Ang Simbahan Mopahiuli sa Dapit sa Pagpahiuli sa Priesthood

Ang Unang Kapangulohan mipahibalo sa mga plano nga ipahiuli ang makasaysayanon nga dapit nga kaniadto nailhan nga Harmony (duol sa gitawag karon nga Susquehanna), Pennsylvania, USA, diin gihubad ni Propeta Joseph Smith ang kadaghanan diha sa Basahon ni Mormon ug diin gipahiuli ni Juan Bautista ang Aaronic Priesthood niadtong 1829.

Ang proyekto molakip sa pagtukod sa makasaysayanon nga mga building ug sa umahan nga nahimutang sa Harmony ingon man usab ang mga monumento aron sa pagsaulog sa pagpahiuli sa Aaronic ug Melchizedek Priesthood niadtong 1829. Ang groundbreaking gipaabut nga mahitabo inigka-2012, ug ang proyekto gibana-bana nga mahuman sulod sa duha ka tuig.

Ang Harmony, Pennsylvania, mao ang dapit diin si Joseph Smith mihubad kadaghanan diha sa Basahon ni Mormon sa tunga-tunga sa 1827 ug 1830. Didto nadawat sa propeta ang 15 sa nag-unang mga pagpadayag nga anaa sa Doktrina ug mga Pakigsaad.

Sa sama nga dapit, sama sa narekord diha sa Joseph Smith—Kasaysayan 1:66–75, sila si Joseph Smith ug Oliver Cowdery nakadawat sa Aaronic Priesthood gikan ni Juan Bautista niadtong 1829. Sa wala madugay human niana sila si Pedro, Santiago, ug Juan mihatag sa Melchizedek Priesthood ngadto kanila didto sa dapit duol niini.

Si Mark Staker, ang senior researcher sa grupo kalabut sa makasaysayanon nga mga dapit sa Departamento sa Kasaysayan sa Simbahan, miingon nga gisugdan na sa departamento ang arkeyolohikanhon nga pagsiksik aron sa pag-ila sa nahimutangan sa pipila sa orihinal nga mga building diha sa dapit.

“Nagtinguha kami nga mapahiuli ang balay nga gipuy-an nila ni Joseph ug Emma didto sa Harmony ingon man usab ang dapit nga natawhan ni Emma Smith ug ang balay sa iyang pamilya,” miingon siya.

Ang estatuwa nila ni Propeta Joseph Smith ug Oliver Cowdery nga nagdawat sa Aaronic Priesthood ang anaa na diha sa 90-acre (36 ka ektarya) nga dapit. Ang mga plano alang sa bag-o nga mga monumento gihimo na. Adunay plano usab nga tukuron ang usa ka visitors’ center diha sa dapit.

Ang mga lider sa Simbahan midapit sa mga miyembro nga interesado sa paghimo og gamay, usa ka higayon nga kontribusyon alang sa proyekto. Mahimo kini pinaagi sa pagsulat og “Priesthood Restoration Site” diha sa “Other” nga kategoriya sa tithing slip nga makuha gikan sa mga bishop ug mga branch president.

Pagpabilin sa Kasaysayan sa Simbahan sa tibuok Kalibutan

Pipila sa mga departamento sa Simbahan nakigtambayayong sa mga historian, mga architect, mga archaeologist, mga abogado, mga artisan, mga kontraktor, ug mga tig-atiman sa dapit aron sa pagpreserbar sa mga dapit nga mahinungdanon sa kasaysayan sa tibuok Simbahan. Kini nga mga dapit gibahin sa tulo ka mga kategoriya:

• Ang makasaysayanon nga mga dapit mao ang mga lugar diin ang mga panghitabo nga mahinungdanon kaayo sa kasaysayan sa Simbahan nahitabo, sama sa umahan ni Joseph Smith o makasaysayanon nga Kirtland. Mga duha ka dosena nga makasaysayanon nga mga dapit ang makaplagan sa tibuok Estados Unidos, uban sa usa ka dapit sa gawas sa Estados Unidos—Worcestershire’s Gadfield Elm Chapel, ang unang chapel sa Ang Simbahan ni Jesukristo sa mga Santos sa Ulahing mga Adlaw didto sa England.

• Ang makasaysayanon nga mga timailhan, diin adunay mga upat ka dosena, naglakip sa mga templo, mga tabernakulo, ug mga meetinghouse nga ang bili sa arkitektura o katahum walay sama.

• Sa katapusan, tungod kay dili tanang importante nga dapit ang mapahiuli, ang makasaysayanon nga mga timailhan— sobra sa 100 niini— moila sa ubang mga dapit nga gitinguha sa Simbahan nga i-preserbar diha sa mga kasingkasing ug mga hunahuna sa mga Santos sa Ulahing mga Adlaw. Ang mga timailhan makapili og mga lugar (sama sa dapit sa Templo sa Far West) diin walay igong impormasyon aron sa pagpahiuli sa dapit sa tukmang paagi. Adunay dinosena nga internasyonal nga makasaysayanong mga timailhan.

Usa ka 90-acre (36 ka ektarya) nga dapit sa Pennsylvania ang gipahiuli aron sa pagsaulog sa pagpahiuli sa priesthood ug sa paghubad sa Basahon ni Mormon.