Paghatag sa Dios og Kahigayunan sa Pagpanalangin Kanato

Ni Michael R. Morris

Mga Magasin sa Simbahan

Sa unsang paagi nga ang usa ka district sa Argentina nga may pipila lamang ka gagmay nga mga branch nakabaton og 17 ka mga kaminyoon didto sa templo sulod sa wala pay upat ka tuig? Ang mga lider moingon nga ang tubag yano ra: pagkamasulundon.

Sa dihang ang 21 anyos nga si Gisela Silva mibalhin uban sa iyang pamilya gikan sa Mendoza, Argentina, ngadto sa labing habagatang siyudad sa nasud ang Ushuaia, naghunahuna siya basin kon mawala na kaniya ang mga kahigayunan nga maminyo sa templo. Ang Mendoza, sa laing bahin, adunay stake nga napuno sa mga ward sa mga Santos sa Ulahing mga Adlaw, samtang ang nalahi nga Ushuaia—nahimutang sa isla sa Tierra del Fuego—adunay mga 600 ka mga miyembro lamang ang nagtambong sa tulo ka gagmay nga mga branch.

“Ang akong mga ginikanan naminyo didto sa templo, ug gusto ko niini nga panalangin alang sa akong kaugalingon—nga maminyo sa usa ka matinud-anon nga miyembro sa Simbahan, sa usa ka tawo kang kinsa ako makamugna og usa ka mahangturong pamilya,” nahinumdom siya. “Apan sa dihang miabut ko sa Ushuaia, adunay diyutay ra kaayo nga mga young adult dinhi nga naghunahuna ko kon mahitabo pa ba kaha kana.”

Si Lucas Romano adunay sama nga mga kabalaka pareho ni Gisela. Atol sa iyang misyon ngadto sa Uruguay, ang iyang pamilya mibalhin ngadto sa Ushuaia. Sa dihang miadto siya kanila human sa iyang misyon, namatikdan dayon niya nga ang young single adult nga mga lalaki mas daghan kay sa young single adult nga mga babaye. Bisan pa niana, determinado siya nga mosunod sa tambag sa lokal nga mga lider nga makig-date lamang sa mga miyembro sa Simbahan.

Kana nga tambag nahimong mas sayon nga sundon human nahimamat ni Lucas si Gisela sa simbahan ug nagpa-enrol siya sa Iningles nga mga klase sa eskwelahan diin si Lucas nagtudlo. Misugod siya sa paghatud kaniya sa balay human sa klase, ug wala madugay misugod sila sa pag-date. Samtang nag-ampo sila sa tagsa-tagsa mahitungod sa ilang naglambo nga relasyon, miingon sila nga ang pagkumpirmar miabut “pagtulun-an human sa usa ka pagtulun-an, lagda human sa usa ka lagda” (2 Nephi 28:30; D&P 98:12).

Niadtong Abril 2005, sila si Lucas ug Gisela nagminyo sa sibil, sumala sa gitakda sa balaod sa Argentina, ug dayon nabugkos didto sa Templo sa Buenos Aires Argentina. Ang ilang pagbugkos mahinungdanon alang sa bag-o nga mga miyembro sa Simbahan didto sa Ushuaia: kadto ang una sa 17 ka mga kaminyoon sa templo sulod sa wala pay upat ka tuig.

Usa ka Istorya sa Dakong Kalampusan

Sa unsang paagi nga ang usa ka district nga may pipila lamang ka gagmay nga mga branch nakabaton og daghan kaayong mga kaminyoon didto sa templo sa ingon ka mubo nga panahon? Ang tubag, sumala sa lokal nga mga lider, yano ra: pagkamasulundon.

“Usa kini ka istorya sa dakong kalampusan,” miingon si Marcelino Tossen, kanhi presidente sa Ushuaia district. “Kining mga batan-on nagpakita og talagsaong ehemplo alang sa mga miyembro sa Simbahan. Usa sa mga kinaiya nga sila aduna mao nga sila nagsunod sa Ginoo, sa mga propeta, ug sa ilang lokal nga mga lider, ug sila nagsunod sa mga pagdasig sa Espiritu. Kini nga kinaiya naghiusa sa mga batan-on dinhi sa Ushuaia district.”

