Na Madigi ni Masu
Na masu sai koya e dua vei ira na isolisoli vakamareqeti ni Kalou vua na tamata.
Kemuni na ganequ kei na taciqu lomani, e sega ni dua na ka me vakilai se dua na vakasama se dua na kaukauwa na Kalou, na Tamada. O Koya e dua na tamata vakalou, me vaka e vakatavulica tiko na ivolanikalou, ni tiko na matana kei na ligana, ka vakakina na yagona lagilagi tawavucarawa. E bula dina tiko; e kilai keda vakayadudua o Koya; ka lomani keda, vakayadudua sara. E gadreva o Koya me vakalougatataki keda.
E kaya o Jisu:
“Se ko cei mada vei kemudou, kevaka e kere madrai na luvena, ena solia vua e dua na vatu?
“Se kere ika, ena solia vua e dua na gata?
“Ia kevaka dou sa kila koi kemudou na tamata ivalavala ca, mo dou solia na ka vinaka vei ira na luvemudou, sa na gu vakalevu cake, me solia na veika vinaka na Tamamudou mai lomalagi vei ira sa kerekere vua?” (Maciu 7:9–11).
Ena vinaka beka meu vakamatatataka na ivakavuvuli oqo mai na dua na ka au a sotava. Niu a se qai vuniwai vou tiko ena Valenibula ni Gone e Boston, au dau cakacaka ka bogi kau dau vodo basikeli ga mai valenibula ki vale e Watertown, mai Massachusetts, baleta ni ratou dau vakayagataka na motoka o watiqu kei iratou na noqu matavuvale gone. E dua na yakavi niu vodo basikeli tiko yani i vale ni oti e dua na siga osooso e valenibula, kau sa wale ka viakana ka vaka meu yalolailai talega vakalailai. Kau kila tu ni sega walega meu na solia vei watiqu kei na va na luvequ na noqu gauna kei na kaukauwa niu yaco i vale ia meu marau tale tiko ga yani. Meu kaya dina eke, ni sa dredre sara tiko vei au na butuka tiko na yavani basikeli.
Ena ilakolako oqo au na dau lako sivita tiko e dua na sitoa volitaki toa vavi, kau dau nanuma ni na vakalailaitaka na noqu via kana kei na wawale keu cegu mada la vakalailai ka dua mada na tiki ni toa meu qai lesu i vale. Au kila ni ratou volitaka tiko ena 29 na sede na sagana kei na temo ni toa, ia niu raica na noqu baosi, a tu ga kina e lima na sede. Niu sa toso tiko, au sa tukuna vua na Turaga na ka sa yaco, ka kerea, ena Nona loloma veivueti, meu kunea mada ga e 25 na sede e gaunisala. Au a tukuna Vua niu sega ni gadreva oqo me ivakatakilakila ia au na vakavinavinaka vakalevu kevaka sa lomana me solia mai vei au na veivakalougatataki vinaka oqo.
Au sa tekivu rai sara tiko vagumatua e ra kau sega ni raica e dua na ka. Au sa saga me dei tikoga na noqu vakabauta niu vodo tiko yani, kau sa yaco sara ena sitoa. Ia, volekata ena tai kadua mai na vanua ni kana, au raica sara e ra e 25 na sede. Ena vakavinavinaka kei na vakacegu, au tomika sara, volia na toa, kau kania taucoko, ka vodo lesu i vale ena marau.
Ena Nona loloma veivueti, sa mai rogoca e dua na masu baleta e dua na ka lailai, na Kalou ni lomalagi, na Dauniveibuli ka Daunilewa ni veika kecega ena veivanua kecega. Ena vakataroga beka na tamata na vuna me kauwai mai kina o Koya ki na dua na ka lailai sara. Au sa mai vakabauta kina ni sa dau lomani keda vakalevu na Tamada Vakalomalagi ni veika e bibi vei keda sa ka bibi talega Vua, baleta ga ni lomani keda o Koya. Sa na qai vakacava na levu ni nona via vukei keda ni da kerea na veika lelevu, ka ra ka dodonu (raica na 3 Nifai 18:20)?
