Kasaysayan sa Relief Society: Usa ka Pagtan-aw sa Panglantaw sa Ginoo alang sa Iyang Anak nga mga Babaye
Isip anak nga mga babaye sa Dios nga nagtinguha og kinabuhing dayon, makapadayon kita uban sa pagsalig nga nadasig sa mga ehemplo niadtong kinsa nag-una kanato.
Sa dihang gitawag kami isip bag-o nga kinatibuk-ang kapangulohan sa Relief Society, gihatagan kami sa kasaysayan sa Relief Society aron tun-an. Mainampoon namo kining gibuhat, nagtinguha nga masayud kon unsa ang gusto sa Ginoo nga among makat-unan ug dayon mobuhat niini isip resulta niana nga pagtuon. Ang among pagtuon mipadayag og usa ka kabilin nga puno sa espirituhanong gahum ug kontribusyon sa mga babaye nga mga Santos sa Ulahing mga Adlaw. Usa kadto ka maanindot nga rekord sa pakigdumala sa Ginoo ngadto sa Iyang anak nga mga babaye ug sa Iyang mga gilauman alang kanila. Pinaagi sa among pagtuon ug sa inspirasyon nga nagagikan niana nga paningkamot, among nahibaloan ang mga katuyoan sa Relief Society. Among nakat-unan nga sa atong pagpangandam alang sa mga panalangin sa kinabuhing dayon, ang Ginoo gusto nga ang Iyang anak nga mga babaye mopalambo sa pagtuo ug personal nga pagkamatarung, mopalig-on sa mga pamilya ug mga panimalay, ug mangita ug motabang niadtong nanginahanglan. Samtang ang mga sister karon mainampoong mobasa sa ilang kasaysayan, sila makadawat og mga ideya, mga tubag, ug inspirasyon sama gayud kanamo.
Ang among gilauman mao nga samtang magtuon kita sa kasaysayan ug buhat sa Relief Society makita nato kon giunsa sa atong Langitnong Amahan pagtabang ang mga sister kaniadto. Samtang atong makat-unan kon giunsa Niya sila pagtabang, kita makabaton og pagpamatuod nga Siya usab motabang kanato karon. Atong makat-unan nga kon, pinaagi sa Espiritu Santo, ang Dios makagiya sa usa ka babaye sobra sa usa ka gatus ka tuig na ang milabay, Siya makahimo sa ingon alang sa mga babaye sa atong panahon.
Si Sister Eliza R. Snow, ang atong ikaduhang kinatibuk-ang presidente sa Relief Society, usa ka lig-on ug matinud-anon nga nag-unang lider. Iyang nasabtan nga ang Espiritu “motagbaw ug mohulip sa matag tinguha sa tawhanong kasingkasing, ug mohulip sa tanang kahaw-ang.” Sa nagkalain-laing mga higayon sa iyang kinabuhi, nag-antus siya sa luya nga panglawas ug kamingaw. Bisan pa man niana, siya gilig-on, ingon nga siya nakadawat ug naglihok sa personal nga pagpadayag. Alang kaniya, ang personal nga pagpadayag ug ang padayon nga pakig-uban sa Espiritu sama sa usa ka tuburan. Siya miingon, “Ug dili ba kini atong kahigayunan ang pagpakabuhi aron kita makaangkon niini nga padayong magdagayday sa atong mga kalag?”1
Ang mga ehemplo sama niini sa tibuok natong kasaysayan makatabang kanato sa paghinumdom nga ang abilidad sa pagdawat ug paglihok sa personal nga pagpadayag mao lamang ang labing importante nga kahanas nga atong maangkon niining kinabuhia. Uban niini kita dili mapakyas; kon wala kini kita dili molampus.
Ang kasaysayan sa Relief Society importante alang sa mga sister sa tibuok kalibutan karon.