Si Presidente Tossen miangkon, hinoon, nga ang lokal nga mga lider “kinahanglan nga magtrabaho og dugay-dugay niining tibuok district nga paningkamot” sa wala pa mamunga ang ilang pagtudlo ug pagtambag mahitungod sa kaimportante sa kaminyoon didto sa templo.

Si Roberto Ignacio Silva, ang presidente sa district sa Ushuaia, misulti unsa ang nakakuha sa iyang pagtagad human sa iyang pagbalhin uban sa iyang pamilya ngadto sa Ushuaia niadtong 2004 mao ang gidaghanon sa wala pa maminyo nga mga returned missionary ug young adult nga mga babaye. Ang iyang anak nga babaye nga si Gisela nahimong kabahin niana nga grupo. Miingon siya nga ang mga young adult adunay tumong nga maminyo didto sa templo apan nagkinahanglan og pipila ka pag-awhag ug paggiya.

“Giingnan nako sila nga kon kita nagtinguha og mahangturong kapikas, dili kita kinahanglang mangita og usa ka tawo nga perpekto” miingon si Presidente Silva. “Apan kinahanglan kitang mag-ampo ug mangamuyo sa Ginoo sa pagtabang kanato, ug kinahanglan kitang magpabilin nga matinud-anon diha sa Simbahan.”

Agig dugang sa nagkadaghan nga mga kalihokan alang sa mga young single adult—lakip na ang mga fireside ug hiniusa nga mga kalihokan uban sa mga young single adult gikan sa Rio Gallegos ug sa uban nga mga siyudad ngadto sa amihanang bahin—ang mga lider mihatag og gibug-aton sa kaimportante sa pag-ampo, pagkamatinud-anon, ug katakus. Sila usab miawhag sa mga young adult sa Ushuaia sa pagbaton og igong hugot nga pagtuo aron mabuntog ang ilang mga kahadlok.

Wala na Gayud Kami Mahimo

“Ang dakong gikabalak-an sa mga batan-on dinhi mao kon unsaon nila pagminyo kon sila wala kaayoy mahimo,” si Presidente Silva miingon. “Gitabangan namo sila nga makasabut nga dili kinahanglan nga kita aduna sa tanang butang sa dili pa kita magminyo.”

Si Ruth Rodríguez nagkaila ug si Emanuel Silva sa dihang ang duha gihangyo sa pagtabang og organisar sa usa ka hiniusang kalihokan sa mga young single adult sa district didto sa Rio Gallegos, sobra sa 200 ka milya (320 km) ngadto sa amihanang bahin, niadtong Pebrero 2006. Ang higala kinsa mihangyo sa duha sa pagtinabangay naglaum nga magkasinabut ra sila. “Nisalir kini,” nahinumdom si Emanuel, kinsa nauli na sulod sa duha ka tuig gikan sa pagserbisyo sa Arizona Tucson Mission.

Sa dihang siya ug si Ruth naminyo unom ka bulan human niana, ang ilang pagpangandam—espirituhanon ug temporal—nakatabang kanila nga mabuntog ang ilang kahadlok sa umaabut.

“Gibati nako ang gugma sa akong Amahan sa Langit ug nga Siya gusto nga ako maghimo og akong pamilya,” si Emanuel miingon kalabut sa mga tubag sa iyang mga pag-ampo. “Sa dihang nahimo ko kana nga tumong, Siya mipakita kanako og paagi ug mitabang kanako sa pagpangita og pangasaw-unon.”

Si Ruth midugang nga ang mga tumong nga ilang gihimo isip magtiayon, lakip na ang pagtrabaho og maayo aron makatigum og kwarta alang sa ilang biyahe ngadto sa templo, nakatabang kanila sa pagpadayon. “Usahay adunay mga butang nga gusto namong paliton,” miingon siya, “apan miingon kami, ‘Dili, kinahanglan kita nga magtigum aron makaadto kita sa templo.’”

