Espesyal nga Seksyon kabahin sa Personal nga Kauswagan
Ang Personal nga Kauswagan sa Among Pamilya
Ang Personal nga Kauswagan mitabang sa duha ka batan-ong mga babaye sa Kyiv, Ukraine, sa paghimo og positibo nga mga kausaban sa ilang mga kinabuhi ug sa mga kinabuhi sa ilang mga pamilya.
“Usahay ang usa ka tawo makausab sa tanan nga naglibut kaniya. Kon ikaw nagsugod sa imong kaugalingon—kon ikaw adunay kaisug sa pagsugod diha sa imong kaugalingon—niana ang tanan nga naglibut kanimo mamaayo sa kadugayan,” nag-ingon si Katya Kalashnikova gikan sa Kyiv, Ukraine.
Pinaagi sa hugot nga pagtuo ug sa Personal nga Kauswagan, sila si Katya Kalashnikova ug Ivanna Rubanchiuk sa Voskresens’kyi Ward nakahimo sa pagkakaplag niana nga kaisug, naghatag kanila og oportunidad sa paglig-on sa ilang mga pamilya ug sa pag-andam alang sa templo.
Naghimo og Kausaban
Ang mga pamilya ni Katya ug Ivanna mipasakop sa Simbahan wala madugay human ang Misyon sa Kyiv Ukraine natukod niadtong 1992. Ang duha ka mga pamilya hinay-hinay nga nahimong dili kaayo aktibo sa wala pa ang duha ka bata nga mga babaye moabut sa edad nga bunyagan.
Ang pamilya ni Ivanna mibalhin sa diha nga siya 13 ngadto sa usa ka panimalay duol sa gamay nga simbahan sa Santos sa Ulahing mga Adlaw. Samtang siya ug ang iyang inahan milabay niini, ang iyang inahan nahinumdom sa kaayo nga gidala sa Simbahan nganha sa iyang kinabuhi. Giawhag niya si Ivanna sa pagsimba. “Nasayud ang akong inahan nga diha sa Simbahan itudlo nila kanako ang maayong mga butang lamang kon itandi sa unsay itudlo sa kalibutan,” miingon si Ivanna. Misugod siya sa pagsimba ug sa pagtambong sa mga kalihokan ug nakigkita sa mga misyonaryo, ug sa diha nga gipangutana siya sa mga misyonaryo kon siya magpabunyag ba, miuyon siya.
Istorya ni Katya
Sa edad nga 15 si Katya miabut gikan sa usa ka biyahe uban sa pundok sa mga kabatan-onan sa komunidad. Nahibulong siya sa diha nga gisultihan siya sa iyang amahan nga iyang gidapit ang mga misyonaryo sa pagtudlo kaniya. Giklaro kini kaniya nga samtang siya gidani sa pagpamati, siya [ang amahan] dili interesado.
Mitakda og panahon si Katya sa pakigkita sa mga misyonaryo. “Samtang ako namati, gibati nako nga kini mao ang matarung nga agianan nga adtoan. Nahinumduman ko kadto nga mga pagbati nga diha kanako sa pagsimba isip usa ka bata. Ug sa wala madugay, mihukom ako nga magpabunyag,” nag-ingon siya.
Nag-uswag sa Personal nga Paagi
Ang duha ka batan-on nga mga babaye kinahanglan nga mohimo og mga pagpahiangay nga mahimong mga miyembro sa Simbahan, ug ang Personal nga Kauswagan nagtabang kanila sa paghimo sa pagbag-o. “Nagtubo pa ako. Ako adunay kaugalingon nga mga nabatasan. Bisan ang akong paagi sa pagsinina nanginahanglan nga usbon,” naghinumdom si Katya. “Ang Personal nga Kauswagan sa hinay-hinay mitabang kanako sa pag-usab. Kini mihatag kanako og gahum nga mahimong anak nga babaye sa Dios, dili lamang diha sa Simbahan apan sa kada adlaw.”
Pinaagi sa Personal nga Kauswagan, sila si Ivanna ug Katya nakahimo sa paghan-ay og mga batasan nga molig-on kanila sa espirituhanon nga paagi, sama sa pag-ampo, pagtuon sa kasulatan, ug sa pagtan-aw og angay nga medya. Nakakat-on usab sila kon unsaon sa pagtudlo sa mga leksyon ug sa pagserbisyo sa uban. Sa tanan-tanan, kini mitabang kanila nga mas maduol ngadto sa Dios ug mahimong mas maayo nga mga ehemplo ngadto sa ilang mga pamilya.
“Ang Personal nga Kauswagan mitabang kanako. Ang kada nahuman nga buluhaton mihatag kanako og paglambo; kini midugang og kahibalo ug kaisug,” nag-ingon si Ivanna. “Kini ilabi na nga maayo alang kanako tungod kay ang kasagaran nga mga sakop sa akong pamilya dili aktibo nga mga miyembro sa Simbahan.”
