Makakita Kaha Ko og Trabaho?

Greg Burgoyne, South Africa

Gitutokan nako ang gipilo nga kwartang papel diha sa akong kamot samtang akong naamguhan nga kinahanglan pa kong mobayad sa ikapulo sa kwarta nga akong kinitaan panahon sa katapusang semana sa akong summer job. Nakautang ko og 90 ka rands sa ikapulo, ug ako adunay tibuok nga R100 nga kwartang papel.

Bag-ohay lang kong nagsugod sa katapusan nakong tuig sa medical school ug adunay daghang mga galastuhan sa eskwelahan. Naglingkod ko didto nga mikumot sa R100 nga kwartang papel, naghunahuna mahitungod sa pagbayad og ikapulo. Ang akong summer job nahuman na, ug lisud na gayud nga makakita pa ko og trabaho nga masulod sa akong busy nga eskedyul. Bisan pa man niana, ang akong mga ginikanan nagtudlo kanako sa pagbayad og hingpit nga ikapulo. Kini nga kwarta gipanag-iya sa Ginoo, ug nasayud ako niini. Uban niana nga hunahuna, gibutang nako ang kwarta sulod sa sobre ug mibayad sa akong ikapulo.

Sa misunod nga mga adlaw, samtang nangita ko og trabaho, nag-ampo ko nga ang mga bintana sa langit maabli ngari kanako. Nagkinahanglan ko og trabaho nga masulod sa akong eskedyul, maayo og sweldo sa mubo nga mga oras, ug sa gihapon makahatag kanako og panahon sa pagtuon. Sa ato pa, nagkinahanglan ko og milagro.

Duha ka semana ang milabay usa ka higala ang misugyot nga mo-aplay ko og trabaho sa ospital diin ang among medical school bag-ohay lang nga miabli og bag-ong andana alang sa edukasyon. Milakaw ko ngadto sa opisina ug mituktok sa pultahan. Ang babaye sa sulod, kinsa nagtudlo sa among klase duha ka tuig na ang milabay, nakahinumdom nako.

“Naghunahuna ko kon nangita kamo og mga tigtudlo alang sa inyong bag-ong programa,” miingon ko. “Kon nangita kamo, ganahan ko nga makatrabaho.”

“Nangita gayud kami,” mitubag siya. “Nangita kami og tawo nga makatudlo sa grupo sa mga medical student sa second-year sulod sa usa ka oras kada hapon. Mausab-usab kini nga oras sa pagsugod ug nagkinahanglan nga tun-an nimo ang lainlaing pasyente kada adlaw ug dayon tudloan ang mga estudyante. Makahimo ka ba niana?” nangutana siya.

Ang Ginoo mitabang kanako nga makakita og trabaho nga mao gayud ang akong gikinahanglan! Mao kadto ang tubag sa akong pag-ampo.

Human makatrabaho og usa ka bulan, akong nabantayan kon unsa gayud ako ka bulahan. Ang tseke sa akong sweldo nagpakita nga gibayaran ko og binulan nga sweldo katulo piloa ang gidak-on kay sa akong nahunahunaan. Agig dugang, nakadawat ko og vacation pay.

Ang Ginoo miabli sa mga bintana sa langit ug mibu-bu kanako og mga panalangin nga mas dako pa kay sa ako gayung gilauman. Isip resulta, ang akong pagtuo nalig-on sa baruganan sa ikapulo.

Nagkinahanglan ko og trabaho nga masulod sa akong eskedyul, maayo og sweldo sa mubo nga mga oras, ug sa gihapon makahatag kanako og panahon sa pagtuon. Sa ato pa, nagkinahanglan ko og milagro.