Kemuni na gone lalai, itabagone, kei kemuni talega na qase, yalovinaka mo ni vakabauta ni sa ka levu na nona gadreva na Tamamuni Vakalomalagi daulomani me vakalougatataki kemuni. Ia ena vuku ga ni na sega ni vakacacana na noda digidigi, e dodonu meda kerea na Nona veivuke. Oqo ena dau vakayacori ga ena masu. Na masu sai koya e dua vei ira na isolisoli vakamareqeti ni Kalou vua na tamata.
Ena dua na gauna, era taroga vakaoqo na tisaipeli i Jisu, “Kemuni na Turaga, mo ni vakavulici keimami me keimami masu” (Luke 11:1). Ena nona sauma, a solia kina o Jisu e dua na ivakaraitaki ena rawa ni idusidusi ki na iusutu ni ivakavuvuli ni masu (raica na Russell M. Nelson, “Lesoni mai na Masu ni Turaga,” Liaona, Me 2009, 46–49; raica talega na Maciu 6:9–13; Luke 11:1–4). Me vaka na ivakaraitaki i Jisu:
Eda na tekivu ni da vosa vua na Tamada Vakalomalagi: “Tamai keimami mai lomalagi” (Maciu 6:9; Luke 11:2). Sa noda madigi meda vosa sara ga vakadodonu vua na Tamada. Eda sega ni masu vua e dua tale na tamata. Me nanumi tiko ni da sa vakasalataki meda kakua ni vosabalavu, oka kina na kena cavuti tiko vakawasoma na yaca ni Tamada ena gauna ni masu.1
“Me vakarokorokotaki na yacamuni” (Maciu 6:9; Luke 11:2). A cavuta o Jisu na yaca i Tamana ena ivakarau ni sokalou, kila tiko na Nona cecere ka vakacaucautaki Koya ena vakavinavinaka. Sa dina sara ni vakarokorokotaki na Kalou ka yalodina sara ena vakavinavinaka sa dua vei ira na idola me mana kina na masu.
“Me yaco na nomuni lewa. Me caka na lomamuni” (Maciu 6:10; Luke 11:2). Eda tukuna ena galala na noda vakararavi tiko vua na Turaga ka vakaraitaka na noda gagadre meda vakayacora na Nona lewa, ke sega mada ga ni vaka na noda lewa. E vakamacalataka na noda Bible Dictionary: “Na masu sai koya na kena tau na lewa nei Tamada kei na lewa nei luvena ena dua na mataveivosaki vakai rau. Na inaki ni masu e sega ni mai veisautaka na lewa ni Kalou, ia me tau mai vei keda kei na so tale na veivakalougatataki sa gadreva tu mai na Kalou me solia, ia sa lavaki kina eso na ka ni da sa kerea vakakina” (Bible Dictionary, “Prayer”).
“Solia mai vei keimami ena siga oqo na kakana e yaga vei keimami” (Maciu 6:11; raica talega na Luke 11:3). Eda na kerea na veika eda vinakata mai vua na Turaga. Na dina sa gadrevi sara ni da kerekere vua na Kalou. Ena sega toka ni ka dina, kena ivakaraitaki, keda kerea na veivuke ni Turaga meda vukei ena veitarogi e koronivuli kevaka au a sega tiko ni vakarorogo ena kalasi, vuli lesoni e vale, se vuli baleta na veitarogi. Vakavuqa, niu dau masu, e dau vakayadrati au na Yalotabu meu vakadeitaka ni levu cake sara na ka au rawa ni cakava mada ga vakai au meu rawata kina na veika au kerea tiko vua na Turaga. Meu sa qai yalodina kina ka cakava na noqu itavi. Sa veisaqasaqa kei na ituvatuva ni Kalou me cakava vei keda na Turaga na veika eda rawa ni cakava rawa vakai keda.
