Kua ni Guilecavi Au
Sa noqu masu kei na veivakalougataki mo ni na sega ni guilecava ni ko ni sa luvena yalewa vakamareqeti dina ena matanitu ni Kalou.
Kemuni na ganequ lomani, sa dua na ka rekitaki meu mai soqoni vata kei kemuni nikua. Au dau vakanamata tiko mai ki na soqoni raraba vakayabaki vakaoqo ni iSoqosoqo ni Veivukei kei na itukutuku e dau cauraki eke.Vinaka, kemuni na ganequ. Ka talei vei au meu lesi mai vei Peresitedi Thomas S. Monson meu vosa ni kua, ka wasea e vica na vakasama mo ni bulagoci kina na marama ena Lotu.
Ena dua na gauna sa oti au a vakaraica wavoki tiko kei watiqu kei na luvei keirau yalewa na neitou loga ni veisenikau totoka. Au qoroya kina vakalevu na totoka ni veikabuli ni Kalou. Kau raica sara, ena kedra maliwa na veika bula totoka oqo, na senikau lailai duadua. Au kila vakavinaka sara na yaca ni senikau oqo baleta niu se gone au dau taleitaka sara na senikau oqo. Na yaca ni senikau oqo na kua-ni-guilecavi-au.
Au sega ni kila se cava na vuna e mai solega tu kina na noqu bula ena veiyabaki na senikau lailai oqo. E sega ni dau dreta na noda rai, ena rawarawa sara na kena raibaleti mai na vo ni senikau tale e so; ia e totoka tale ga na kena irairai ni vakatauvatani kei na karakarawa ni lomalagi—oqo beka na vuna au dau talaleitaka tu ga kina.
Oya na vosa ni kerekere kei na veicurumi ni yacana. E dua na itukuni makawa mai Jamani o ya ni gauna sa vakayacana taucoko kina na Kalou na veisenikau, sa qai vo toka e dua me vakayacani. A rogo sara mai e dua na domo lailai, “Isa Turaga, ni kua ni guilecavi au!” A sauma na Turaga ka kaya me sa yacana sara ga o ya.
Ena bogi nikua au vinakata meu vakayagataka na senikau lailai oqo meu vosa vakaibalebale kina. E vakauqeti au na lima na tebe ni se ni senikau na kua-ni-guilecavi-au meda nanuma tiko kina e lima na ka meda kua ni guilecava.
iMatai, kua ni guilecava mo yalomalua.
Au vinakata meu tukuna vei kemuni e dua na ka, au nuitaka ni ko ni na ciqoma ena kena sala dodonu: sa kila vakavinaka tiko na Kalou ni o kemuni kei au e da sega ni tamata vinaka sara vakaoti.
Meu tukuna talega: ni sa kila vakavinaka talega na Kalou ni o ira na tamata o ni nanuma tiko ni ra sa vinaka sara tu era sega ni vakakina.
Ia eda sa qai dau vakayagataka tu vakalevu na noda gauna kei na igu ena noda vakatauvatataki keda tiko kei ira tale eso—meda vakatauvatataka tiko na noda malumalumu kei na nodra kaukauwa. Oqori sa qai dau vakavuna meda lalawataka na veika e dredre me rawati. Sa yaco kina, meda sa sega ni marautaka mada na veika eda sa rawata toka, baleta ni vaka e lailai toka mai na nona rawa-ka e dua tale.
Sa tu na kaukauwa kei na malumalumu ni tamata kecega.
E ka talei ni tiko na veika o ni kaukauwa kina.
Ni sa tiki ni nomuni mai bula ena bula oqo na kena na tiko vei kemuni eso na malumalumu.
Sa qai gadreva tiko na Kalou me vukei keda meda na vuki mai na noda malumalumu oqo meda kaukauwa,1 ia sa kila tu o Koya ni oqo sa dua na lalawa balavu.2 E gadreva vei keda o Koya me taucoko na noda bula, o koya gona kevaka meda na tiko ga ena salatu ni bula vakatisaipeli, ena yaco meda na rawata dina. Sa o koya tiko kevaka o ni se bera tiko ni yacova. Ni cakacakataka tikoga, ia, mo ni kakua ni vakararawataki kemuni tiko.
Kemuni na marama, e vuqa vei kemuni sa tiki ni nomuni bula na lomana ka dau vosoti ira era malumalumu tu. Yalovinaka mo ni nanuma talega mo ni lomani kemuni ka dau vosoti kemuni vakaikemuni tale tikoga.
