Talagsaong mga Kinabuhi Gihinumduman
Truman O. Angell
Si Truman Osburn Angell (1810–87) miserbisyo sulod sa daghan nga mga dekada isip arkitekto sa Simbahan, nagplano ug nagdumala sa pagtukod sa daghan nga mga building, lakip ang Templo sa Salt Lake. Sa tibuok niyang mga katuigan sa pagserbisyo diha sa Simbahan, si Truman mapainubsanon ug masulundon.
Natawo siya sa Hunyo 5, 1810, sa Providence, Rhode Island, USA. Sa diha nga siya usa ka tinedyer, usa ka lokal nga craftsman mitudlo kaniya og pamanday ug panghimo og kabinet, usa ka talagsaon nga matang sa pagpanday og kahoy.
Sa edad nga 22 gipaila-ila siya sa iyang igsoon nga babaye ngadto sa Simbahan, kinsa nakadawat og kopya sa Basahon ni Mormon gikan sa misyonaryo nga si Thomas B. Marsh. Sa Enero 1833 gibunyagan si Truman uban sa iyang inahan, si Phebe, ug sa iyang asawa, si Polly.
Wala madugay human si Truman gi-orden nga sakop sa Ikaduhang Korum sa Kapitoan, si Propeta Joseph Smith mihangyo nga magtukod siya og usa ka tindahan sa Kirtland, Ohio. Mibalibad si Truman, gisultihan ang Propeta nga nangandam siya sa pag-adto sa misyon. Sa sunod nga adlaw, bisan pa niana, nakit-an ni Truman ang Unang Kapangulohan sa layo ug gibati nga naaghat sa pagdawat sa buluhaton sa pagtukod gikan sa Propeta. Sa kadugayan girekord niya, “Tungod niana giusab ko ang akong determinasyon ug minunot sa pagkamasulundon.”1
Niadtong 1856 gipadala ni Brigham Young si Truman og misyon ngadto sa Uropa, nagsugo kaniya sa “paghimo og mga drawing sa bililhong mga buhat sa arkitektura” aron siya “mas makasarang sa pagpadayon” og trabaho diha sa Templo sa Salt Lake ug sa uban nga mga building.2
Gitawag si Truman isip arkitekto sa Simbahan niadtong 1867. (Ang Simbahan wala na magtawag og opisyal nga arkitekto sa Simbahan.) Bisan og ang mga katuigan sa pagtrabaho og maayo nakahimo sa panglawas ni Truman nga madaot, mapainubsanon niyang gidawat ang tawag. Gisulat niya sa iyang journal, “Gibati ko ang hilabihang kakapoy apan kon ang Presidente ug ang akong mga kaigsoonan mibati sa pagpaluyo sa usa ka sama sa ulod sa abug nga sama kanako nga mahimong Arkitekto sa Simbahan, papaningkamuta ako sa pagserbisyo kanila ug dili sa pagpakaulaw sa akong kaugalingon. … Hinaut nga ang Ginoo motabang kanako sa pagbuhat sa mao.”3
Gidumala ni Truman ang daghan nga mga proyekto nga building sa Utah, lakip ang Lion House, ang Beehive House, ang Utah Territorial Statehouse, ug ang St. George nga Templo sa Utah.
Wala makaabut si Truman nga makakita sa pagpahinungod sa Templo sa Salt Lake niadtong 1893, apan matinud-anon siyang miserbisyo isip arkitekto sa Simbahan hangtud sa iyang kamatayon sa 1887.