Gitawag sa Pagserbisyo: Kamo
Ang Unang Kapangulohan sa Ang Simbahan ni Jesukristo sa mga Santos sa Ulahing mga Adlaw mihangyo sa tanan nga mga yunit sa Simbahan sa pagsaulog sa ika-75 nga anibersaryo sa plano sa welfare sa Simbahan pinaagi sa pag-organisar og ilang kaugalingong adlaw sa pagserbisyo karong 2011.
“Ang serbisyo mahimong himoon bisan kanus-a atol sa nahabiling mga panahon niining tuiga, ug ang gidugayon mahimong mausab depende sa serbisyo nga himoon,” mabasa diha sa sulat gikan sa Unang Kapangulohan.
Ang panawagan aron sa pagserbisyo miabut human sa pakigpulong sa komperensya ni Presidente Henry B. Eyring atol sa sesyon sa Sabado sa buntag sa Abril nga kinatibuk-ang komperensya.
“Ang mga pagbati sa panaghiusa mopalambo sa maayo nga mga epekto sa serbisyo nga inyong ihatag,” miingon si Presidente Eyring, Unang Magtatambag sa Unang Kapangulohan. “Ug kadtong mga pagbati sa panaghiusa diha sa mga pamilya, diha sa Simbahan, ug diha sa mga komunidad motubo ug mahimong usa ka malungtarong kabilin bisan dugay nang nahuman ang proyekto” (“Mga Oportunidad sa Paghimo og Maayo,” Liahona ug Ensign, Mayo 2011, 25).
Ang Unang Kapangulohan mihatag og mga lagda alang sa mga miyembro nga nagplano og mga proyekto sa pagserbisyo, lakip ang pagdapit sa mga sakop sa komunidad ug full-time nga mga misyonaryo sa pag-apil ug pagplano og mga proyekto aron ang mga pamilya ug mga indibidwal makaapil. Ang pagpahibalo sa mga proyekto aron makakuha og pagtagad ug kaikag giawhag usab.
Daghan na nga mga ward, mga branch, mga district, ug mga stake ang mitubag sa panawagan. Ang uban nga mga nagserbisyo misul-ob sa yellow nga mga kamisin nga Mormon Helping Hands samtang ang uban milukot lang sa buktunan, apan gikan sa pagdonar og dugo ngadto sa pagpanglimpyo sa mga building sa komunidad, ang pagresponde sa mga miyembro makapatandog gayud.
Si Elder Walter F. González sa Kapangulohan sa Seventy ang nangulo sa mga kalihokan sa Simbahan didto sa North America Southeast Area. Una niyang gihagit ang matag kongregasyon sa iyang area sa paghatag og usa ka adlaw sa pagserbisyo niadtong 2009.
Kada tuig sukad niana ang mga miyembro sa habagatan sa Estados Unidos mi-organisar og tinuig nga mga adlaw sa pagserbisyo. Si Elder González miingon nga malipayon siya nga makita nga ang mga kongregasyon sa tibuok Simbahan aduna niana nga oportunidad karong tuiga.
“Nagserbisyo kami tungod kay kini Kristohanon, ug kini usa ka oportunidad nga mamahimong sama Kaniya, sa pagpalambo og usa ka kinaiya sa pagserbisyo—naandan nga batasan sa pagserbisyo,” miingon siya. “Samtang kita moserbisyo nga dili maghunahuna sa relihiyon o denominasyon o kaliwatan, ang atong matinabangong mga kamot mahimong taytayan, nag-ugmad og relasyon sa komunidad.”
Didto sa Jacksonville, Florida, USA, 11 ka mga kongregasyon ang mitubag sa panawagan sa pagserbisyo pinaagi sa pagdonar og pagkaon ug dugo pagka-Abril 16. Pipila sa LDS nga mga meetinghouse gigamit nga butanganan alang sa mga donasyon nga pagkaon, samtang ang uban mao ang nahimutangan nga mga dapit alang sa pagdonar og dugo.
Ang mga miyembro nga adunay chainsaw sa Jonesboro Ward didto sa Georgia, USA, nagpundok didto sa Stately Oaks Plantation, nabantug nga dapit diin ang salida nga Gone with the Wind gihimoan og pelikula, pagka-Mayo 14 aron sa paghakot sa nangabali nga mga sanga.
Sa katapusang semana sa Abril, ang mga Santos sa California ug Hawaii, USA, nakighiusa uban sa mga boluntaryo sa komunidad alang sa tinuig nga Mormon Helping Hands Day.
Didto sa San Diego, California, USA, 150 ka mga boluntaryo ang mitabang sa pagpanglimpyo sa 3,000 ka mga lapida didto sa Fort Rosecrans Memorial Park, ang sementeryo sa mga beterano.
Ang mga Santos sa Ulahing mga Adlaw didto sa Palos Verdes, California, USA, nakig-uban sa usa ka organisasyon nga dili pangnegosyo nga gitawag og Clean San Pedro aron sa pagpanilhig ug pagpanglimpyo sa mga kadalanan ug mga kadaplinan sa sentro nga dapit sa San Pedro, nakolekta ang sobra sa usa ka tonelada (900 kg) nga mga sagbut ug basura.
Ang nagdumala sa Clean San Pedro, si Steve Kleinjan, miingon, “Ganahan kami nga makigtambayayong niini nga simbahan. Kanunay sila nga adunay ingon niana ka daghan nga mga boluntaryo.”
Ang mga miyembro sa Charlotte North Carolina (USA) South Stake misanong sa panawagan sa Unang Kapangulohan alang sa usa ka adlaw nga pagserbisyo karong 2011 pinaagi sa pakigkauban sa lokal nga charity aron sa pagpahigayon og kalihokan sa pagpangolekta og mga aytem alang sa welcome basket.
Sobra sa 2,000 ka mga bag nga papel nga may lista sa gikinahanglan kaayo nga mga aytem ang gibutang sa tibuok komunidad. Usa ka semana ang milabay, dul-an sa 130 ka mga boluntaryo ang migahin og 150 ka oras aron sa pagkolekta sa mga bag ug pagdonar sa mga aytem ngadto sa mga pamilya nga walay pinuy-anan ngadto sa bag-ong pinuy-anan.
Ang mga bata sa Primary sa ward naghimo og “Welcome Home” nga mga karatula alang sa mga pamilya.
Didto sa Georgia, USA, ang Griffin Ward nagpundok pagka-Sabado, Mayo 21, aron sa pagpanglimpyo sa sulod ug gawas sa lokal nga gisak-an sa mga walay balay, ang House of Hope.
Didto sa Clinton, Missouri, USA, ang mga Santos sa Ulahing mga Adlaw nagpundok aron sa pagpanindot sa Jackson Zoo, pagpahimutang sa tamnanan sa mga bulak, pagpamintal, ug pagpang-ayo sa mga ekipo.
Si Elder González mipasabut og maayo nga ang serbisyo sa mga miyembro mopanalangin niadtong anaa sa Simbahan ug niadtong dili mga miyembro.
“Adunay daghan kaayo nga nagkalain-laing mga paagi sa pagserbisyo ug pagpakigsuod sa komunidad,” miingon siya. “Ug samtang nagserbisyo kita sa uban, makita usab nato ang kamot sa Ginoo diha sa kinabuhi sa atong mga miyembro.”
Ang mga miyembro sa California, USA, nanglimpyo sa ilang siyudad.
© IRI