Manatuaina o Soifuaga Maoae
Truman O. Angell
O Truman Osborn Angell (1810–87) na auauna atu mo le tele o vaitausaga o se tusiata o le Ekalesia, fuafuaina ma faatonuina le tele o fale taua, e aofia ai le Malumalu o Sate Leki. I le aluga o tausaga o lana auaunaga i le Ekalesia, sa lotomaualalo ma usiusitai ia Truman.
Sa fanau o ia i le aso 5 o Iuni, 1810, i Providence, Rhode Island, ISA. Ina ua sefulu ma ona tupu ona tausaga, sa aoaoina o ia e se tagata e tele lona tomai i le faakamuta ma le faimeafale, o se ituaiga galuega faapitoa e faaaoga ai laupapa.
Sa folasia atu ia te ia le Ekalesia i le 22 o ona tausaga e lona tuafafine, o le na mauaina se kopi o le Tusi a Mamona mai le faifeautalai o Thomas B. Marsh. Ia Ianuari o le 1833 na papatiso ai ia Truman faatasi ma lona tina o, Phebe, ma lona faletua o, Polly.
E lei leva ona faauuina ia Truman e avea ma se tasi o le Korama Lona Lua o Fitugafulu, ae talosagaina loa e le Perofeta o Iosefa Samita e tatau ona ia fauina se faleoloa i Katelani, Ohaio. Na teena e Truman, ma sa ia ta’u atu i le Perofeta o loo sauniuni o ia e alu i se misiona. Ae peitai, o le aso na sosoo ai, na vaai ai ia Truman i le Au Peresitene Sili mai se mea mamao ma lagonaina le uunaia e talia le tofiga faufale mai le Perofeta. Na ia tusia mulimuli ane, “E tusa ai ma lena, sa suia lo’u naunautaiga ae gauai atu i le usiusitai.”1
I le 1856 na auina atu e Peresitene Polika Iaga ia Truman i se misiona i Europa, ma faatonuina o ia e “ave ia ata o galuega taua o le tusiata fale” ina ia mafai ona “faaagavaa atili ai o ia e faaauau pea” ona galue i le Malumalu o Sate Leki ma isi fale.2
Na tofia ia Truman e avea ma se tusiata fale a le Ekalesia i le 1867. (E le o toe tofia e le Ekalesia se tusiata fale aloaia a le Ekalesia.) E ui o le tele o tausaga o le galue malosi na mafua ai ona lamatia le soifua maloloina o Truman, ae na ia talia ma le agaga lotomaualalo le tofiga. Na ia tusia i lana api talaaga, “Ua ou lagona le lē lavā ae afai ua lagona e le Peresitene ma o’u uso ina ia lagolagoina se anufe o le pefu e pei o a’u e avea ma Tusiata o le Ekalesia, ia faataga mai a’u ina ia taumafai e auauna atu ia i latou ae lē o le faamatagaina o a’u lava ia. … Ia fesoasoani mai le Alii ia te a’u ina ia faia lea mea.”3
Na faatonutonu e Truman le tele o galuega faatino o fale i Iuta, e aofia ai le Fale Liona, le Fale o le Ofagapi, le Utah Territorial Statehouse, ma le Malumalu o St. George Iuta.
E le’i soifua Truman e vaai i le faapaiaga o le Malumalu o Sate Leki i le 1893, ae na ia auauna atu ma le faamaoni o se tusiata fale o le Ekalesia seia oo i lona maliu i le 1887.