Ena gauna oqo, mo ni vakavinavinakataka tiko na rawa-ka lalai sa yaco tiko ena nomuni itikotiko, ena nomuni veimaliwai vakamatavuvale, nomuni vuli-ka kei na ituvaki ni bula, nomuni vakaitavi ena Lotu kei na nomuni torocake tiko. Me vakataki ira na kua-ni-guilecavi-au, ni dina ga era ka lalai wale vei kemuni na rawa-ka oqo, ka sega ni dua e raica rawa, ia na Kalou sa raica tiko mai ka ra sega ni ka lailai Vua. Kevaka o ni nanuma ni rawa-ka duadua ga sai koya moni dua na rosi uasivi sara se na okiti totoka duadua, sa na rawa mo ni calata kina eso sara na veika ni bula e totoka cake sara.
Me vakataka, na nomuni vinakata tiko ga me vakayacori e dua na lotu vakamatavuvale e “sega ni vakamelei” ena veimacawa—e dina ga ni kena vakayacori o ni na loma rarawa kina kei ira o ni tiko vata—ka na sega beka ni digidigi vinaka duadua. Ia, mo ni tarogi kemuni mada, “Na cava me keitou vakayacora vakamatavuvale me rawa ni keitou marau kina vakayalo ka kauti keitou vata mai vakavoleka?” Na lotu vakamatavuvale o ya—e dina ga ni vaka tu oya sega ni lewai rawa ka caka tu beka ga me rawa—ia ena vua-vuai vinaka kina na veisiga mai muri.
E balavu na noda ilakolako me rawa kina na vinaka sara, ia sa rawa meda kunea na veivakurabuitaki kei na marau ena veikalawa leleka mada ga ena ilakolako o ya.
iKarua, kua ni guilecava na kedrau duidui na solibula vinaka kei na solibula vakalialia.
Na solibula vinaka sai koya na noda solia yani e dua na ka vinaka me baleta e dua na ka e vinaka cake.
E dua na solibula vinaka o ya na noda yadra meda raica e dua na gone lailai ni tadra-ca. Eda kila kece oqo. Ni na vakacacana na noda bula, ke da yadra ena bogi taucoko, me da vakarautaka e dua na isulu me daramaka o luveda yalewa ena Siga Tabu, oqori e sega soti ni dua na solibula vinaka.
Na noda solia na noda gauna ena vulici ni ivolanikalou se na noda vakavakarau meda vakavulica e dua na lesoni sa i koya e dua na solibula vinaka. Ena sega tale toka ga ni vakakina na nomuni vakayagataka e vuqa na auwa ena nomuni cula na ulutaga ni lesoni ki na icavucavu ni kuro e vale, mera yadua na lewe ni nomuni kalasi.
Ena duidui na tamata kei na veika duidui eda sotava, ka ni dua na solibula vinaka vua e dua sa na rawa me solibula lialia vua e dua tale.
Eda na kila rawa vakacava na kedrau duidui ena noda bula? Meda tarogi keda mada ga, “Au sa solia tiko beka na noqu gauna kei na igu ki na veika e yaga cake vakalevu?” E vuqa sara tu na veika vinaka meda na vakayacora, ia eda na sega ni rawa ni vakayacori ira taucoko sara. Ena marautaka na Tamada Vakalomalagi ni da solibula ena dua na ka vinaka me baleta e dua na ka e cecere cake ka tawamudu na kena ituvaki. Ena so na gauna, oqori sa rawa talega ni kena ibalebale na noda susuga cake e dua na senikau lailai ka totoka me vaka na kua-ni-guilecavi-au, mai na dua na loga ni veisenikau levu ka totoka sara na rokana.
iKatolu, kua ni guilecava mo marau tiko ena gauna oqo.
Ena nodra italanoa taleitaki na gone lalai Charlie and the Chocolate Factory, a vunitaka kina o Willy Wonka na daucaka jokeliti tawa kilai, e yadua na tikite koula ena lima na jokeliti ka vakaraitaka ni o koya ga ena kunea e dua vei iratou na tikite oqo ena nona icocovi me mai vagadetaki ena nona vale ni caka jokeliti ka na soli tiko vua na jokeliti ena nona bula taucoko.
