Valaau e Auauna Atu: O Oe
Ua talosagaina e le Au Peresitene Sili o Le Ekalesia a Iesu Keriso o le Au Paia o Aso e Gata Ai ia iunite uma o le Ekalesia e faamanatu le 75 tausaga o le fuafuaga o le uelefea a le Ekalesia e ala i le faatulagaina o a latou lava aso o auaunaga i le 2011.
“E mafai ona faataunuuina le auaunaga i soo se taimi o totoe o lenei tausaga ma o le umi atonu e fetuunai lava e faalagolago i le ituaiga o auaunaga e faatinoina,” o le fuaitau lea mai se tusi a le Au Peresitene Sili.
O le valaau e auauna atu na oo mai ina ua maea le saunoaga a Peresitene Henry B. Eyring i le sauniga i le taeao o le Aso Toonai o le konafesi aoao ia Aperila.
“O le a faateleina e le lagona o le lotogatasi ia aafiaga lelei o le auaunaga tou te tuuina atu,” o le saunoaga lea a Peresitene Eyring, Fesoasoani Muamua i le Au Peresitene Sili. “Ma o na lagona o le a faatupulaia ai le lotogatasi i aiga, i le Ekalesia, ma nuu, ma avea ai ma talatuu tumau pe a maea le galuega faatino” (“O Avanoa e Fai Ai Mea Lelei,” Liahona ma le Ensign, Me 2011, 25).
Sa tuuina mai e le Au Peresitene Sili ni taiala mo tagata o le ekalesia e fuafuaina ni galuega auauna atu, e aofia ai le valaaulia o tagata o nuu ma faifeautalai faamisiona ina ia aofia ai ma ia fuafuaina ni galuega faatino e mafai ona auai ai aiga ma tagata taitoatasi. Sa uunaia foi le faalauiloaina faalauaitele o galuega faatino ina ia toatele ai ni tagata e silafiaina ma fiafia i ai.
E tele uarota, paranesi, itu, ma siteki ua uma ona tali atu i le valaau. O nisi o vaega sa galulue sa ofuina ni mitiafu samasama o Mamona Lima Fesoasoani, ae o isi na o le afe lava i luga o lima o o latou ofu, ae na matua maoae le tali atu o tagata o le au paia, e le gata i le foai atu o toto ae faapea foi i le faamamaina o fale i nuu ma alalafaga.
O Elder Walter F. González o le Au Peresitene o Fitugafulu o loo pulefaamalumalu i galuega a le Ekalesia i le Eria a Matu Amerika Sautesasae. Sa ia luiina muamua i le 2009 ia aulotu uma o lana eria ia i ai se aso e fai ai se auaunaga.
O tausaga uma lava talu mai lena taimi, ua faatulagaina ai e au paia i le itu i saute o le Iunaite Setete ni aso o auaunaga faaletausaga. Na saunoa Elder González, ua fiafia o ia i le iloa o le a maua e aulotu uma o le Ekalesia atoa lena avanoa i lenei tausaga.
“Tatou te auauna atu aua o se uiga faa-Keriso lea, ma o se avanoa foi e avea teisi ai faapei o Ia, ia atiina ae se uiga o le auauna atu—o se mausa o le auauna atu e masani ai,” na ia saunoa ai. “A tatou auauna atu e aunoa ma le mafaufau i tapuaiga po o aulotu po o ituaiga, o le a avea o tatou lima fesoasoani ma ni lima fesootai, e atiina ae ai fegalegaleaiga ma tagata o nuu.”
I Jacksonville, Florida, ISA, e 11 aulotu na tali atu i le valaau e auauna atu e ala i le foai atu o taumafa ma toto i le aso 16 o Aperila. Sa faaaoga nisi o falelotu o le AAG o ni nofoaga e momoli atu i ai foai o taumafa, a o isi sa faatulagaina nisi o nofoaga mo le foaiina atu o toto.
O tagata o le Ekalesia o le Uarota a Jonesboro i Georgia, ISA, o e e iloa faaaoga iliafi, sa faapotopoto faatasi i le Faatoaga i Stately Oaks, o le nofoaga lauiloa lea na pueina ai le ata tifaga o le Gone with the Wind, i le aso 14 o Me, e la’u ese lala laau na tatipi.
O le vaiaso mulimuli o Aperila, sa auai faatasi ai le Au Paia i Kalefonia ma Hawaii, ISA ma le au volenitia i le lotoifale mo le faamanatuga faaletausaga o le Aso o Mamona Lima Fesoasoani.
I San Diego, Kalefonia, ISA, e 150 volenitia sa fesoasoani e faamama le 3,000 o maa faamanatu i le Fort Rosecrans Memorial Park, o se fanuamaliu o tagata matutua.
Sa galulue faatasi le Au Paia o Aso e Gata Ai i Palos Verdes, Kalefonia, ISA, ma se faalapotopotoga e le saili tupe e ta’u o le Clean San Pedro e salu ma faamama le alatele ma auala savali i le eria tutotonu o San Pedro, ma taalao ai le silia ma le tasi le tone (900 kg) o mea ua le toe faaaogaina ma otaota.
Na saunoa le faauluuluga o le Clean San Pedro, o Steve Kleinjan e faapea, “Matou te fiafia lava e galulue faatasi ma le Ekalesia lenei. O taimi uma lava e toatele o latou tagata volentia e auai mai.”
Na tali atu tagata o le Siteki a Charlotte North Carolina (ISA) South i le valaau a le Au Peresitene Sili mo se aso o auaunaga i le 2011 e ala i le faipaaga ma se vaega i le lotoifale e faia galuega alofa e faatinoina se gaoioiga o le aoina mai o mea e fai ai ni ato faafeiloai.
E silia ma le 2,000 tagapepa na i ai se lisi o aitema na sili ona manaomia sa tuuina atu i le alalafaga. O se vaiaso mulimuli ane, na toeitiiti 130 volenitia na faaaluina le 150 itula i le aoina mai o ato ma foai atu anomea i aiga na siitia atu mai le leai o ni fale i ni fale fou.
Sa fai e tamaiti o le Peraimeri o le uarota ni faailo “Afio Mai” mo ia aiga.
I Georgia, ISA, sa faapotopoto ai le Uarota a Griffin i le Aso Toonai, 21 o Me, e fufulu mama totonu ma fafo o se nofoaga i le lotoifale o le, Fale o le Faamoemoe, mo tagata e leai ni fale.
I Clinton, Misuri, ISA, sa faatasitasi ai le Au Paia o Aso e Gata Ai e faamama le Jackson Zoo, fola ia peti o togalaau, vali, ma lipea ia masini.
Sa faamamafa atu e Elder González, o auaunaga a tagata o le ekalesia o le a faamanuiaina ai i latou i totonu o le Ekalesia ma i latou e le auai i le ekalesia.
“E tele ma anoanoai auala eseese e auauna atu ai ma fatu ai ni sootaga ma tagata o afioaga,” na ia saunoa ai. “Ma a o tatou auauna atu i isi, o le a tatou vaaia ai foi le aao o le Alii i olaga o o tatou tagata.”
Ua faamama e tagata o le ekalesia i Kalefonia, ISA, lo latou afioaga.
© IRI