Espesyal nga Seksyon sa Katungdanan ngadto sa Dios
Katungdanan ngadto sa Dios kauban ni Papa
Nagkinahanglan og Tabang sa Katungdanan ngadto sa Dios? Anaa ra kini sa panimalay.
Human mahibalo mahitungod sa bag-ong booklet nga Katungdanan ngadto sa Dios sa usa ka fireside sa miaging semana, si Aleks Miller— presidente sa korum sa mga deacon sa North Shore Ward, Vancouver British Columbia Stake—naghinam-hinam nga magsugod na. Siya ug ang iyang amahan naghimo og eskedyul nga mag-abut kada Dominggo aron kaubang magtrabaho sa usa ka seksyon sa booklet.
“Ang akong papa ug ako, kada semana, maglingkod ug mosusi sa usa ka seksyon sa basahon,” miingon si Aleks. “Magsugod kami uban sa pag-ampo, ug dayon magkat-on kami sa mga butang ug magbasa sa mga kasulatan. Among tubagon ang mga pangutana diha sa seksyon ug dayon mosulat kon unsaon namo pagtuman sa among nakat-unan.” Si Aleks kanunay nga mopakigbahin sa iyang inahan sa unsay gitrabaho niya ug sa iyang amahan. “Nakig-istorya ko sa akong mama mahitungod sa sakrament ug sa kahulugan sa mga pag-ampo sa sakrament ug misulat sa pipila ka mga ideya kalabut kon sa unsang paagi nga ako, isip usa ka deacon, makatabang sa paghimo sa sakrament nga mas makahuluganon alang kaniya.”
Human sa pipila lamang ka semana niining mga miting sa Katungdanan-ngadto-sa Dios-kauban ni-Papa, si Aleks nakamatikod nga nakahimo kini og kalainan sa iyang kinabuhi. “Nakapahimo kini kanako nga mobati og maayo gayud kaayo,” miingon siya. Ang paglingkod kauban sa iyang Amahan dili kanunay mao ang unang butang nga ganahang buhaton ni Aleks inigka Dominggo sa hapon, “apan sa higayon nga magsugod na kami sa pagkat-on ug pagbasa nga magkauban, mas malipayon ko ug mas maayo ang akong gibati mahitungod sa pagbuhat niini.”
Si Aleks naghimo og bag-ong mga tumong ug nakabaton og mas dakong panabut sa ebanghelyo samtang siya nagtuon ug nagkat-on kauban ang iyang amahan. “Usa sa mga seksyon sa Katungdanan ngadto sa Dios misugyot nga magtuon kami sa lima ka mga hilisgutan sa Alang sa Kalig-on sa mga Kabatan-onan ug dayon mosulat og usa ka tumong alang sa matag usa aron makahimo kamo og mas maayo,” pasabut ni Aleks. “Gipili nako ang pagkamatinuoron. Busa usa sa akong mga tumong mao ang pagpahibalo sa akong mga ginikanan kon makabuhat ko og butang nga sayop imbis nga taguon kini sa akong kaugalingon.”
Laing hilisgutan nga gipili ni Aleks mao ang edukasyon. “Ang akong tumong mao ang pag-adto sa eskwelahan sa tibuok bulan nga dili magpabadlong sa klase ug paghuman sa tanan nakong buluhaton aron wala na akoy bisan unsa nga homework. Maayo ra ang dagan, ug karon aduna koy daghang sobra nga oras.”
Karon si Aleks nag-awhag sa tanang mga deacon sa iyang korum sa pagtrabaho aron matuman ang ilang katungdanan ngadto sa Dios. Ug nagtanyag siya sa samang tambag ngadto ni bisan kinsa nga laing batan-ong mga lalaki nga naghunahuna mahitungod sa pag-abli sa ilang mga booklet ug sa pagtrabaho: “Buhata lang kini,” miingon siya. “Kon morag dili kamo makasugod nga kamo ra, buhata kini sama sa akong gibuhat ug hangyoa ang inyong papa sa pagbuhat niini kauban ninyo.”
Gilitratohan ni Paul VanDenBerghe