“Ia kakua ni cudruvi keimami ena vuku ni neimami valavala ca” (Maciu 6:12), se, dua tale na kena ibalebale, “Ni vosota na neimami valavala ca” (Luke 11:4). E dua na tiki bibi ni masu yadudua ka dau guilecavi ena so na gauna o ya na veivutuni. Ni gadrevi me mana na veivutuni, e dodonu me matata, titobu, ka tudei.
“Keimami sa sega talega ni cudruva e dua” (Maciu 6:12; raica talega na Luke 11:4). Sa semata vakamatata sara na iVakabula na kena vosoti na noda ivalavala ca kei na noda vosoti ira na tamata era caka cala vei keda. Eso na gauna e rui veivakararawataki vakalevu sara na nodra caka cala vei keda eso, ka dredre sara meda vosoti ira se guilecava. Au sa vakavinavinaka vakalevu ki na veivakacegui kei na veivakabulai au raica ena nona veisureti tiko na Turaga meda biuta tani na noda mosi ka vagolea Vua. Ena Vunau kei na Veiyalayalati, wase 64, e kaya kina o Koya:
“Ia koi au na Turaga, au na vosoti ira ga kau sa lewa, ia koi kemudou sa kililiki mo dou vosota na tamata kecega.
“Ia sa kilikili talega mo dou kaya e lomamudou—me lewa mada vei kedaru na Kalou, ka sauma vei iko na nomu ivalavala” (tikina e 10–11).
Meda sa qai guilecava vakadua na ka o ya, ka laiva vua na Turaga me qai lewa, kevaka eda gadreva meda vakabulai.
“Ia kakua ni kauti keimami ki na vere, ka mo ni vakabulai keimami mai na ca” (Maciu 6:13, vakamacala e botona a; mai na iVakadewa i Josefa Simici, Maciu 6:14; raica talega na Luke 11:4, ivakamacala e botona c; mai na iVakadewa i Josefa Simici). O koya gona, ni da sa masu sa rawa meda tekivu tataqomaki ena noda vakaiyaragitaki keda ena iyaragi kecega ni Kalou (raica na Efeso 6:11; V&V 27:15) ena noda kakavaki tiko yani ki na siga ni mataka ka kerea na veivuke ni da sotava na veika rerevaki. Ni yalovinaka, na noqu itokani, kakua ni guilecava mo ni kerea vua na Turaga me taqomaki kemuni ka tiko ga kei kemuni.
“Ni sa nomuni na lewa, kei na kaukauwa, kei na vakarokoroko, ka sega ni mudu” (Maciu 6:13). E veivakararamataki ni sa mai tinia o Jisu na nona masu ena nona vakacaucautaka tale na Kalou ka tukuna na Nona rokova ka talairawarawa vei Tamana. Ena gauna eda sa vakabauta dina kina ni Kalou sa lewa na Nona matanitu ka sa tu Vua na kaukauwa kei na lagilagi kecega, eda sa na kila kina ni sa vakatulewa dina tiko o Koya, ni sa lomani keda tiko o Koya ena dua na loloma sa uasivi duadua, ka sa gadreva o Koya meda bula marau. Au sa raica kina ni dua vei ira na ka-vuni ki na bula rekitaki o ya meu kila tiko ni noda vakayaco-ka ena ivakarau ni Turaga ena vakamarautaki au vakalevu cake mai na noqu cakava vakataki au.
E tiko e dua na rivarivabi me dua e nanuma ni sega ni kilikili vua me masu. Na vakasama oqo e lako mai na yalo butobuto o ya, o koya e vakavulica tiko meda kakua ni masu (raica na 2 Nifai 32:8). Sa qai ka vakarerevaki talega meda nanuma ni da sa ivalavala ca vakalevu ka meda sa kakua ni masu me vaka e dua na tamata sa vakabauta ni sa tauvimate vakasivia me sega ni gole rawa vei vuniwai!
