Vaega Faapitoa o le Polokalama o le Tiute i le Atua
Aoao, Galue, Faasoa Atu
E tolu upu e tuu atu ai ia te oe le ki e faataunuu ai lou tiute i le Atua.
O Helamana Ayala e fiafia i le ninjitsu (o se tomai faa-Iapani e tau pe fusu ai). Na faaalu e lenei ositaulaga mai le Uarota a Hacienda, le Siteki o le Aai o Mekisiko Tecamac, le tele o le taimi e faataitai ai mea na ia aoaoina. O le tele o taimi e fesili atu ai ana uo e faaali atu ia i latou ni metotia eseese.
E fiafia o ia i le musika ma e ave ni ana lesona i le ta kitara. “Ae e le tele so’u taimi e faataitai ai,” o lana tala lea. “Ma o lea e le tele ai so’u alualu i luma. Ma e le mafai ona tele se mea ou te faasoaina atu.”
E malamalama Helamana i le taua o le faataitai o mea na e aoaoina ona faasoa atu lea. “E le faapena e na o le iloa. E tatau ona e faia,” o lana tala lea. “E mafai ona tatou aoaoina ni mea, ae afai tatou te le faataitaia, e le aoga lea ia i tatou. Ma o le faasoaina atu e taua e fesoasoani ai ia te oe ina ia mautinoa ai ua e aoaoina.”
O le mea lena e na te fiafia ai i le polokalama fou o le Tiute i le Atua. “Ou te fiafia i le manatu o le ‘aoao, galue, faasoa atu,’” o lana tala lea. Sa fesoasoani tele ia te au. O le tele o mea e iloa ma le faaaogaina o mea na ou aoaoina ua fesoasoani lea i la’u molimau.”
Na te faaaogaina le ata o le faaolataga o se faataitaiga. O se aoaoga faavae na ia faalogo i ai i le tele o taimi. “Ae o le aoaoina mo au lava ia, sa ou vaai ai i le alofa o le Tama Faalelagi mo i tatou. Na pa’i mai le Agaga Paia i lo’u loto, ma sa ou lagonaina i totonu e moni. Na ou lagona Lona alofa mo au ma o le a Ia auina mai Lona Alo.”
Ao faatulagaina ma galue Helamana i ana sini o le Polokalama o le Tiute i le Atua, na te talisapaia le lagolagosua na te maua mai ona matua. “Na uunaia au e o’u matua, ma faamanatu mai ia te au pe a galo ia te au, ma e la te fesili mai ia te au pe ua faatuina a’u sini,” o lana tala lea.
E faaalu e lona tama, lea e avea ma epikopo i lo latou uarota, se taimi e fesoasoani ai ia te ia. “Na te fesoasoani mai ia te au ina ia ou malamalama i mea ou te le malamalama i ai,” o le tala lea a Helamana. “E lagolagoina tele a’u e o’u matua i lena tulaga.”
Fai mai Helamana o sini na talosagaina e le polokalama o le Tiute i le Atua i alii talavou ua faatuina mo lo latou lava lelei. Ua faamalosia e le polokalama o le Tiute i le Atua lona faatuatua ma fesoasoani ia te ia e tetee atu i faaosoosoga. Na fesoasoani foi e saunia o ia mo le lumanai. “E fesoasoani lenei tusi ia te oe ina ia saunia e maua le Perisitua Mekisateko ma aoao atu oe i le tele o mea e te manaomia o se faifeautalai.”
E pei lava foi o lona alualu i luma i le ninjitsu e ala i le faatuina o ni sini e aoao ai, ma galue i mea na ia aoaoina, ma faasoaina atu i isi, ua iloa e Helamana o le “alualu i luma i le olaga, e manaomia ai lo tatou faatuina o ni sini ma vaai atu i le lumanai.”
O le faaaogaina o le polokalama o le Tiute i le Atua ma le fesoasoani a ona matua, ua faia ai e Helamana se amataga lelei.
Ata na pueina e Adam C. Olson