ug makig-ipon siya sa iyang asawa: ug silang duha mahimong usa?
“Tungod niana dili na sila duruha, kondili usa. Busa ang sa Dios gihiusa, sa tawo dili pagabulagon sila” (Mateo 19:4–6).
Kini nga mga kasulatan nagpasabut nga ang celestial nga kaminyoon, gi-orden sa Dios ug gipahigayon pinaagi sa Iyang awtoridad diha sa Iyang balaan nga mga templo, mahangturon, ug ang mga magtiayon nga gihiusa nabugkos alang sa karon ug sa tibuok kahangturan, ug ang ilang mga anak matawo diha sa pakigsaad sa mahangturong ebanghelyo. Sila mahimong usa ka mahangturong pamilya sumala sa ilang pagkamatinud-anon. …
Si Jesukristo mianhi sa yuta aron ihatag kanato ang mao gayud nga mensahe—kon kinsa kita ug unsa ang angay natong buhaton. Siya mihatag kanato sa ebanghelyo sa plano sa kinabuhi ug kaluwasan ug miingon nga walay bisan unsa pang lain nga ngalan sa silong sa langit nga pinaagi niini maluwas kita (tan-awa sa Mga Buhat 4:12). Kita aduna nianang sama nga ebanghelyo nga gipahiuli niining ulahing mga adlaw, uban sa buhing propeta karon … nga mamulong alang sa Dios, ingon nga mao ang pamaagi sa Dios sa pagpakigsulti sa tawo sa tanang kapanahonan. …
Nasayud ko nga pinaagi sa ebanghelyo ni Jesukristo ug pinaagi sa pagsunod sa mga sugo sa Dios ug sa mga pakigsaad nga atong gihimo uban Kaniya, matag usa kanato makahimo sa atong panimalay nga usa ka langit dinhi sa yuta samtang nangandam kita sa atong kaugalingon ug sa atong mga anak sa pagbalik ngadto sa atong Langitnong Amahan.
Litrato sa maayong kabubut-on sa Church History Library
Sila si N. Eldon ug Sara Tanner uban sa ilang anak nga mga babaye, mga 1927. Ang ilang ikalima ug kinamanghuran nga anak, si Helen, natawo pagka-1931.