Meda kakua ni nanuma ni dua ga na masu sa rawa, se vakacava sara na kena dina, ena mana vakalevu kevaka meda cabora tu ga yani. Meda kakua ni cavuta wale tu ga na noda masu, meda bulataka sara tale tikoga. Ena yalovinaka cake vakalevu na Turaga vua e dua e masu ka qai cakava sara mai vua e dua e masu wale tikoga. Sa vaka kina na wainimate, ena mana walega na masu ni da vakayagataka ena kena ivakarau.
Niu kaya ni masu e dua na madigi kamikamica, e sega walega ni baleta niu vakavinavinakataka niu rawa ni veivosaki tiko kei Tamada Vakalomalagi ka vakila na Nona Yalotabu niu masu. Sa baleta talega ni sa dau sauma mai ka vosa vei keda o Koya. E dina sara, na sala e dau vosa kina vei keda e sega ni vaka na voqa eda dau rogoca. E vakamacalataka kina o Peresitedi Boyd K Packer: “Ni yaco mai na domo kamica ka malumu o ya ena vakilai ka sega ni vaka me na rorogo. Na vuku makare sese ena rawa ni vakadewataki kina ki na vakasama. Na veituberi oqo ena yaco mai me vaka na vakasama, na ka e vakilai, ena veivakauqeti kei na vakanananu” (“Masu kei na Veivakauqeti,” Liaona, Nove. 2009, 44).
Eso na gauna e sega ni saumi mai na noda masu yalodina ka veivakauqeti. E taura na vakabauta meda nanuma tiko ni na sauma mai na Turaga ena Nona sala mena vakalougatataki keda kina. Se, dua tale na kena vakasama, eda na dau kila tiko ni da sa kila vakavinaka oti tu na veika meda na cakava.
Yalovinaka ni kakua ni yalolailai kevaka e sega ni yaco oqo vei kemuni ena dua ga na gauna. Me vaka ni da vulica e dua na vosa ni vanua tani, o ya me vakamatautaki ka sasagataki. Yalovinaka mo ni kila tiko, ni dina, ni ko ni rawa mo ni vulica na vosa ni Yalotabu, ni sa rawa oqo, ena solia vei kemuni e dua na vakabauta cecere ka kaukauwa ena ivalavala dodonu.
Au vakamareqeta na ivakasala ni noda parofita lomani, o Peresitedi Thomas S. Monson, ena nona kaya: “Oi kemuni ko ni rogoca tiko na noqu vosa oqo ko ni sotava tiko na bolebole kei na dredre lelevu ka lalai, na masu ena vakarautaka na kaukauwa vakayalo; o ya na pasipote ki na bula vakacegu. Na masu sa sala ni noda veivosaki kei na Tamada Vakalomalagi, sa dau lomani keda.Vosa Vua ena masu ka qai vakarogoca na kena isau. Na cakamana e rawa mai na masumasu” (“Mo Kemu iTuvaki Uasivi Duadua,” Liaona, Me 2009, 68).
Au sa vakavinavinaka vakalevu ki na madigi meu gole vua na Tamaqu Vakalomalagi savasava ena masu. Au sa vakavinavinaka ki na vuqa na gauna sa rogoca ka sauma mai noqu masu o Koya. Baleta ga ni sauma mai na noqu masu, vakakina ena gauna eso ena sala sa namaki ka mana talega, kau kila kina ni bula tiko o Koya. Au sa vakadinadinataka talega ena yalomalumalumu ni o Jisu, na Luvena tabu, sa noda iVakabula ka bula tiko. Oqo na Nona Lotu kei na matanitu e vuravura; ka sa dina na cakacaka oqo. Sa Nona parofita, o Thomas S. Monson, eda sa dau masulaki koya vagumatua; kau sa vakadinadinataka na veika oqo ena noqu kila ni dina taucoko, ena yaca i Jisu Karisito, emeni.