Tala Faamamai o le Talalelei
O Le Natura e Faavavau o le Faaipoipoga
Na fanau Nathan Eldon Tanner i le aso 9 o Me, 1898, i le Aai o Sate Leki, Iuta. Sa faauuina o ia e avea ma se Aposetolo i le 1962 ma i le va o le 1963 ma le 1982, na galue ai o se fesoasoani i le Au Peresitene Sili i lalo o le taitaiga a Peresitene o le Ekalesia e toafa. O se vaega lenei na sii mai lana lauga “Celestial Marriages and Eternal Families,” na saunoa i ai i le konafesi aoao ia Aperila 1980. Mo le saunoaga atoa i le gagana Peretania, alu i le conference.lds.org.
O se tasi o taimi sili ona fiafia i le olaga o se tagata o le taimi lea e fuafua ai se faaipoipoga. … E saogalemu le mafaufau faapea o le toatele o ulugalii latou te mautinoa i le taimi o le faaipoipoga ua latou faia ni filifiliga sa’o; ae o le tele o taimi e iu loa le tafaoga lea e fai pe a uma ona faapaia, amata loa faafitauli, ma faamuta ai ma le faaipoipoga i le tatalaina.
O le faalausosoo o le tatalaina o faaipoipoga ua taitaiina atu ai nisi i se olaga lea latou te lagona ai le tauau ina sosola ese mai sauniga ua foliga mai ua leai sona aoga, e aunoa ma se fesoasoani faalelotu po o se isi faatagaga faaletulafono. O le tele lava o taimi ou te mafaufau ai po o le a le lelei o lo latou iloa e uiga i le faamoemoega o le Foafoaga o le lalolagi lea o loo latou nonofo ai ma po o le a le atoatoa ua latou sailiili ai i tusitusiga paia ina ia aoao ai pe aisea na foafoaina ai e le Atua le tane ma le fafine ma faavaeina le sauniga paia o le faaipoipoga.
Sei o tatou mafaufau muamua i le faamoemoega o le Foafoaga o le lalolagi. O loo faamanino mai i tusitusiga paia e leai lava se isi faamoemoega nai lo le saunia ai o se nofoaga mo atalii ma afafine o le Atua e nonofo ai i le olaga nei ma faamaonia lo latou lava agavaa, e ala i le tausia o poloaiga, ina ia toe foi atu ai i le afioaga o le Atua lea na latou o mai ai.
Ina ua mae’a le Foafoaga o le lalolagi, “Na fetalai ane lea o le Atua, Ina tatou faia ia o le tagata i lo tatou faatusa. …
“Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le faafine.
“Ua faamanuia foi e le Atua ia te i laua; ma ua fetalai atu le Atua i te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai” (Kenese 1:26–28).
Ina ua foafoaina e le Atua le fafine ma avatu o ia i le tane, ua Ia fetalai atu, “O le mea lea e tuua ai e le tane lona tama ma lona tina, a e faatasi ma lava ava: ona avea ai lea o i laua ma tino e tasi” (Kenese 2:24).
Ioe, o le faaipoipoga e faauuina e le Atua, ma e sosoo ai ma lena faatatauga i tane ma ava, ua tatou maua ai mau ia e ta’u soo mai ua avea o ni faamaoniga na avea alii ma tamaitai o ni tane ma ni ava i sauniga o le faaipoipoga lea e sosoo ma taumafataga o le faaipoipoga. Tatou te le o i ai iinei e na o le “aai ma inu, ma ia olioli” (2 Nifae 28:7). Ua tuuina mai ia i tatou se lalolagi ina ia faatoilalo ma ni faatonuga ina ia fanafanau ma uluuluola. E ese le mataina o le iloaina na fetalai mai le Atua “ia fanafanau” ae le na o le “uluola” e tumu ai le lalolagi (tagai i le Kenese 1:28).
E taua mo i tatou le malamalama, e pei ona tatou aoao mai i tusitusiga paia, e faavavau le Atua, o Ana foafoaga e faavavau, ma e faavavau foi Lana upumoni. Ma o lea, ina ua Ia tuu atu Eva ia Atamu i le faaipoipoga, o le a faavavau lena faatasiga. O le faaipoipoga e faauuina e le Atua ma e faataunuuina i Ona malumalu paia e faavavau—e le o faapea seia oo i le oti. Tatou te faitau i le Failauga, “O mea uma e faia e le Atua e faavavau ia” (Failauga 3:14).
Ina ua fesili atu Keriso ia Peteru e tau atu ia te Ia po o ai Ia, na tali mai Peteru, “O Oe o le Keriso, o le Alo o le Atua soifua.” Na tuu atu e Iesu ia Peteru le faamautinoaga na ia iloa lenei mea e ala i le faaaliga mai le Atua le Tama ma o le a Ia ati ae Lana Ekalesia i luga o lenei papa. Ona Ia fetalai atu lea, “Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi; o se mea foi e te tālā i le lalolagi, e tatalaina foi lea i le lagi” (tagai i le Mataio 16:15–19).
Ina ua o mai ia Iesu le au Faresaio, ua faaosooso mai ia te Ia, ma fesili e uiga i le tatalaina o faaipoipoga, o Lana tali na aofia ai mea nei:
“Tou te lei faitaulia ea, o le na faia tagata i le amataga, na ia faia i laua o le tane ma le fafine.
“Na ia fetalai ane foi, O le mea lea e tuua ai e le tane o lona tama ma lona tina, a e faatasi ma lana ava: ona avea lea o i laua o le tino e tasi?
“O lea e le toe toalua ai, a o le tino e tasi i laua. O lenei, o e ua faatasia e le Atua, aua nei faateaeseina e se tagata” (Mataio 19:4–6).
Ua faailoa mai e nei mau o le faaipoipoga faaselesitila, ua faauuina e le Atua ma e faataunuuina e ala i Lana pule i totonu o Ona malumalu paia e faavavau lea, ma o ulugalii ua tuufaatasia ma faamauina i le olaga nei ma le faavavau atoa, e fananau mai a latou fanau i totonu o le feagaiga o le talalelei e faavavau. O le a avea i latou ma aiga e faavavau e tusa ai ma lo latou faatuatua. …
Na afio mai Keriso i le lalolagi e tuu mai ia i tatou lena lava savali—po o ai i tatou ma po o le a foi le mea e tatau ona tatou faia. Na Ia tuuina mai ia i tatou le fuafuaga o le ata o le ola ma le faaolataga a le talalelei ma fetalai mai e leai lava se isi igoa i lalo ifo o le lagi e mafai ona faasaoina i tatou (tagai i le Galuega 4:12). Ua ia i tatou lena lava talalelei toefuataiina i nei aso e gata ai, ma le perofetai soifua o lenei vaitaimi … e talanoa mai mo le Atua, e pei o le tulaga o fesootaiga a le Atua ma tagata i le talafaasolopito atoa. …
Ou te iloa, o le talalelei a Iesu Keriso ma le tausiga o poloaiga a le Atua ma feagaiga na tatou osia ma Ia, e mafai ai e i tatou taitoatasi ona fausia o tatou aiga e avea ma se lagi i le lalolagi ao saunia i tatou lava ma a tatou fanau ina ia toe foi atu i lo tatou Tama Faalelagi.
Ata mai le faaaloaloga a le Faletusi o Talafaasolopito o le Ekalesia
O N. Eldon ma Sara Tanner ma lo la afafine, pe tusa o le 1927. O le la tama lona lima ma le ui’i o, Elena, na fanau i le 1931.