Ang atong kasaysayan nagpadayag og usa ka taas nga linya sa lig-on, matarung, matinud-anon, maunungon nga mga babaye. Kini nga kabilin nagsugod kang Eva, ug ang mga istorya mahitungod niini nga mga babaye para sa matag usa kanato ug mohatag kanato og panglantaw sa atong umaabut. Kon atong padayunon kini nga kabilin sa matarung, maunungon nga mga babaye, kini tungod kay kita motukod diha sa unsa ang ilang nahimo. Pinaagi sa atong pagtuon sa kasaysayan atong makat-unan nga adunay kalig-on ug dakong kapasidad diha sa mga babaye sa Simbahan, nga nagagikan sa ilang hugot nga pagtuo ni Ginoong Jesukristo ug sa Iyang gipahiuli nga ebanghelyo. Kining hugot nga pagtuo nakahatag sa mga babaye og abilidad sa paghimo sa sakto nga mga pagpili ug pagbuntog sa mga hagit ug mga kalisdanan. Nakapahimo kini kanila sa pagsalig sa kadasig sa ilang hugot nga pagtuo ug sa gahum sa ilang mga pakigsaad nga mamahimong maayong mga ehemplo diha sa ilang mortal nga mga kasinatian. Sa matag nasud, makita ang kabilin sa hugot nga pagtuo diha sa mga babaye kinsa mitabang sa pag-establisar sa Simbahan ug sa pagpalig-on sa mga panimalay sa mga Santos sa Ulahing mga Adlaw.
Si Silvia H. Allred, unang magtatambag sa kinatibuk-ang kapangulohan sa Relief Society, naghisgot kabahin sa iyang inahan, si Hilda Alvarenga, nga gitawag sa pagserbisyo isip presidente sa Relief Society sa branch didto sa El Salvador sa dihang siya nakabig sa edad nga sobra sa 30. Giingnan niya ang presidente sa branch nga siya walay kasinatian, dili andam, ug dili sarang. Apan gitawag gihapon siya sa presidente sa branch. Samtang nagserbisyo, nakakat-on siya og mga kahanas sa pagpangulo ug nakapalambo og bag-ong mga gasa sama sa pagtudlo, pagpamulong atubangan sa daghan, ug pag-organisar sa mga miting, mga kalihokan, ug mga proyekto sa pagserbisyo. Gitabangan niya ang uban diha sa branch nga mahimong mga tigtukod sa gingharian.2 Karon, sama sa atong nangagi, ang Langitnong Amahan naglaum sa Iyang anak nga mga babaye nga makabaton og buluhaton sa pagpangulo diha sa matag ward o branch. Ang mga sister sama ni Hilda Alvarenga nahimong mga pioneer ug mga sulundon alang sa umaabut nga mga henerasyon.
Ang kasaysayan makatabang sa mga babaye karon, kinsa adunay daghang mga problema sa ilang kinabuhi.
Ingon nga ang among kapangulohan nakabiyahe sa tibuok kalibutan, nakaanha na kami sa mga panimalay sa mga sister. Nakita namo ang ilang mga panlimbasug ug nasayud sa makapasakit sa dughan nga mga problema nga ilang giatubang. Daghang mga sister ang mibati nga nabug-atan. Ang uban kanila naglisud sa pagpangita og panahon alang sa matag adlaw nga pag-ampo ug pagtuon sa kasulatan ug sa pagbuhat sa mga butang nga makatabang kanila nga mobati sa Espiritu diha sa ilang kinabuhi. Nagpuyo kita sa nag-anam ka mahagiton nga mga panahon ug gilibutan sa mga tinuohan ug mga naandang buluhaton nga makababag kanato sa atong mahangturong tumong. Tungod kay kita isip mga babaye adunay dakong impluwensya niadtong naglibut kanato, kinahanglan nga atong buhaton kutob sa atong mahimo sa pagpabilin sa atong kaugalingon nga lig-on sa espirituhanong paagi.
