Luvequ Goneyalewa ena Noqu Matanitu: A Historical Work for Today’s LDS Woman
Luvequ Goneyalewa ena Noqu Matanitu: Na iTukutuku kei na Cakacaka ni iSoqosoqo ni Veivukei, e dua na ivola vou ka vakarautaki ena veidusimaki ni Mataveiliutaki Taumada, e tiko kina na itukutuku ni iSoqosoqo ni Veivukei kei ira na marama ena Lotu e a kaya na peresitedi raraba ni iSoqosoqo ni Veivukei o Julie B. Beck, ena soqoni raraba ni iSoqosoqo ni Veivukei ena Sepiteba, 2011.
“Ena vakaduavatataka ka vukei ira vata na veitaciniyalewa e vuravura raraba mera muria na inaki ni iSoqosoqo ni Veivukei kei na nodra ivakarau kei na madigi na tisaipeli,” e a kaya. “Sa ivakadinadina ni bibi ni itavi ni marama ena ituvatuva ni bulamarau ni Tamada, ka sa vakarautaka tu e dua na itagede sega ni yavalati rawarawa ni ka eda vakabauta, na ka eda cakava, kei na ka eda na taqomaka.” (tabana e 113 ni ivurevure qo).
A tukuna o Sisita Beck ni ivola oqo e vakarautaka e dua na yavu me vakilai kina ni o ira na marama, era luvena yalewa na Kalou. Ni ra sa vulica na ivola na tamata, era sa na qai raica na kena rawa ni yaga na iSoqosoqo ni Veivukei vei ira kece sara na marama.
E a Lako mai Vakacava na iVola
A tekivu na cakacaka ena veilesi ni Mataveiliutaki Taumada. E a vakatikori o Susan W. Tanner, na peresitedi Raraba ni Goneyalewa sa vakacegui, me vola na ivola. Eratou a lesi o Sisita Beck kei rau na nona daunivakasala o Sylvia H. Allred kei Barbara Thompson, me ratou liutaka na cakacaka vata kei Sisita Tanner, kei ira mera mai edita, daudroini, kei na so tale mera vakatulewa kina ena yalo ni ivakatakila. Tukuna o Sisita Beck ni se bera vakadua ni qarava e dua na cakacaka me tautauvata na kena qo ena vuku ni kaukuawa ni veituberi ni Yalotabu.
E tiki ni veiqaravi na kena digitaki se na ivolatukutuku cava, ka vica vata tu na udolu na kena levu, me na okati ena ivola. Eratou railesuva o Sisita Beck kei rau na nona daunivakasala kei Sisita Tanner na veitukutuku ni iSoqosoqo ni Veivukei mai Nauvoo kei na itukutuku makawa eso kei na kena itukutuku na iSoqosoqo ni Veivukei kei ira na marama ena Lotu.
A tukuna o Sisita Beck ni ka e qai rawa sa ikoya na itukutuku vakayalo ni iSoqosoqo ni Veivukei kei ira na marama ena Lotu, ka sega ni ivola tukutuku walega ni veika e a yaco veitaravi.
“Eda vulica na keda itukutuku baleta ni na vukei keda meda veisau,” tukuna o Sisita Beck ena nona a vosa ena soqoni raraba ni iSoqosoqo ni Veivukei ena vula o Sepiteba 2010. “Dina sara ni bibi ni itukutuku e sega ni tiko ena kena tikinisiga, kena gauna, kei na kena vanua. E bibi baleta ni vakavulica na ivakavuvuli, inaki, kei na kena ivakarau meda vakamuria, ena vukei keda meda kilai keda kei na cava meda na cakava, ka vakaduavatataki keda ena noda saga meda vaqaqacotaka na veimatavuvale e Saioni ka tara cake na matanitu ni Kalou e vuravura” (“Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei,” Liaona, Nov. 2010, 115).
Dina ni muria na ivola na ituvatuva ni ka e a yaco, na ka e vakavulica era tuvai tu ena kena veiwasewase vakaiulutaga. E vakayagataki kina na italanoa kei na ivakaraitaki mai na ivolanikalou kei na gauna nikua, mai na nodra vosa na parofita, ka vakakina na nodra vosa ni veivakavulici na iliuliu ni iSoqosoqo ni Veivukei.