A volai toka ena tikite koula yadua na vosa oqo: “Ni bula vinaka, ko ni sa kalougata ena nomuni kunea na Tikite Koula oqo! Sa tu oqo e levu na ka totoka me nomuni! E levu na ka mo ni kurabui kina sa waraki kemuni tu! … na ka e veikavuni ka vakurabui … ena … marautaki… vakidacala ka lomaleqataki.”3
Ena nodra italanoa talei ka totoka oqo na gone, era a gadreva sara e lewe levu ena veiyasai vuravura mera na kunea e dua na tikite koula. Eso era nanuma ni sa na vakatau tiko na nodra bula marau ena veisiga ni mataka na nodra na kunea e dua na tikite koula oqori. Ena nodra nuitaka vakalevu, era sa tekivu guilecava kina na marau a dau yaco vei ira ni ra kania e dua na jokeliti. Sa laki yaco me veivakacudrui na jokeliti, kevaka e sega ni tiko kina na tikite koula.
E vuqa nikua era se waraka tikoga na nodra tikite koula—era vakabauta ni tikite oqo sa tiko kina na idola ni bula marau era dau tatadrataka tu. Vei ira eso, na tikite koula oqo sai koya na bula vakawati vinaka sara; eso tale, sai koya na itikotiko totoka me vaka e dau vakaraitaki tu ena mekesini; se na bula galala beka mai na lomaocaoca se lomaleqa.
E sega ni ca na vinakata na ka dodonu—meda nuitaka ka vaqara mada na ka e “vinaka, na ka e totoka, se daudokai se vakaturaga.”4 Ena yaco mai na leqa ni lokuyarataki na noda bulamarau—ena noda waraka mena qai yaco mai na kena gauna—na noda tikite koula me na basika.
Na ka duadua ga a vinakata vakalevu tu e dua na marama sai koya me vakamau vata e valetabu kei dua na lewe ni matabete bula dodonu ka me dua kina na marama tina ka vakawati. A tatadrataka tu mai oqo ena nona bula taucoko, o io, sa na dua dina na marama tina totoka ka marama vakawati dauloloma o koya. Me itikotiko sara ga ni veikauwaitaki loloma na nona itikotiko. Ena sega sara ni cavuta kina e dua na vosa vakatani. Ena sega vakadua ni qesa kina na kakana. Ka ra na sega ni vinakata vakalevu cake, mai na nodra tiko vata kei Na kei Ta e vale ena mua ni macawa na o ira na luvena, na tiko vata kei ira na nodra itokani.
O ya na nona tikite koula. Sa vaka me inaki duadua ni nona bula na ka oqori. O ya na ka ena vinakata vakalevu duadua e vuravura.
Ia a sega ni yaco me vakakina. Ka, ni sivi vata tiko na veiyabaki, na nona sa yalolailai tikoga mai vakalevu, yaloca, ka dau cudrucudru sara talega. Ka sega ni kila rawa na vuna e bureitaka tiko kina vua na Kalou na veika dodonu e gadreva tiko oqo.
A laki cakacaka voli vaqasenivuli ena koronivuli ni lalai, ka sa qai dau vakananuma tu vua na nodra voliti koya tu gonelalai ena veisiga taucoko na sega ni basika mai ni nona tikite koula. Ni toso tiko na veiyabaki sa lomararawa vakalevu cake tikoga mai ka yalo lailai sara. Sara sega mai ni vinakataka na tamata me dau maliwai ira. Sa laki yaco kina me dau cudruvi ira na gone e koronivuli. Sa dau yalo vakatani, cudrucudru ka galigali vakalevu kina.
Na ka vakaloloma me baleta na italanoa oqo, sai koya ni a sega na marama lomani oqo, ena levu ni nona yalorarawataka tiko na nona tikite koula, na levu ni kalougata sa nona tu. Era a sega na luvena mai vale, ia era a wavoliti koya ena nona rumu ni kalasi. E a sega ni vakalougatataki ena dua na matavuvale, ia a solia tu vua na Turaga na madigi, ka vica walega e soli vei ira—na kalougata me dua na qasenivuli dau veivakayarayarataki vinaka vei ira e drau na gonelalai kei na matavuvale.
Na lesoni eke sai koya ni kevaka meda sa na vakayagataka na noda veisiga ena waraki tiko ni rosi roka totoka, eda na calata kina na totoka kei na veivakurabuitaki ni kua-ni-guilecavi-au era tu volivoliti keda tu.
E sega ni tukuni eke me da sa biuta laivi na vakanuinui se vaqaqacotaka na noda lalawa. Kakua ni tarova na nomu sasagataka na vinaka sara e tiko e lomamu. Kakua ni tarova mo nuitaka tiko na gagadre savasava ni yalomu. Ia kakua ni tarova mo raica se sotava na totoka ni veika rawarawa ka lagilagi ni veigauna talei ni bula ena veisiga yadua e dau tiki ni dua na bula vutuniyau, ka bula bulataki vakavinaka sara.
