Liliu atu i le Talalelei—ma se Misiona

Marco Brando, Italia

Sa ou ola ae i le Ekalesia ma ua leva ona i ai se fuafuaga e auauna atu i se misiona. Ae e oo atu i le taimi ou te auauna atu ai, ua ou moomoo ia i ai so’u la aafiaga mamana o le liua e pei ona ou faalogo o talanoa ai isi tagata pe a latou faamatalaina le liliu mai i le Ekalesia.

Sa ou iloa o le alu i se misiona o le a manaomia ai ni osigataulaga. Sa i ai sa’u galuega lelei ma e lelei le totogi, ma sa ou mafaufau pe mata e mafai ona maua se isi galuega lelei pe a ou foi mai. Sa ou popole i le momotuina o la’u aoga ma tuua le aiga ma uo. Ae sa ou iloa lava i le ta’ele o lo’u loto, o le auauna atu i se misiona e sa’o lea, o lea sa faaauau ai pea la’u tapenaga.

O se vaega o lena tapenaga, sa matou o ai faatasi ma alii faifeautalai i la’u eria i a laua aoaoga na tuu taimi. O se tasi o afiafi sa matou aoaoina ai ma faifeautalai se alii e uiga i le Upu o le Poto, ae na te le’i taliaina le mataupu faavae. Ina ua matou tuua lona fale, sa ou iloaina le faanoanoa o faifeautalai, ma sa ou lagona foi le faanoanoa.

Peitai, ou te lei mautinoa pe aisea e tatau ai ona ou faanoanoa, aua ou te le iloaina moni lenei alii. Sa faaauau pea ona ou mafaufau i ai, ma sa ou iloa ai na ala ona ou mauaina nei lagona ona sa ou lagona le Agaga i le taimi o le lesona. Sa ou faanoanoa ona sa teena e lenei alii se mea na aumaia ia te au le olioli tele.

Faatasi ai ma lena manatu sa ou iloaina ai lo’u matuā liua moni. Sa ou iloa e moni le talalelei, ma ua tau le mafai ona ou faatali e faasoaina atu. E lei leva ae valaauina loa au ou te auauna atu i le Misiona a Roma Italia.

Na matuai faamanuiaina au mo ositaulaga na ou faia i le tapenaina mo la’u misiona. Sa ou aoaoina atu le talalelei i le tele o tagata matagofie, sa ou faia ni uo mo le olaga atoa, ma sa aoaoina le gagana Peretania. Sa faaauau pea ia faamanuiaga ina ua ou toe foi mai i le fale. Sa faafaigaluegaina au i le galuega lava lea e tasi sa ou galue ai ae ou te lei alu i la’u misiona ma na maua se siitaga o le tulaga.

Ae peitai, atonu o le faamanuiaga sili ona maoae, o le faateleina lea o le molimau i le talalelei. Sa avea lau misiona ma se periota o le tuputupu ae faaleagaga e le mafaatusaina, lea ou te faafetai ai pea lava.