Ang Iyang Saad Natuman
Ted Bainbridge, Colorado, USA
Atol sa usa ka hiniusa nga miting sa priesthood ug sa Relief Society niadtong 2009, ang among lider sa mga high priest mipasabut sa tinguha sa among kapangulohan sa stake nga ang matag hamtong modala og pangalan ngadto sa templo sulod sa usa ka tuig. Mipaila siya og mga programa sa stake ug sa ward aron tabangan ang mga miyembro nga makab-ot kana nga tumong. Sa iyang pagtapos, mihatag siya og saad gikan sa usa ka tawo nga adunay katungod pinaagi sa iyang responsibilidad alang sa programa sa family history nga kon sulayan namo nga makab-ot ang tumong sa stake, kami molampus.
Human sa miting ang akong asawa ug ako naghisgut sa saad ug miuyon nga dili kini magamit ngari nako; migahin na kami og 40 ka tuig sa pagsusi sa matag kaliwat sa akong family tree. Ang akong mga katigulangan lisud nga pangitaon, ug wala kami makahimo og dako nga pag-uswag sulod sa pipila ka mga tuig. Nagtuo kami nga wala nay mahimo pa. Bisan pa niana, ang saad sa lider sa grupo mibalik-balik og santup sa akong hunahuna sa misunod nga pipila ka adlaw. Nakahukom ko nga sulayan ang iyang saad. Nagtutok sa akong pedigree chart, misulay ako sa paghunahuna kon unsa ang akong mahimo.
Human sa tulo ka adlaw sa paghunahuna og maayo, mibati ko nga nadasig sa pagpangita sa usa ka piho nga dapit alang sa impormasyon mahitungod sa usa sa katapusang mga tawo diha sa linya sa akong chart. Wala maabti og tunga sa adlaw sa pagsiksik diha sa Internet, akong nadiskobrehan nga laing tawo ang nagsiksik niana nga apelyido sa usa ka parokya sa England. Usa sa kinabag-ohang mga pangalan nga iyang nakit-an mao ang katapusang tawo diha sa akong linya. Gamit ang iyang impormasyon, nakahimo ko sa pag-abut sa laing lima ka mga henerasyon sa akong linya—balik ngadto sa 1650—ug naglakip sa mga apelyido sa pagkadalaga sa pipila ka mga babaye sa akong linya ug sa mga pangalan sa pipila ka igsoong mga lalaki ug igsoong mga babaye. Ang akong asawa ug ako natingala ug nagmaya.
Sa kaulahian human niana misugod ko sa pagpangita og impormasyon diha sa Internet mahitungod sa usa ka apohan sa tuhod nga daw nahanaw. Human sa mubo nga pagsiksik, ako siyang nakit-an. Akong nadiskobrehan nga mibalhin siya gikan sa Pennsylvania, USA, ngadto sa Wisconsin, USA, human gayud sa pagkamatay sa iyang unang asawa. Gamit ang impormasyon nga natigum gikan sa mga rekord sa Wisconsin, midugang ko og sobra sa 400 ka mga pangalan sa akong family history.
Sa wala madugay akong nadiskobrehan ang 100 ka mga katigulangan nga miapil sa Rebolusyonaryo ug Sibil nga mga Gubat sa Amerika. Nakasubay ko og unom ka mga linya ngadto sa mga 1600.
Atol sa akong miaging 40 ka tuig sa pagsiksik, nakarekord ko og mga 65 ka mga pangalan sa akong pedigree chart ug hapit sa 3,000 ka mga pangalan sa akong database. Sa 20 ka bulan human ang akong lider sa mga high priest mihimo sa iyang saad, midugang ko og sobra sa 70 ka mga pangalan sa chart ug sobra sa 17,000 ka mga pangalan sa database, lakip ang duha ka mga presidente sa Estados Unidos!
Ang Ginoo nagsulti kanato nga ang Iyang pulong “tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38). Sa pagkatinuod, ang saad sa Langitnong Amahan, nga gihatag pinaagi sa dinasig, awtorisado nga lider sa priesthood, natuman.