Mei he Malaʻe Ngāue Fakafaifekaú
Ko ha Faiʻanga Papitaiso Ne ʻIkai ʻI ai ha Vai
Te tau lava fēfē ʻo fakahoko ha papitaiso kapau ʻoku ʻikai ha vai ʻi he faiʻanga papitaisó?
Ko e taimi 7:45 pongipongí ia ʻi heni ʻi Filītauni ʻi Siela Lione, ʻAfilika Hihifo, ʻi ha pongipongi ʻuhoʻuha ʻi ʻAokosi. Ne mau palani (ʻa e kau faifekau taimi kakato ʻi he Vahefonua Filītauní) ke fai ʻemau ouau papitaiso, pea ne mau fakapapauʻi ʻe fakahoko ʻeni ʻo tatau ai pē pe ʻe ʻuha pe laʻā. Ne u maʻu he taimi ko iá ha telefoni meia Misa ʻAliu, ko ha mēmipa mei homau koló, ka naʻe ʻikai mahino kakato kiate au ʻene leá he naʻe fuʻu vave ʻene lea faka-Kalió, ʻa e lea homau feituʻú. Ne u talaange ke ʻai haʻane fuʻu mānava lahi pea lea māmālie ange. Naʻá ne fai ʻeni peá ne pehē mai, “ʻE ʻEletā Naeata, kātaki ka ʻoku ʻikai ke ʻi ai ha vai.”
Ne u fakamālō ange heʻene tā maí peá u fakahoko e ongoongo fakamamahí ki he kau ʻeletā kehé. Naʻe kamata leva ke mau fakakaukauʻi ha founga ʻe kei lava ai pē ke mau fakahoko e ouau toputapú ni. Naʻe fakamanatuʻi mai leva ʻe ʻEletā ʻAkama ʻa e kiʻi vaitō mo e ano ʻi he moʻunga ofi mai ʻi he feituʻu naʻe ui ko Mēlou. Ne loto kotoa e kau ʻeletaá ke mau ʻahiʻahi pea fakahoko ai e papí, ko ia ne mau maʻu ha ngofua ke fakahoko ia.
ʻI he fakatahataha mai e tokotaha kotoa ki he tafaʻaki moʻunga ki laló he pongipongi ko iá, ne nau fakatokangaʻi ʻa e fuʻu ngāue lahi ʻoku hanga mei muʻá. Neongo ia, ne fakapapauʻi ʻe he kulupú te nau ʻalu, ko ia naʻe ʻikai ha momou ʻe taha. Naʻe lue lalo mo talanoa fiefia ʻa e kakai tangata mo fefine ʻo aʻu ki he fānaú ʻi heʻenau kaka hake ʻi he hala viviku mo hekeheké. Ne mau kaka māmālie hake ʻo hala tuʻusi he vaitafé.
ʻI heʻemau lué, ne kamata ke mole atu ʻa e vēkeveke ʻa ha niʻihi ʻi he kulupú he kamata ke toe lahi ange e ʻuhá, ka ne mau hoko atu pē mo e ʻamanaki lelei. Kae hangē ia he ʻikai toe ngata e hala tokakoví. Naʻe faifai pea mau aʻu. Naʻe fiefia homau lotó, kae kei haʻaki hifo pē e ʻuhá. Naʻa mau toitoi mei he ʻuha ʻi ha fuʻu lalo mango ʻi heʻemau teuteu ki he papitaisó.
Ne mau kamata ʻaki hono hivaʻi e himi “Ko e Laumālie ʻo e ʻOtuá” (Ngaahi Himi, fika 2). Hili e polokalama kamatá, ne mau ō ki he feituʻu ʻe fakahoko ai e papitaisó. Naʻe tafe hifo ʻa e vaí mei he vaitoó ki he ano te mau fakahoko ai e ouau toputapú.
Ne hifo ha tamai ki he anó ʻo tokoniʻi hifo hono foha ki he vaí mo e tuʻu fakafokifā ʻa e ʻuhá. Ne ulo hifo e huelo ʻo e laʻaá he vahaʻa ʻo e ngaahi ʻaó ʻo fakamāmaʻi e anó. Ne lava ke mau ongoʻi ʻa e ʻi ai ʻa e Laumālié. Hili hono papitaiso ʻe he tamaí hono fohá, ne papitaiso ʻe ha husepāniti hono uaifí, pea toki papitaiso ʻe he kau faifekaú ʻenau kau fiefanongó. Ne kei hokohoko atu pē ulo ʻa e laʻaá, pea pehē ki heʻemau malimalí.
Ne fakaʻosi ʻaki ʻemau ouaú hono hivaʻi ʻo e “Muimui ʻIate Aú” (Ngaahi Himi, fika 57). ʻIo, ko e moʻoni ne mau muimui ʻiate Ia. Naʻa mau muimui hake mo muimui hifo ʻi homau Fakamoʻuí mei he moʻungá, kolosi ʻi he ngaahi vaitafé, muimui hake ʻi he ngaahi hala tahake mo vivikú, pea ʻi he ʻuhá. Pea naʻe muimui moʻoni ʻa kinautolu naʻe papitaisó ʻi he sīpinga ʻa e Fakamoʻuí ʻi heʻenau ʻalu hifo ʻi he vai ʻo e papitaisó.
Tā fakatātaaʻi ʻe Allan Garns