Akong Giusab ang Akong Hunahuna

Jessica Baksis, Idaho, USA

Ako 21 anyos ang panuigon ug usa sa mga tag-iya sa usa ka beauty parlor. Nagtudlo ako og klase sa Primary diha sa simbahan. Ang akong kinabuhi maayo, apan gibati ko ang pagkadili mahimutang. Kini ingon og adunay usa ka butang pa nga akong kinahanglan nga pagabuhaton—wala lamang ako mahibalo kon unsa.

Gitawag ako sa akong bishop ngadto sa iyang opisina usa ka Dominggo ug gipangutana ako kon ako bang nahunahunaan ang pag-alagad og misyon. Nakuratan ako og maayo. Na-miyembro ako sa Simbahan sulod lamang sa duha ka mga tuig ug wala gayud maghunahuna sa pag-alagad og misyon.

Gisultihan ko ang bishop nga ako wala magtuo nga ang misyon maayo alang kanako. Sa akong pagbiya sa iyang opisina, miingon siya, “Aw, kon mausab ang imong hunahuna, pahibaloa ako.” Kaingon ko og ang hilisgutan human na, apan ang mga pulong sa bishop mipadayon sa paglanog sa akong hunahuna.

Gipangutana ko ang akong kaugalingon kon unsaon ko kaha paghimo nga makaalagad og misyon. Ako lamang ang miyembro sa Simbahan sa among pamilya. Unsa ang pagabation sa akong pamilya? Unsa ang akong buhaton sa akong bahin sa beauty parlor? Makahimo kaha ako sa pag-alagad sulod sa usa ug tunga ka tuig?

Samtang ako namalandong niini nga mga pangutana, naaghat ako sa pagbasa sa Basahon ni Mormon. Gipunit ko kini ug mipakli ngadto sa ikawalo nga kapitulo sa Alma. Samtang akong gibasa ang mahitungod ni Alma ug ni Amulek nga misugod sa ilang misyon, nasayud ako nga ako usab nanginahanglan “sa pagpadayag sa mga pulong sa Dios” (bersikulo 30). Sa pagkasunod nga Dominggo gisultihan ko ang akong bishop nga akong giusab ang akong hunahuna ug buot akong moalagad og misyon.

Ang akong pamilya misuporta, ug ako nakahimo sa pagbaligya sa akong bahin sa beauty parlor. Mialagad ako sa Caracas, Venezuela, ug nagpadayon ako sa pag-ani sa mga panalangin sa pagbaton og dungganan nga pag-alagad sa Ginoo.