O ira na tamata bula marau au se bau kila, e sega ni o ira era kunea na nodra tikite koula; ia sai ira ga ena gauna era sasagataka tiko kina na nodra lalawa kilikili, era kunea ka vakamareqeta tale tikoga vakakina na totoka kei na kamica ni vei auwa ni nodra veisiga yadudua. Sai ira ena veikalawa yadudua sara, era susuga kina e dua na yalo ni vakavinavinaka kei na qoroqoro ena nodra bula taucoko. Sai ira oqo na tamata bula mamarau duadua.
iKava, kua ni guilecava na “cava e vuna” na kosipeli.
Eso na gauna, ena noda ivakarau ni bula, eda dau vakacalakataka na noda raibaleta e dua na gacagaca bibi ni kosipeli i Jisu Karisito, me vakataka na nona raibaleta e dua na tamata e dua na kua-ni-guilecavi-au totoka ka vakamareqeti. Ena veika sa tu vei keda na lewe ni Lotu me baleta na noda sasaga gugumatua meda vakayacora rawa na itavi kei na ilesilesi kece sara, eso na gauna eda nanuma ni kosipeli sa dua na lisi balavu ni cakacaka meda kuria ki na noda lisi balavu dredre “me vakayacori,” baleta ni sa dua na gauna taurivaki me na vakacurumi sara ki na noda veiosooso vakacakacaka. Eda sa vakanamata ga kina na ka e vinakata vei keda na Turaga meda cakava kei na sala meda na cakava kina,ia eso na gauna eda guilecava se na cava e vuna.
Kemuni na ganequ lomani, na kosipeli i Jisu Karisito e sega ni ilesilesi; e dua na salatu, sa tuvanaka na Tamada Vakalomalagi dauloloma, e veimuataki ki na bula marau kei na vakacegu ena bula oqo kei na lagilagi ka na vakayacori dina ga ena bula sa roro tiko mai. Na kosipeli edua na rarama e curubasikata na bula vakayago oqo ka vakararamataka na sala sa tu e matada.
Ni da sa kila tiko na “cava” kei na “caka vakacava” ni kosipeli ena ganita, na tawamudu ni kena revurevu kei na kena vakaturaga ni kosipeli ka na vu mai na “cava na vuna.” Ni da sa kila na vuna e solia kina vei keda na Tamada Vakalomalagi na ivakarau oqo meda bulataka, ni da nanuma na vuna eda sa vakadeitaka ni sa na vakayavutaka kina na noda bula, sa na sega kina ni icolacola bibi na kosipeli, ia, sa na yaco me ka rekitaki ka talei sara. Sa yaco me ka vakamereqeti ka kamikamica.
Meda kakua ni lako tiko ena bula vakatisaipeli ka rai sobu tiko ki ra, ka da nanuma tikoga na cakacaka kei na ilesilesi sa tu e matada. Meda kakua ni lako tiko ka sega ni raica rawa na totoka ni veika bula lagilagi kei na veitokaitua vakayalo e wavoliti keda tu.
Kemuni na ganequ lomani, mo ni vakasaqara mada na cecere, na totoka, kei na vakarisekete ni reki mai na cava “e vuna” na kosipeli i Jisu Karisito.
Na “cava” kei na “caka vakacava” ni talairawarawa ena makataka na ilakolako ka tauri keda toka ena sala dodonu. Na “vuna” meda talairawarawa kina e vakasavasavataka na noda ivalavala, e veisautaka na itovo makawa ki na kena e lagilagi. E vakarabailevutaka na noda cakacaka lalai ni talairawarawa ki na cakacaka tabu ni veivakatabui.
iKalima, kakua ni guilecava ni lomani iko na Turaga
Niu se gone, niu dau raici ira na kakua-ni-guilecavi-au lalai, eso na gauna au vakila niu sa vakataka na senikau o ya—ka lailai ka sega ni yaga. Au dau vakasamataka de sa na guilecavi au na noqu matavuvale se o Tamaqu Vakalomalagi.
Ena veiyabaki e muri au rawa ni raicalesu na cauravou o ya ena yalovinaka kei na yalololoma. Au sa qai kila oqo—niu a sega ni gulilecavi.
