Ko ha Lotu ke Maluʻi
“[ʻOku ou lea ki he Tamai Hēvaní. ʻOkú Ne fanongo mo tali mai ʻeku lotu ʻi he tuí]” (“I Pray in Faith,” Children’s Songbook, 14).
ʻOku ou saiʻia ʻi natula! ʻOku ou saiʻia he fanongo ki he hiva ʻa e manupuna, hono puhi ʻe he havilí e lauʻi ʻakaú, mo e ongo ʻo e tahí.
ʻOku faʻa ō homau fāmilí mo ha ngaahi fāmili kehe ki matātahi. ʻOku volipolo e ngaahi tamaí, pea nofo ʻa e ngaahi faʻeé he lalo fakamalú ʻo vaʻinga mo e fānau iiki angé.
ʻI he hoʻatā ʻe taha ne u fiefia lahi ʻi heʻemau aʻu atu ki tahí! Naʻe nonga e peaú, pea ʻi ai e fanga kiʻi anoano ʻi he matā ʻoneʻoné. Naʻá ku lele ki tahi. Naʻá ku fie kakau hangē ha iká mo tānaki ngeʻesi fingota.
Naʻe ui mai ʻeku faʻeé lolotonga ʻene tānaki mai e fānau īkí ki he malumalu ʻo e fakamalú, “Sueli, nofo ofi mai pē!”
“ʻIo, fineʻeiki” ko au ange ia mo mono hifo hoku louhiʻi vaʻé he ʻoneʻone vivikú.
Naʻá ku kumi ngeʻesi fingota mo fakasio e fanga kiʻi manu ʻi he ngaahi luo ne ʻi ai e tahi he veʻe ʻoneʻoné. ʻI heʻeku homo hifo he taha ʻo e ngaahi luo ko ʻení, ne u sio ki mui ki hoku fāmilí. Ne u sio atu ki he mamaʻo ʻa e ʻū fakamalú. Naʻá ku ʻiloʻi naʻe fuʻu mamaʻo ʻeku ʻalú. Ne u feinga ke u kakau ʻo foki ki he ʻoneʻoné ka kuo huʻa e tahí. Naʻe fakaʻau ke loloto ange ʻa e tahí ʻi heʻeku feinga ke mavahe mei aí.
Naʻe kamata ke u helaʻia, pea naʻá ku ʻiloʻi ʻa e fakatuʻutāmaki naʻá ku ʻi aí. Ko e meʻa pē ne u fakakaukau ki aí ke tokoni mai e Tamai Hēvaní. Naʻá ku lotu loto pē. ʻI he ʻosi pē ʻeku lotú, ne ala mai ha nima ʻo fusi hake au ʻo u hao. Ko ha taha ʻeni ʻo e ngaahi kaungāmeʻa ʻo ʻeku tamaí. ʻOku ou fakamālō ki he Tamai Hēvaní ʻi Heʻene tali ʻeku lotú pea ala mai Hono toʻukupú ʻaki ʻEne fekau ha taha ke haʻu ʻo tokoniʻi au.
ʻI he taimi hono hoko ne mau ʻaʻahi ai ki tahí, naʻá ku nofo ofi pē ki hoku fāmilí, ʻo hangē ko e lava ke u nofo ofi ki he Tamai Hēvaní ʻo fakafou ʻi he lotú.
Tā fakatātaaʻi ʻe Roger Motzkus