Ang gasto sa ilang pag-adto ug pagbalik gikan sa Templo sa Buenos Aires Argentina niadtong 2006 nakahurot sa ilang mga tinigum. “Human niana wala na gayud kami mahimo,” nag-ingon si Emanuel, nga maoy sagad nga isulti sa mga bag-ong minyo. Karon siya ug si Ruth nangatawa sa paghinumdom niana, mapasalamaton nga ang ilang hugot nga pagtuo nakahatag kanila og “maanindot nga kasinatian” nga mabugkos didto sa templo—usa ka kasinatian nga sa gihapon makahuluganon kaayo alang kanila.

“Mahimong makabaton kita og daghang mga pagbati sa kahadlok samtang maghunahuna kita og kaminyoon,” miingon si Ruth. “Unsaon na lang ang mga butang nga kulang kanato? Unsaon na lang ang atong ekonomikanhong kahimtang? Unsaon na lang ang pagpadako sa mga anak? Apan kon kita masulundon sa pulong sa Ginoo, moadto sa templo, ug magsugod og atong mga pamilya, dili kita angayang mabalaka. Ang Ginoo mopanalangin kanato diha sa mga pamaagi nga dili gayud nato mahunahunaan.”

Kamo Dili Makaplano sa Tanang Butang

Sa dihang si Ezequiel Agustín Frau nawad-an sa iyang trabaho pagka-2006, nauli na siya gikan sa iyang misyon sa Colombia hapit duha na ka tuig. Ulitawo pa gihapon siya apan mibati nga ang iyang pangasaw-unon wala diha sa Ushuaia. Nakahukom siya nga moadto sa templo aron mangayo og giya.

“Gusto ko nga mas maduol sa Espiritu Santo, masayud sa kabubut-on sa Ginoo alang kanako, ug mangayo og inspirasyon,” miingon siya. “Ang templo nakatabang kanako nga makakaplag niini.”

Sa dihang miabut siya sa Buenos Aires human sa tulo ka adlaw, 2,000 ka milya (3,200 km) nga nagsakay og bus, miistar siya uban sa mga higala ug dayon sa usa ka paryente samtang kanunayng moadto sa templo. Pipila ka mga semana ang milabay si Ezequiel nahutdan na og kwarta ug naghunahuna nga mopauli na lang sa Ushuaia. Hinoon ang bishop didto nakakita og trabaho para niya, busa, nakahukom siya nga magpabilin.

Sa usa ka kalihokan sa Simbahan wala madugay human niana, si Ezequiel nakahimamat og usa ka batan-ong babaye nga ginganlan og Marina Mas. Sayon ra nila nga mag-istoryahanay, ug dali ra siya nga mibati og kakomportable uban kang Marina. Sa dihang nakit-an niya og usab si Marina sa usa ka panagtigum sa young single adult, si Marina misulti og butang nga nakapadayeg kaniya.

“Kinahanglan nga magpuyo kita sa lebel sa matang sa tawo nga atong gipangita aron minyoan,” si Ezequiel nahinumdom sa gisulti ni Marina atol sa usa ka panaghisgut mahitungod sa mga tumong.

Sa iyang bahin, si Marina nag-ampo nga makakita og usa ka takus nga kapikas. Daghan siyang nakaila nga batan-ong mga lalaki apan siya nakadayeg diha-diha dayon sa espiritwalidad ni Ezequiel.

Usa ka suod nga higala ang mitabang ni Ezequiel nga makakita og kapuy-an nga mas duol sa iyang trabahoan, unya tulo ka oras sakyon gikan sa iyang gipuy-an. Ang resulta mao nga ang iyang bag-ong apartment—diha sa usa ka siyudad nga may 13 ka milyon ka mga tawo—duha lang ka eskina gikan sa balay ni Marina.

“Wala nako planoha nga mopuyo diha sa duha ka eskina gikan sa iyang balay,” nahinumdom siya. “Wala gani ko mahibalo kon asa siya nagpuyo.”

Ang pagpuyo sa duol nakahatag ni Ezequiel og daghang oportunidad nga makita si Marina, kansang pamilya mainitong miabi-abi kaniya. Ang panagtagbo sa mga panghitabo mao ang tubag sa iyang mga pag-ampo.

