Unsa ang Atong Gituohan

Ang Ordinansa sa Pagbugkos Nagsumpay sa mga Pamilya sa Kahangturan

Samtang ania sa yuta, makahimo kita og sagrado nga mga pakigsaad (mga saad) uban sa Dios diha sa balaan nga templo pinaagi sa awtoridad sa priesthood. Lakip niini nga mga pakigsaad mao ang oportunidad alang sa mga bana ug mga asawa nga mabugkos (maminyo alang sa kahangturan) ug ang ilang mga anak mabugkos ngadto kanila. Kini nagpasabut nga kon kita motuman sa atong mga pakigsaad ngadto sa Ginoo ug sa usag usa, ang kamatayon dili permanente nga makabulag kanato. Kining ordinansa sa pagbugkos mahinungdanon nga bahin sa plano sa atong Langitnong Amahan alang kanato aron sa pagpuyo uban Kaniya sa kahangturan. (Tan-awa sa D&P 128:9–10; 132:19.)

Sa higayon nga kita nakahimo og mga pakigsaad sa templo alang sa atong kaugalingon, kita makatigum sa atong family history ug makapahigayon og mga ordinansa sa templo alang sa atong namatay na nga mga katigulangan. Nakapahimo kini sa mga pakigsaad sa templo nga magamit nila (tan-awa sa D&P 138:29–37).

Ang gahum sa priesthood sa pagbugkos sa mga pamilya gipanagna na sa karaang panahon (tan-awa sa Malaquias 4:5–6) ug sa moderno nga mga panahon (tan-awa sa D&P 2). Ang duha ka mga panagna mipadayag nga si propeta Elijah “motanom diha sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati sa ilang mga amahan” (D&P 2:2).

Ang gisaad nga pagbalik ni Elijah natuman niadtong Abril 3, 1836, sa bag-ong gipahinungod nga Templo sa Kirtland didto sa Ohio, USA, sa dihang si Elijah uban sa lain pa mipakita ug mitugyan sa iyang mga yawe sa priesthood ngadto ni Propeta Joseph Smith (tan-awa sa D&P 110:13–15).

Karon, adunay 134 ka mga templo ang magamit sa tibuok kalibutan, diin ang takus nga mga Santos sa Ulahing mga Adlaw makahimo og mga pakigsaad ngadto sa Dios ug mabugkos isip mga pamilya alang sa kahangturan. Mahimo silang mobalik aron moserbisyo isip mga proxy sa ilang namatay na nga mga katigulangan, sa ingon nagtuman sa panagna nga ang mga kasingkasing sa mga anak mobati sa ilang mga amahan.

Kinahanglan gayud nga atong madawat ang piho nga mga pakigsaad ug mga ordinansa aron makabalik sa pagpuyo uban sa atong Langitnong Amahan:

1. Kita nabunyagan ug nakumpirmahan (tan-awa sa Mateo 3:16–17; Juan 3:5; 2 Nephi 31:5–18).

2. Ang mga lalaki nakadawat sa Aaronic Priesthood ug sa dili madugay madawat ang Melchizedek Priesthood (tan-awa sa D&P 128:11).

3. Sa templo maghimo kita og dugang nga mga pakigsaad nga adunay kalabutan sa endowment.

4. Ang mga bana ug mga asawa mabugkos (maminyo) diha sa templo alang sa karon ug sa tibuok kahangturan.

5. Ang mga anak nga natawo sa magtiayon nga nabugkos natawo “diha sa pakigsaad.” Ang mga anak nga wala matawo diha sa pakigsaad mahimong mabugkos ngadto sa ilang mga ginikanan.

6. Dayon atong andamon ang mga pangalan sa atong mga katigulangan alang sa buhat sa templo ug ipahigayon ang gikinahanglan nga mga ordinansa alang kanila diha sa templo (tan-awa sa 1 Mga Taga-Corinto 15:29; D&P 128:15–16, 24).

Alang sa dugang nga impormasyon, tan-awa sa Mga Baruganan sa Ebanghelyo (2009), 257–62; Matinud-anon sa Tinuhoan (2004), 13–16, 86–91, 186, 228–33; ug “Pagpakatakus sa Pagsulod sa Templo,” Liahona, Ago. 2010, 12–13.

“Ug hatagan ko ikaw sa mga yawe sa gingharian sa langit: ug bisan unsay imong pagabugkuson dinhi sa yuta, didto sa langit pagailhon kini nga binugkos” (Mateo 16:19).

Mga paghulagway sa litrato pinaagi nila ni Laureni Fochetto, John Luke, Craig Dimond, Matthew Reier, ug David Stoker; litrato sa Templo sa Recife Brazil pinaagi ni Laureni Fochetto