Nangulo pinaagi sa Ehemplo
Ang mga kausaban nga gihimo ni Ivanna pinaagi sa Personal nga Kauswagan mitabang kaniya nga mahimong ehemplo ngadto sa iyang pamilya. “Sa tanan niini nga panahon ang akong mga ginikanan nakakita kon unsa ako pagkausab. Nalipay kaayo sila nga ako nagsimbahan,” nag-ingon si Ivanna. Misimba siya ug mitambong sa mga kalihokan nga nag-inusara hangtud usa ka adlaw ang iyang inahan mihukom sa pagkuyog kaniya ngadto sa sakrament miting. Karon nagkuyog sila sa pagsimba.
Ang ehemplo ni Katya nakapatandog usab sa mga kinabuhi sa iyang pamilya. Wala madugay human mipamiyembro si Katya sa Simbahan, ang iyang inahan misugod sa pagkuyog kaniya ug dayon ang iyang amahan. Ang mga pamilya niining duha ka batan-ong mga babaye nakamatikod sa kalainan nga gihimo sa Personal nga Kauswagan ug kalihokan diha sa mga kinabuhi ni Katya ug ni Ivanna. Nakita nila unsa ka malipayon nga nahimo sila ug buot nga moapil niana nga kalipay.
Pagsulod diha sa Balay sa Ginoo
Ang kalipay ni Katya ug sa iyang pamilya mipadayon sa paglambo. Samtang si Katya miapil diha sa Personal nga Kauswagan, nakamatikod siya nga kini mihatag og gibug-aton sa kamahinungdanon sa templo. “Adunay tibuok nga seksyon nga gipahinungod sa pag-adto ngadto sa templo, ug ako sa tinuod buot nga moadto sa templo, apan ang akong mga ginikanan dili andam,” siya naghinumdom.
Si Katya nakahimo, bisan pa niana, sa pag-adto sa templo uban sa iyang klase sa seminary. Siya naghinumdom, “Mihimo ako og buhat sa templo sa unang higayon. Nalipay gayud ko, ug buot ako nga moadto pag-usab. Ako gusto gayud sa akong pamilya nga moadto didto ug magpabugkos alang sa kahangturan.”
Nangandam ang pamilya ni Katya ug sa katapusan mibati nga sila andam na sa pag-adto sa templo. Duha ka mga tuig human sa iyang unang pagbisita ngadto sa templo, mibalik si Katya, niini nga higayon uban sa iyang pamilya. “Nasabtan ko nga kini gayud usa ka dapit diin ang mga pamilya makahimo nga mahangturon,” nag-ingon si Katya. Nabugkos sila didto sa Templo sa Freiberg Germany.
Nagpadayon diha sa Hugot nga Pagtuo
Mapasalamaton sila si Katya ug Ivanna sa Simbahan, ug ang duha nakapahimulos gikan sa mga gihatag niini ilabi na sa Personal nga Kauswagan. “Ang akong pagpamatuod sa Personal nga Kauswagan mao nga kini naghimo kanato nga mas malig-on ug nagtabang kanato nga mahingpit sa matag bahin sa atong mga kinabuhi,” nag-ingon si Katya.
Gibati ni Ivanna nga ang Young Women ug ang mga organisasyon sa Simbahan nagtabang kanila sa pag-andam nga mahimong usa ka misyonaryo. Positibo si Ivanna mahitungod sa misyonaryo nga buhat. Nag-ingon siya, “Ayaw pagkawala og kadasig, apan sa kanunay magpaka-ehemplo kon giunsa sa Simbahan pag-usab sa atong mga kinabuhi. Malipayon kita diha niini, ug ang kada tawo gusto nga magmalipayon. Ug kon nagkuha kita og tawo ug nagpakita kanila niana nga kalipay, nan sila mosunod sa atong ehemplo. Sa kanunay kita makahimo—sa ginagmay nga mga paagi—sa pagtabang niadto nga mga tawo, sa pagserbisyo kanila, ug sa pipila ka kahibulongan nga higayon, maandam na sila.”
Si Katya Kalashnikova nakaangkon og kahibalo pinaagi sa pagbuhat sa Personal nga Kauswagan, nga mi-impluwensya sa iyang mga ginikanan sa pag-uban kaniya sa pagsimba. Sa atbang nga pahina: Si Katya ug ang iyang higala nga si Ivanna Rubanchiuk diha sa atubangan sa Templo sa Kyiv Ukraine.
Mga litrato pinaagi ni Lucas McGraw ug Trevor Mcdonald
Nagpasalamat si Ivanna sa Personal nga Kauswagan sa pagtabang kaniya sa paghatag og maayo nga ehemplo alang sa iyang pamilya. Si Ivanna ug ang iyang inahan karon nagkuyog og simba.