Ko ha Leʻo maʻá e Ngaahi Tuʻunga Moʻui Māʻolungá
Ngaahi maama ulo lahí. Kaikaila e kakaí. Toko lauiafe e kakai ʻi he Facebook ʻoku nau poupou kiate iá. ʻI he taimi ne kau ai ʻa e talavou taʻu 17 ko ʻeni ko Kēsoni Sanitosí ʻi he toko 10 ke tāpepa fakaʻosi ʻi he feʻauhi talēniti hiva ko e Ídolos, naʻe fie maʻu ke ne fakafeʻungaