Veivakavulici ena iTovo ni YaloTabu
Ni da qasenivuli kece, sa dodonu me da kila vakavinaka sara ni Yalo Tabu sai koya na qasenivuli dina ka ivakadinadina ni veika dina kecega.
Ena vuqa na yabaki sa oti keirau a tiko vata kei na noqu itokani daukaulotu ena koronivuli ni veivakarautaki ki na kaulotu kau rogoca kina na domo ni dua na gone ni kaya vaqo, “Bu, o rau ya e rau daukaulotu dina beka?” Au vuki yani ka raica e dua na goneyalewa lailai ni taura toka na ligai buna ka dusi au tu mai kei noqu itokani. Au dredre yani, dodoka yani na ligaqu, raica vakadodonu na matana, ka kaya, “Bula, o au o Elder Richardson, ka keirau daukaulotu dina.” E ramase na matana ni raici au mai, ni kurabui ni sotava e rua na daukaulotu dina.
Au a biuta na vanua oqori ena yalodina vakavoui. Au vinakata meu dua na daukaulotu me vaka e namaka vei au na iVakabula, noqu matavuvale, kei na goneyalewa lailai oqo. Ena rua na yabaki ka tarava, au a cakacaka vakaukauwa meu irairai, vakasama, ivalavala, ka vakauasivi cake me veivakavulici me vaka e dua na daukaulotu dina.
E dina ga niu sa lesu mai ki vale, kau sa biuta mai na noqu tabana ni kaulotu, e laurai tikoga e matanavotu ni sega ni biuti au na noqu kaulotu. Io ni sa oti sara mada ga yani e vica vata na yabaki oqo, au se vakila tu ga ni noqu gauna ni kaulotu, a rua na yabaki uasivi duadua ena noqu bula. E dua na ikaukau lesu sega ni namaki mai na noqu kaulotu na vosa nei goneyalewa lailai oya. Sa mai voqa tikoga oqo e noqu vakasama, “Bu, o koya beka o ya e tu dina vua na matabete?” “Bu, o koya beka o ya e tagane vakawati dina se dua dina na tama?” se “Bu, o koya beka o ya e lewe dina ni Lotu?”
Au sa vulica ni dua na idola me da ka dina kina ena veiyasa kece sara ni noda bula sai koya na noda rawata me da veivakavulici ena dua na ivakarau ka sega ni yalani kina na vuli. O na raica, na bula dina e gadrevi kina na vuli dina, ka na vakatau ena veivakavulici dina. “Na itavi ni veivakavulici [mana] e sega ni yalani walega vei ira na kacivi me ra qasenivuli.”1 Na ka dina, ni sa noda itavi kece na lewe ni matavuvale, iliuliu ni Lotu, kei na lewe ni Lotu (oka kina o ira na itabagone kei na gone) na veivakavulici.
Ni da qasenivuli kece, sa dodonu me da kila vakavinaka sara ni Yalo Tabu sai koya na qasenivuli dina ka ivakadinadina ni veika dina kecega. O ira era sega ni kila vakavinaka sara oqo era na tovolea mera sosomitaka na Yalo Tabu ka cakava vakai ira na ka kecega, sureta ena yalomalua na Yalotabu me tiko vata kei ira ia me veitokoni walega, se era vakabauta ni ra sa solia kece na nodra itavi ni veivakavulici vua na Yalotabu, ia na ka dina sai koya ni ra “a vakaweleweletaka walega.” Sa nodra itavi yadua na itubutubu, iliuliu, kei na qasenivuli mera veivakavulici “ena Yalotabu.”2 Mera kakua ni veivakavulici “e mata ni Yalotabu” se “e daku ni Yalotabu” ia “ena Yalotabu” me rawa kina vua na Yalo Tabu me vakavulica na dina ka sega ni vakasosataki.
E vukei keda o Moronai me da kila na ivakarau me da veivakavulici kina mai na Yalotabu ka sega ni vakaisosomitaka, vakamalumalumutaka, se vakasuka na Yalo Tabu mai na nona itutu dina vaqasenivuli. E kaya o Moronai ni sa dau liutaki na nodra soqoni na Yalododonu “me vaka sa uqeti koya kina na Yalotabu.”3 Oqo me gadrevi vakalevu cake kina mai na kena dau tiko vata ga kei keda na Yalotabu. Me da bula kaya “me vaka sa uqeti kina na Yalo Tabu e kena ibalebale me da gadreva beka me da veisautaka na ivakarau ni noda veivakavulici me vakamuria na ivakarau ni nona veivakavulici na Yalo Tabu. Ni da vakamuria na ivakarau ni Yalo Tabu, sa na rawa vua na Yalo Tabu me veivakavulici ka vakadinadinataka ka sega ni veivakasosataki. Na veimurimuri bibi oqo e rawa ni matanataki mai na ivakaraitaki oqo.
Ena vuqa na yabaki sa oti keitou a kaba cake ki na dela ni ulunivanua na South Sister kei rau na luvequ, e dua na ulunivanua mai Oregon e 10,358-na fute (3,157 na mita). Ni oti e vica na auwa keitou sotava e dua na delana balavu e 45 na diqiri ka tu kina na qereqere ni soata. Ni sa laurai tu mai na dela ni ulunivanua, keitou toso tikoga ka qai raica ni veikalawa kecega ena dromu yani na yava ki na qereqere, ka vakavuna na neitou sisi sobu tale ena vica na idi. A gu yani ki liu na luvequ tagane yabaki 12 kau tiko ga vata kei na noqu goneyalewa yabaki walu. Sa yaco mai na oca kei na yalolailai, sa mosi na yalona, ni nanuma ni rawa ni sega ni laki duavata kei ganena mai cake. Na imatai ni vakasama e yaco mai meu sa colati koya cake. Sa gu na yaloqu ia e ka ni rarawa ni sa malumalumu mai na noqu masela. Keirau dabe ena veivatu ka vakasamataka na vanua keirau sa tu kina, ka keirau vakadavora e dua na ituvatuva vou. Au tukuna vua me ququmi na ligana ena loma ni noqu taga ni tarausese e muri, tautauri matua, ka—bibi duadua—niu laveta ga na yavaqu meu kalawa, me biuta sara mai na yavana ena vanua a tu kina na yavaqu. A vakamurimuria na noqu itosotoso ka vakararavi ena nona talave cake ni liliva toka na noqu taga e muri. Ni oti e dua na gauna ka vaka me sa tawamudu, keirau sa qai yaco ki dela ni ulunivanua. Sa dua na ka talei na nona vakaraitaka na nona qaqa kei na nona yalovakacegu. Io, ena noqu vakasama, erau sa dau kaba ulunivanua dina o koya kei ganena.
Na nona qaqa na luvequ yalewa e vu mai na nona sasaga vagumatua na luvequ yalewa kei na nona dau kaba ulunivanua vinaka me vaka na ivakarau ni noqu kaba ulunivanua. Ni vakasotara vata na nona itosotoso ki na noqu, keirau rawa kina ni toso vata, ka rawa kina vei au meu solia kece na noqu igu. E vakaoqori ena gauna eda veivakavulici kina “me vaka sa veivakauqeti kina na Yalotabu.” Ni da vakamuria na ivakarau ni noda veivakavulici me tautauvata kei na nona na Yalo Tabu, ena vaqaqacotaki keda na Yalotabu ia ena gauna vata oqori ena sega ni vakasosataki. Ni da vakananuma toka oqo, yalovinaka vakasamataka mada e rua na “veivakauqeti ni Yalotabu” bibi ka na yaga me da vakamuria.
Matai, na Yalo Tabu e vakavulica yadudua sara ga na tamata o ya. Oqo e rawa kina meda kila vakavinaka sara vakataki keda na dina. Me vaka ni duidui na noda gagadre, na veika eda sotava, kei na noda itosotoso, ena vakavuvulitaka na Yalo Tabu na veika e dodonu meda kila ka cakava me rawa ni da yacova na keda icavacava e gadrevi. Ni yalovinaka ka kila ni veivakavulici na Yalo Tabu ena “dina ni veika kecega,”4 e sega ni vakavuvulitaka na dina kecega ena dua ga na gauna. E vakavuvulitaka na dina na Yalotabu na “vosa ena vosa, na vunau ena vunau, vakalailai eke ka vakalailai mai kea.”5
O ira era veivakavulici ena ivakarau ni Yalotabu era kila vakavinaka ni ra vakavulica na tamata, sega ni lesoni. Era na sega kina ni rawai mera vakaotia taucoko na veika e tiko ena ivolavakarau se vakavulica na veika kece era sa vulica baleta na ulutaga ia era na raicamatua ga na veika e gadrevi mera kila ka cakava o ira na nodra matavuvale se lewe ni kalasi. O ira na itubutubu, iliuliu, kei na qasenivuli era vakatotomuria na ivakarau ni nona veivakavulici na Yalotabu, era na vulica vakatotolo sara ni veivakavulici dina e levu cake sara mai na vosa walega kei na italanoa. Ena yaco, ni ra na dau cegu ka vakarorogo ena so na gauna, vakadidike toka vakamalua, ka qai lewa na ka e tarava me vakayacori.6 Ni ra vakayacora oqori, sa na toka kina na Yalo Tabu ena dua na vanua me vakavulici rau ruarua o koya e vuli kei qasenivuli ena veika me rau cakava ka tukuna.7
Karua, e dau veivakavulici na Yalo Tabu ena veisureti, veivakauqeti, veivakayaloqaqataki, ka vakayavalati keda me da cakacaka. Sa vakadeitaka vei keda na Karisito ni na yaco meda kila na dina ni vunau ena noda cakacakataka.8 Na Yalo Tabu ena liutaki keda, tuberi keda, ka vakaraitaka vei keda na veika me da cakava.9 Ena sega ni cakava vei keda na ka eda rawa walega ni cakava vakai keda ga. Eda raica, ni Yalo Tabu e sega ni rawa ni vuli ena vukuda, vakila ena vukuda, se cakacaka ena vukuda baleta oqori ena veisaqasaqa ki na ivunau ni galala ni digidigi. E rawa ni vakavuna na madigi ka sureti keda me da vuli, vakila, ka cakacakataka.
O ira era dau veivakavulici ena veivakauqeti oqo ni Yalotabu era na vukei ira na tani ena nodra veisureti, veivakayaloqaqataki, ka vakarautaka vei ira na madigi me ra vakayagataka kina na nodra galala ni digidigi. Era kila na itubutubu, iliuliu, kei ira na qasenivuli ni sega ni rawa ni ra vakila ena vukudra, vuli ena vukudra, se veivutuni sara mada ga ena vukudra na nodra matavuvale, ivavakoso, se lewe ni kalasi. Era sega ni taroga, “Na cava e rawa niu cakava ena vukudratou na luvequ, lewe ni kalasi, se so tale?” mera taroga rawa kina, “Au na vukei ira vakacava era tu wavoliti au me ra vulica ga vakataki ira?” O ira na itubutubu era vakatotomuria na cakacaka ni Yalo Tabu era na tauyavutaka na veivale era na vulica kina na lewe ni matavuvale me ra dau vakabibitaka na veika ka sega ni vulica walega na bibi ni veika. Ena sala vata oqori, mai kena veivosataki tiko ni ivunau era na veivuke na qasenivuli vei ira na gonevuli me ra kila ka bulataka na ivunau va kosipeli. Ena sega ni vakasosataki na Yalo Tabu ni ra vakayagataka vakadodonu na tamata na nodra galala ni digidigi.
Ena ituvaki e tu kina na vuravura oqo, eda gadreva sara kina vakalevu na vuli dina kei na veivakavulici ena noda veivale, veisoqoni, kei na kalasi ni kosipeli. Au kila ni nomuni sasaga mo ni vakavinakataka ena veivakadrukai beka ena so na gauna. Ni yalovinaka ka kakua ni vakayalolailaitaki ena veika o ni rawata. Au dau nanuma lesu na veika au a sotava ena kaba ulunivanua kei rau na luvequ. Keitou duavata ena veigauna kece keitou cegu kina, keitou sega ni dau vakanamata tiko ga ki na vanua sa vo me keitou kabata, keitou na dau vuki ka raica sobu na ulunivanua. Keitou dau raica na irairai ni vanua ka kaya, “Raica na vanua tou sa lakova mai.” Keitou na qai cegu, vuki cake vakatotolo ka qai tekivu kaba tale dua na ikalawa ena dua na gauna. Kemuni na taciqu kei na ganequ, e rawa ni o ni itubutubu, iliuliu, ka veivakavulici ena veivakauqeti kei na cakacaka ni Yalotabu. Au kila o ni rawa ni cakava oqo. Au vakadinadinataka ni rawa mo ni cakava oqo ni na veisau kina na bula.
Sa vakalougatataki na noqu bula mai vei ira na qasenivuli dina, ka ra dau veivakavulici ena Yalotabu. Au sureti kemuni mo ni vakamuria ena ivakarau ni nomuni veivakavulici na veivakauqeti ni Yalo Tabu ena veika kece o ni cakava. Au vakadinadinataka ni o Jisu Karisito na noda iVakabula ka ni sa vakalesui mai na Nona kosipeli. Ena vuku ni tikina oqo sa dodonu me da itubutubu dina, iliuliu dina, qasenivuli dina, ka gonevuli dina. Au vakadinadinataka ni na vukei kemuni na Kalou ena nomuni sasaga, ena yaca tabu ni noda iVakabula, o Jisu Karisito, emeni.