Au sa kila e dua na ka: niu sa iApositolo ni iVakavuvuli o Jisu Karisito, au na vakaraitaka ena veivakadeitaki taucoko ni yaloqu—vakakina o kemuni!
Ko ni sega ni guilecavi.
Kemuni na ganequ, evei ga na vanua o ni tiko kina, se cava sara na ka o ni sotava tiko, ko ni sega sara ni guilecavi. Se vakacava sara na dredre ni nomuni veisiga, se cava sara na nomuni nanuma ni ko ni sega ni yaga, se cava sara na nomu nanuma ni ko ni sa uabaleti vakatani, e sega ni guilecavi kemuni na Tamamu Vakalomalagi. E dina sara, e lomani kemuni o Koya, ena loloma tawayalani.
Vakasamataka mada o ya: O kilai ka nanumi tiko mai vua e dua na tamata cecere, kaukauwa ka lagilagi duadua ena vuravura kei lomalagi taucoko! Sa lomani iko na Tui ni veimaliwa lala tawamudu kei na veigauna tawayalani!
Sa kilai kemuni kei na yacamuni—o Koya ka a bulia ka kila na veikalokalo—sai kemuni na luvena yalewa ni Nona matanitu. E vola vakaoqo na Daunisame:
“Niu sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo, ko ni sa lesia;
“A cava na tamata, mo ni nanumi koya kina?
“O ni sa buli koya me uasivi sobu vakalailai vei ira na agilosi, ka vakaisalataka ena iukuuku kei na vakarokoroko.”5
E lomani kemuni na Kalou baleta ni ko ni Luvena. E lomani kemuni o Koya e dina ga ni so na gauna o ni dau galili se caka cala.
Erau veivueti ka veivakabulai na loloma ni Kalou kei na kaukauwa ni kosipeli vakalesuimai. Kevaka walega mo na vakatara ki na nomuni bula na Nona loloma vakalou, ena rawa me vakasavasavataka na mavoa cava ga, vakamavotaka kece na mosi, ka vakaceguya na rarawa kece sara.
Kemuni na ganequ lomani ni iSoqosoqo ni Veivukei, ko ni sa voleka sara ki lomalagi, mai na ka o ni kila. Ko ni sa vakarautaki ki na veika lelevu mai na kena o ni sega ni raitayaloyalotaka rawa. Tomana tiko moni torocake ena vakabauta ka mo ni bula dodonu. Ciqoma na kosipeli vakalesuimai i Jisu Karisito me nomuni ivakarau ni bula. Vakamareqeta na isolisoli ni itaviqaravi ena Lotu qaqa oqo. Karona na isolisoli ni veiqaravi ena iSoqosoqo ni Veivukei sa vakalougatataki. Tomana tiko na vaqaqacotaki ni itikotiko kei na matavuvale. Tomana tiko mo vakasaqaqara ka vukei ira era gadreva na nomuni veivuke kei na veivuke ni Turaga.
Kemuni na ganequ, e tiko e dua na veivakauqeti ka qoroi me baleta na senikau kua-ni-guilecavi-au. Au nuitaka ni na dua na ivakatakilakila ni veika lalai e vakayaco-ka me rekitaki ka kamikamica cake kina na nomuni bula. Ni kua ni guilecava mo ni dau yalomalua ka dauyalololoma vei kemuni sara mada ga, ni so na solibula era vinaka cake mai na kena tale e so, ni sega ni gadrevi mo ni waraka e dua na tikite koula mo ni qai marau kina. Ni yalovinaka ni kua ni guilecava “na cava na vu” ni kosipeli i Jisu Karisito ena vakauqeti kemuni ka laveti kemuni cake. Ni kua ni guilecava ni sa kilai kemuni, lomani kemuni, ka vakamareqeti kemuni na Tamamuni Vakalomalagi.
Vinaka vakalevu na nomuni dui bula yadua. Vinaka vakalevu na nomuni cakacaka ni loloma kei na veiqaravi vakaitamera ko ni sa mai vakayacora vei ira e vuqa. Vinaka vakalevu na veika lelevu ko ni na laki vakayacora ka kauta yani na reki ni kosipeli ki na veimatavuvale, ki na Lotu, ki na nomuni itikotiko raraba, kei na veimatanitu e vuravura.
Keitou lomani kemuni. Sa noqu masu kei na veivakalougatataki mo ni na sega ni guilecava ni ko ni sa luvena yalewa vakamareqeti dina ena matanitu ni Kalou, ena yaca tabu ni noda iVakabula, o Jisu Karisito, emeni.