Ang atong kasaysayan sa Relief Society makatabang kanato sa pag-focus diha sa unsa ang importante ug sa paghimo og prayoridad sa unsay atong buhaton. Matag adlaw gihatagan kita og oportunidad sa paghimo og mga pagpili nga mopalambo sa atong pagtuo ug mopalig-on sa atong mga pamilya. Sobra sa 60 ka tuig na ang milabay, si Belle S. Spafford, ang atong ikasiyam nga kinatibuk-ang presidente sa Relief Society, mihangyo sa mga sister sa pagsuta sa ilang mga interes, pagtimbang-timbang sa ilang mga kalihokan, ug pagpayano sa ilang kinabuhi pinaagi sa pagbuhat niadtong mga butang nga labing malungtaron, sa ingon makalikay sa mga kalihokan nga dili kaayo magantihon.3 Ang iyang tambag bililhon gihapon karon. Ang pagtuon sa atong kasaysayan makatabang kanato nga makabaton og panglantaw nga atong gikinahanglan aron maka-focus diha sa mahinungdanong mga butang nga makapanalangin sa atong kinabuhi sa kahangturan.
Ang pagpalambo sa pagtuo, pagpalig-on sa mga pamilya, ug pagserbisyo sa uban ingon ka importante karon sama kaniadto sa dihang ang Relief Society na-organisar.
Ang atong kasaysayan nagtudlo kanato nga ang lig-on nga pagtuo usa ka makapaawhag ug makapahupay nga pwersa diha sa kinabuhi sa matarung nga mga babaye. Ang hugot nga pagtuo diha sa Pag-ula ni Jesukristo dili lamang moayo kanato, kondili makapahimo usab kini kanato sa pagbuhat sa lisud nga mga butang ug sa pagpuyo diha sa sulundon nga paagi. Ang atong kasaysayan nagtudlo kanato nga ang gugmang putli, ang tiunay nga gugma ni Kristo, nga dili gayud mapakyas, nakatabang sa mga babaye nga makalahutay og maayo sa pipila ka lisud kaayo nga mga pagsulay. Atong mapalambo ang atong pagtuo ug personal nga pagkamatarung kon kita mohimo og mga pagpili sa pagpahiangay sa atong kabubut-on ngadto sa kabubut-on sa Dios. Sa atong paghimo niini, mobati kita og kalinaw. Kon kita wala mahiangay sa kabubut-on sa Dios, mobati kita og kahasol. Kana ang Espiritu nga nagsulti kanato nga kita kinahanglang maghinulsol ug ipahiangay og balik ang atong kaugalingon sa kabubut-on sa Dios. Ang paghinulsol usa ka baruganan nga atong gigamit kada adlaw aron magpabiling lig-on sa espirituhanong paagi.
Atong nakat-unan gikan sa atong kasaysayan nga ang lig-on nga mga pamilya dili sulagma. Ang pagsunod sa plano sa Dios nga may katukma, katuyoan, ug determinasyon usa ka pagpili nga puno sa pagtuo nga gihunahuna diha sa kalibutan karon. Usa kini ka puno sa pagtuo, matinabangon nga pagserbisyo aron sa paglig-on niadtong naglibut kanato ug sa pag-amuma sa tanang mga pamilya.
Ang atong kasaysayan puno sa mga sister nga angayang sundon kinsa mihangop sa mando sa “paghupay sa mga kabus” ug sa “pagluwas sa mga kalag.”4 Si Amy Brown Lyman miserbisyo isip ikawalo nga kinatibuk-ang presidente sa Relief Society atol sa Ikaduhang Gubat sa Kalibutan. Siya mitambag sa mga sister sa paglig-on sa ilang pagtuo ug sa pagpadayon. Iyang gibaling ang ilang focus sa paghimo sa ilang mga panimalay nga luwas nga dapit ug usa ka prayoridad sa ilang kinabuhi.5
Sa pagsulod sa Relief Society, ang matag sister nahimong kabahin sa usa ka tibuok kalibutan nga panag-igsoonay sa kababayen-an, gihiusa diha sa pagkadisipulo. Dinhi nagsugod siya sa pagsalmot kauban ang lain kinsa determinado usab sa pagtuman sa ilang mga pakigsaad ug sa paghatag sa tanan nga sila aduna ngadto sa pagtukod sa gingharian sa Ginoo.
