ʻOku Talitali Lelei Koe ʻi Hoku Falé

Kalina Taniela Pasi, Salita, ʻĀsenitina

Naʻe uiuiʻi au ʻi Nōvema ʻo e 1997 ke u ngāue ʻi he Misiona Silei Konisepisioní pea naʻe vave pē ha hoko ʻeku fakaʻānaua ke u hū he temipalé ʻo maʻu ha maama mo ha ʻilo ʻoku lahi angé. Ka ne kamata ke haʻu e veiveiuá kiate au. Ne taau moʻoni nai ʻeku moʻuí ke u hū ki ai, he ko ha taha vaivai mo taʻehaohaoa au? ʻE talitali lelei nai au ʻe he ʻEikí neongo e ngaahi taimi kuó u fakatupu houhau ai kiate Iá?

Ne u talanoa mo ʻeku palesiteni fakasiteikí ki heʻeku veiveiua ko eni, pea naʻá ne tokoni mai ke mahino kiate au kapau kuo fokotuʻutuʻu maau ʻeku moʻuí peá u feinga moʻoni ke fai kotoa e ngaahi meʻa ne akonekina ai aú, ʻoku ou taau ke hū ki he fale ʻo e ʻEikí. Ne u ongoʻi fiemālie ange, peá u mavahe atu leva ki he senitā akoʻanga ʻo e kau faifekaú ʻi Senitiako, ʻi Silei. Neongo ia, ne toe foki mai pē ʻa e loto veiveiuá ʻi ha ngaahi houa siʻi kimuʻa peá u ʻalu ki he temipalé.

Ne lahi fau ʻa e fakaʻofoʻofa mo e melino ʻi loto he temipalé, pea ko e fuoloa ange ʻeku ʻi aí, ko e lahi ange ai pē ia ʻeku fifili pe naʻe taau nai ke u ʻi ai. Hangē naʻe fiefia ʻa e tokotaha kotoa pē ʻi heʻemau ʻi he loki silesitialé, tuku kehe pē au. Ka ʻi heʻeku ala ki he kau ʻo e matapaá ke u hū ki tuʻá, ne ʻalu hake ʻiate au ha faʻahinga ongo kehe, peá u ongoʻi naʻe totonu ke u nofo he lokí. Ne u ongoʻi foki hangē naʻe ʻi ai ha taha ʻi hoku tuʻá, naʻá ne ala mai ki hoku uma toʻohemá ʻo fakatafoki atu au. Ne u tafoki māmālie hake.

Ne u vakai atu ki he holisí ki ha tāvaliali ʻo Sīsū Kalaisi ʻi Heʻene Hāʻele ʻAngaua Maí ʻoku fakamafao mai Hono ongo toʻukupú. Naʻe ʻikai ke u lava ʻo ngaue. Ne u ongoʻi lelei e ngaahi lea ko ʻení ʻi hoku ʻatamaí: “ʻOku talitali lelei koe ʻi hoku falé.”

Ne mafola atu ʻi hoku sinó kotoa ha ongo māfana, pea kamata ke lelenoa pē hoku loʻimatá. Ko e meʻa pē naʻe lava ke u fakakaukau ki aí ko e “Mālō.”

Ne u tangi ʻi ha ngaahi miniti siʻi. Naʻe fonu mahuohua hoku lotó ʻi he fakafetaʻi ki hoku Fakamoʻuí. Ne u kei ongoʻi pē ʻeku vaivai mo taʻehaohaoá, ka ne u ʻiloʻi naʻá Ne ʻofa ʻiate au pea te Ne fakamālohia au.

Kuo ʻosi atu ha ngaahi taʻu lahi mei he meʻa ko ia naʻe hokó, ka ʻi he taimi kotoa pē ʻoku ou ʻalu ai ki he temipalé, ʻoku foki mai ʻa e fiefia ʻo e ʻaho ko iá, pehē ki he ngaahi lea fakafiemālie ko ʻení: “ʻOku talitali lelei koe ʻi hoku falé.”