Ang duha nag-date ug wala madugay manag-ubang misugod sa pagplano sa ilang umaabut. Human maminyo didto sa templo sa tinglarag sa 2006, mibalhin siya ngadto sa Ushuaia.

“Dili kita kanunayng makasabut sa plano sa atong Amahan sa Langit, ug dili kita makaplano sa tanang butang,” miingon si Ezequiel agig pasabut. “Apan kita mahimong magmasulundon ug mohatag Kaniya og kahigayunan sa pagpanalangin kanato.”

Maanindot Kaayo nga Adunay Pamilya

Si Presidente Tossen nagsulti nga ang usa sa labing mahinungdanong mga panalangin nga nahatag sa kaminyoon didto sa templo ngadto sa Ushuaia mao nga “nagsingabut ang adlaw nga ang Simbahan pagadumalaon sa mga anak sa pakigsaad. Ang ebanghelyo mokatap dinhi isip resulta, ug ang Ginoo mopanalangin sa Simbahan”—ingon nga Siya mipanalangin sa matinud-anong mga magtiayon nga naminyo didto sa templo.

“Sa bata pa ko ug ang among mga lider namulong ngari kanamo kabahin sa kaminyoon, ang tanang mga istorya malipayon,” miingon si Ruth Silva. Iyang naamguhan nga ang “nagmalipayon hangtud sa hangtud” nagkinahanglan diay nga trabahoon, “apan akong gibati nga kadto nga mga istorya tinuod. Ang kinadak-ang panalangin sa pagminyo didto sa templo mao ang kalipay nga akong gibati nga masayud nga kami nahiusa isip usa ka mahangturong pamilya.”

Ang iyang ehemplo nakatabang sa iyang amahan nga nabunyagan pagka-2008 ug dayon midala sa iyang pamilya ngadto sa templo, diin nabugkos sila human sa usa ka tuig.

“Ang panalangin nga akong natagamtaman og maayo, agig dugang sa pagpadako sa akong mga anak diha sa ebanghelyo, mao ang kalipay ug kalinaw sa akong kasingkasing nga nasayud nga ako nakatuman sa paghimo sa makaluwas nga ordinansa sa mahangturong kaminyoon,” dugang ni Lucas Romano. “Ang pakig-uban sa akong asawa ug mga anak nakapabag-o nianang pagbati sa kalipay. Sama sa nagligid-ligid nga snowball, padayon kini nga nagtubo. Kada adlaw mas mapasalamaton ko sa Ginoo nga nagminyo ko ug nagsugod og usa ka pamilya.”

Si Marina Frau midugang, “Maanindot kaayo nga adunay pamilya. Lisud usahay tungod kay aduna pay daghang angayang kat-unan, apan maanindot kaayo.”

Buenos Aires

Ushuaia

“Ang kinadak-ang panalangin sa pagminyo didto sa templo mao ang kalipay nga akong gibati nga masayud nga kami nahiusa isip usa ka mahangturong pamilya,” miingon si Ruth Silva, nga gilitratohan sa tuo sa tunga uban sa iyang bana, si Emanuel, ug ilang anak nga babaye, si Banira. Sa itaas: Sila si Ezequiel ug Marina Frau, uban sa ilang anak nga babaye, si Ailín. Sa ubos: Sila si Lucas ug Gisela Romano, uban sa ilang mga anak, sila si Benjamín ug Rebeca.

“Kon kita nagtinguha og mahangturong kapikas, dili kita kinahanglang mangita og usa ka tawo nga perpekto. Apan kinahanglan kitang mag-ampo ug mangamuyo sa Ginoo sa pagtabang kanato, ug kita kinahanglang magpabilin nga matinud-anon diha sa Simbahan,” si Roberto Ignacio Silva, ang presidente sa district sa Ushuaia, misulti ngadto sa mga young adult, kadaghanan kanila (gilitratohan sa ibabaw) mituman niana nga tambag ug naminyo didto sa Templo sa Buenos Aires Argentina.

Sa itaas: gilitratohan ni Gabriel J. Paredes; litrato ni Presidente Hinckley pinaagi ni Drake Busath