Ang atong kasaysayan makatabang kanato nga masabtan ang atong dili mabulag nga koneksyon ngadto sa priesthood.
Ang Ginoo adunay importante nga buhat alang sa Iyang anak nga mga lalaki ug sa Iyang anak nga mga babaye. Ang mga korum sa priesthood ug mga Relief Society naghimo sa buhat sa Ginoo. Si Propeta Joseph Smith miingon, “Akong i-organisar ang mga babaye ubos sa priesthood subay sa sumbanan sa priesthood.”6
Karon sama sa nangagi, ang presidente sa Relief Society naglihok ubos sa direksyon sa bishop o branch president, kinsa naghupot sa mga yawe sa priesthood sa pagpangulo sa ward o branch.
Si Barbara W. Winder, ang atong ika-11 nga kinatibuk-ang presidente sa Relief Society, miingon, “Ako ganahan sa ingon, ug nagtinguha sa ingon, aron kita mahiusa, kauban sa priesthood, nagserbisyo ug nagtukod sa gingharian sa Dios dinhi karon.”7
Dugang pa dili kini usa ka gamayng butang nga masayud nga ang matag sister makadawat sa tanang mga ordinansa sa kaluwasan ug makahimo og mga pakigsaad nga makapahimo kaniya sa pagtuman sa iyang yutan-on ug mahangturong misyon. Ang matag sister makabaton sa kanunay nga pakig-uban sa Espiritu Santo aron sa paggiya kaniya, paghupay kaniya, ug pagpanghimatuod sa iyang matarung nga mga lihok. Siya hingpit usab nga makagamit sa espirituhanong mga gasa nga makapalambo sa iyang abilidad sa pagpakabuhi nga adunay pagsalig ug proteksyon. Ang atong kasaysayan nagtudlo kanato kon giunsa paggamit sa mga babaye kaniadto kini nga mga panalangin.
Ang pagkasayud sa atong kasaysayan makatabang kanato nga maandam alang sa mga panalangin sa mahangturong kinabuhi.
Sa nangagi atong nakat-unan nga ang mga sister sa Relief Society nakasinati og mga kalisdanan, karon nakigbatok usab kita sa determinado nga kaaway kinsa gusto nga moguba sa atong pagtuo ug mga pamilya ug mobiya kanato nga mag-inusara ug mag-antus. Ang atong kasaysayan sa Relief Society naghatag og kahimtang alang sa tanan nga atong gibuhat. Pinaagi kang Propeta Joseph Smith, ang Manluluwas mihatag sa mga babaye niini nga dispensasyon og usa ka panawagan sa pagtabang sa pagpahigayon sa Iyang buhat.
Atong nakat-unan pinaagi sa atong kasaysayan kon si kinsa kita ug sa atong mahinungdanong tahas diha sa plano sa atong Langitnong Amahan. Dili nato madelegar ang atong mga responsibilidad ngadto sa ubang tawo. Tungod kay ang atong Langitnong Amahan nakaila kanato ug nahigugma kanato, Siya mopaluyo kanato samtang nagtinguha kita sa pagpahiangay sa atong kabubut-on ngadto sa Iyang kabubut-on. “Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20).
Si Maria ug ang Nabanhaw nga Ginoo, ni Harry Anderson; litrato pinaagi sa Busath Photography
Paghulagway sa mga Litrato pinaagi nila ni Matthew Reier ug Howard Collett