Na iDre ni iVola
Tukuna o Sisita Beck ni ivola oqo era na vulica kina na marama na nodra na vakacokotaka na inaki ni iSoqosoqo ni Veivukei ena nodra bula yadua vakakina na nodra sa veitacini ena veiyalayalati ni bula vakatisaipeli
E a tukuna o Sisita Beck ena dua na veivakatarogi kei na mekasini ni Lotu, “Era na vulica kina na ibalebale ni vakatorocaketaki ni vakabauta kei na buladodonu, vaqaqcotaki ni matavuvale, ka vaqarai ira era gadreva tu na veivuke ka vukei ira. Ni ra sa mai raici ira na marama ena cakacaka ni iSoqosoqo ni Veivukei, era na qai kila na ka era sa cakava na marama kilai ena vakatorocaketaki ni Lotu, mai liu kei na gauna oqo, ka sa na qai rawa nira kila na nodra inaki kei na kedra ituvaki.”
Tukuna o Sisita Beck ni o ira era na wilika na ivola era na vulica ni ena ivakaraitaki ga kei na vakavuvuli ena vakarautaki keda ena noda na vakarorogo kivua Yalo Tabu ka cioqoma na noda ivakatakila yadua. Era na qai vakaukauwataki kina ena nodra bula ni veisiga ka vakakina na dredre era sotava kei na veivakatovolei.
“E levu sara na kaukauwa e tiko ena ivola—na kaukauwa eda rawa ni bulataka,” kaya kina o Sisita Beck. “Au sa nuitaka ni ra na biuta voleka toka e yasadra na ivola na marama, me rawa ni ra na rai yani kina ena siga era na sotava kina na dredre me rawa ni ra wilika kina e dua na italanoa se ivakaraitaki me na vakaukauwataki ira.”
Tukuna o Sisita Beck ni ivola qo ena curuma na nodra loma ni vale na lewenilotu ena nodra kauta yani na marama, ia e vakabauta ni ivola ena dua sara na ivurevure vinaka vei ira na turaga kei na marama. Ena vukei ira na goneyalewa mera kila na nodra sa lewena na isoqosoao ni marama levu e vuravura ka na rawa ni vauci rau e rua na veiwatini ena nodrau sasaga me rau vukei ira na nodrau matavuvale, vakakina na nodra veiqaravi ena Lotu.
Ni sa wilika oti na ivola o Dale Cook, na peresitedi ni Syracuse Utah Bluff Stake, sa qai kaya ni oqo e na dua sara na ivurevure ni veivuke vei ra na turaga kei na marama ena Lotu mera kila kina vakavinaka na nodra itavi ena bula vakatisaipeli i Karisito. “Ni o sa wilika o na qai raica ni [Soqosoqo ni Veivukei] sa veiwekani voleka sara kei na matabete,” kaya o Peresitedi Cook. “Sa vukei au sara meu kila na kaukauwa e tiko vei watiqu kei na [ka au rawa ni cakava] meu [vinaka cake kina] ena noqu lomani koya ka vukei koya ka tokoni koya.”
Veika e Tiko ena iVola
Na ivola e ivurevure ni vuli yadudua kei na veituberi mai vale, ena iSoqosoqo ni Veivukei, kei na so tale na soqoni ni Lotu. Sa vakau tiko oqo vei ira na bisopi kei na peresitedi ni tabana, ka ra na qai laki cakacaka vata kei ira na peresitedi ni iSoqosoqo ni Veivukei me rawa ni laki veisoliyaki yani na ivola me veivakalougatataki vei ira na marama ena veitabanalevu kei na tabana.
Sa namaki me na tiko na ivola ka sa vakadewataki ena rua vakacaca na daseni na mataqali vosa, ena mua ni vula o Janueri 2012. E levu vei ira oqori sa tiko ena initaneti,na vanua era na kunea kina na kena vidio, veivosa cavuti wasei, ka wilika na vakatutu ni nodra rawa ni veiwaseitaka na itukutuku e tiko ena ivola. Lako kina lds.org/relief-society/daughters-in-my-kingdom. Kilikitaka na “Additional Languages (PDF)” ena loma donu ni tabana, ena ruku ni “Related Resources.” Sa tiko ena imatau ni tabana ka tarava na ituvatuva ni veimataqali vosa ka sa vakadewataki tu kina. Ena qai vakadewataki kina levu tale na vosa na mataveilawa.
Sa na tiko na kena ka na vakawaqa kaukauwa ena vosa vaka-Valagi, vaka-Potukali, kei na vaka-Sipeni ena mua ni yabaki ka sa na tiko ena Sitoa ni Lotu kei na store.lds.org.
ITABA MAI VEI RICK WALLACE