Na ika 181 ni Koniferedi Raraba Vakayabaki

Sivia na 100,000 na tamata era tiko rawa ena lima na soqoni ni ika 181 ni Koniferedi Raraba Vakayabaki ni Lotu i Jisu Karisito ni Yalododonu Edaidai mai na Vale ni Koniferedi e Salt Lake City, Utah, Amerika, ena i 1 kei na 2 ni Okotova. E milioni tale era a sarasara ka vakarorogo ena retioyaloyalo, retio, setilaiti, kei na kakaburaki ena initaneti.

Ena imatai ni soqoni ena Vakarauwai, 1 ni Okotova, e a kacivaka kina o Peresitedi Thomas S. Monson na vanua ena tara kina e ono na valetabu vou: Barranquilla, Colombia; Durban, Sauca Aferika; Kinshasa, Democratic Republic mai na Congo; Parisi, Varanise; Provo, Utah, Amerika; kei Star Valley, Wyoming, Amerika.

Sa qai tarava na veisureti nei Peresitedi Monson vei ira na lewenilotu mera cau kina iLavo ni Veivuke Raraba vei ira na Petereni ni Valetabu ena Lotu. A kaya o koya “Na ilavo oqo me veivuke ga vakadua vei ira era na sega beka ni rawa ni lako kina valetabu”.

Ena yakavi ni Vakarauwai a qai kacivaka o Elder David A. Bednar mai na Kuoramu ni iApositolo Le Tinikarua e dua na iwase vou ni youth.lds.org—FamilySearch Youth kei na Family History (lds.org/familyhistoryyouth). Na iWase vou oqo e namaka me vukei ira na itabagone mera vakaraici ira na nodra lewe ni matavuvale ka qaravi ira na tubudra era sa yali ena vaqarai ni kedra ivola tukutuku. (Raica na kena itukutuku ena tabana e 128.)

Sa mai vakacegui talega ena soqoni oqo o Elder Claudio R. M. Costa mai na Mataveiliutaki ni Le Vitusagavulu, sa kacivi tale kina Mataveiliutaki ni Le Vitusagavulu o Elder Tad R. Callister (raica na tabana e 128 ena kena itukutuku). E tinikarua na Vitusagavulu kei na Vitusagavulu ni iWasewase era sa vakacegui ka soli vei ira mera sa emeritesi (raica na tabana e 23 me baleta na veitokoni kei na veivakacegui).

Ena gauna e vosa kina ena mataka ni Sigatabu o Peresitedi Henry B. Eyring, na iMatai ni Daunivakasala ena Mataveiliutaki Taumada, e vakadreti ira tale na lewenilotu ena vakatutu—me a caka ena koniferedi raraba ena Epereli ni yabaki oqo,—mera vakaitavi kece na lewenilotu ena dua na siga ni veiqaravi raraba ena loma ni yabaki 2011 (raica na Henry B. Eyring, “Opportunities to Do Good,” Liahona, Me 2010, 22).

E ra rogoca na lewenilotu ena veiyasai vuravura ena 93 na veimataqali vosa. Me baleta na kena itukutuku matata, sa na tiko na kena ilavelave ena kakaburaki, vidio, ena veimataqali vosa, raica na lds.org/general-conference/when-conference-materials-will-be-available.

Na nona raica e dua na daudroini na Provo Tabernacle, ka a vakacacani ena kama, ni sa vakavinakataki me ikarua ni valetabu mai Provo, Utah, e Amerika.