Nagkaplag og Kalinaw sa Panahon sa Kasamok

Ni Elder Per G. Malm

Sa Seventy

Gikan sa “Kapahulayan alang sa Inyong mga Kalag” Liahona, Nob. 2010, 101–2.

“Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28).

Sa downtown sa Gothenburg, Sweden, adunay dakong lapad nga dalan nga may nindot nga mga kahoy sa matag kilid. Usa ka adlaw akong nakita ang usa ka lungag diha sa punoan sa dakong kahoy, busa mausisahon kong gitan-aw ang sulod ug nakita nga ang kahoy sa hingpit walay sulod.

Nahibulong ako nga ang kahoy nakabarug pa gihapon. Busa mihangad ako ug nakita ang usa ka dako nga bakus nga puthaw nga gibakus sa taas nga parte sa punoan. Gihigot ngadto sa bakus ang daghan nga puthaw nga mga alambre, ug kini gihigot usab ug giangkla ngadto sa duol nga mga building. Gikan sa layo kini makita nga sama sa uban nga mga kahoy; sa pagtan-aw lamang sa sulod nga ang usa makamatikod nga kini walay sulod imbis nga may solido, lig-on nga punoan. Moabut ang panahon, ang kahoy dili na maluwas ug kinahanglang putlon.Sama lamang nga ang usa ka gamay nga kahoy nagtubo sa hinay-hinay ngadto sa usa ka lig-on nga kahoy, sa ingon kita makatubo lakang sa matag lakang sa atong kapasidad nga mahimong solido ug puno gikan sa sulod ngadto sa gawas, lahi sa walay sulod nga kahoy.

Kini pinaagi sa makaalim nga Pag-ula ni Jesukristo nga kita adunay kalig-on sa pagbarug nga taas ug lig-on ug mapapuno ang atong mga kalag —uban sa kahayag, pagsabut, hingpit nga kalipay, ug gugma.

Ang hugot nga pagtuo diha ni Jesukristo ug ang pagsunod sa Iyang mga pagtulun-an naghatag kanato og hugot nga paglaum, ug kini nga paglaum naghimo og usa ka solido nga angkla sa atong mga kalag. Kita mahimo nga makanunayon ug dili matarug. Makabaton kita og malungtaron nga kalinaw sa sulod; makasulod kita ngadto sa kapahulayan sa Ginoo. Gawas lamang kon kita mobiya gikan sa kahayag ug kamatuoran nga ang usa ka haw-ang nga pagbati, sama sa kahoy, mokupot sa kinailadmang mga bahin sa atong mga kalag.

Hatagan nato og gibug-aton kadtong mga butang nga mopadayon og mahangturon nga kalinaw sa hunahuna ug sa kasingkasing. Niana ang atong pagsalig mosamot sa “pagkalig-on diha sa atubangan sa Dios” (D&P 121:45). Ang saad nga mosulod ngadto sa kapahulayan sa Ginoo, ang pagdawat sa gasa sa kalinaw, layo gikan sa usa ka temporaryo, kalibutanon nga katagbawan. Kini usa gayud ka langitnong gasa: “Kaninyo ibilin ko ang kalinaw, kaninyo ihatag ko ang kalinaw: hatagan ko kamo niini, dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27). Siya adunay gahum sa pag-ayo ug paglig-on sa kalag. Siya mao si Jesukristo.

Diha sa Kalibutan sa Kagul-anan

“Ang Manluluwas [misulti] ngadto sa Iyang mga disipulo samtang Siya nag-atubang sa Iyang Paglansang ug samtang sila nag-atubang sa kahadlok, kalibug, ug pagpanggukod. Diha sa Iyang katapusan nga gihiusang tambag ngadto kanila diha sa pagkamortal, Siya miingon: ‘Gisulti ko kini kaninyo, aron dinhi kanako makabaton kamog kalinaw. Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan’ (Juan 16:33).

“Busa, sa kalibutan sa kagul-anan, atong hinumduman ang atong hugot nga pagtuo. … Ug magpakabuhi kita sa mas hingpit nga paagi, uban sa dugang pa nga walay kahadlok ug kaisug kay sa uban pang mga panahon.

“Si Kristo nakabuntog sa kalibutan ug mihimog agianan alang kanato.”

Elder Jeffrey R. Holland sa Korum sa Napulog Duha ka mga Apostoles, “Kini, ang Pinakamahinungdanon sa Tanang mga Dispensasyon,” Liahona, Hulyo 2007, 20.

Unsaon nato pagkakaplag sa kalinaw ug paglaum sa mga panahon sa kasamok?

Si Elder Jeffrey R. Holland sa Korum sa Napulog Duha ka mga Apostoles nagtabang sa pagtubag niini nga pangutana diha sa “Kini, ang Pinakamahinungdanon sa Tanang mga Dispensasyon” (Liahona, Hulyo 2007, 18).

“Pagpuyo ingon ka matinud-anon kutob nga kita makahimo. … Kinahanglan nga dili gayud kita mawad-an og umoy tungod lamang [sa mga panghitabo] nga nag-una kanato sa bisan asa nga dapit.”
“Ayaw gayud tugoti ang kahadlok ug ang amahan sa kahadlok (si Satanas mismo) sa paglinga kanato gikan sa atong hugot nga pagtuo ug sa matinud-anon nga pagpuyo.”
“Pagmatinud-anon. Ang Dios nagbantay. Nakaila Siya sa imong pangalan ug nahibalo Siya sa imong panginahanglan.”

Hunahunaa ang pagsiksik sa mga kasulatan alang sa mga bersikulo kabahin sa paglaum, kalinaw, ug hugot nga pagtuo diha ni Jesukristo.

“Miduol kaniya ang mga dagkong panon sa katawhan, nga nanagdalag mga bakul, mga kimay, mga buta, mga amang, ug sa daghang uban pa, ug ilang gibutang kini sila diha sa tiilan ni Jesus; ug iyang giayo sila:

“Nga tungod niana ang mga panon sa katawhan nanghitingala sa ilang pagkakita sa mga amang nga nakasulti na, sa mga kimay nga nangaayo na, sa mga bakul nga nakalakaw na, ug sa mga buta nga nakakita na: ug ilang gidayeg ang Dios sa Israel” (Mateo 15:30–31).

Panan-aw Gipahiuli, ni J. Kirk Richards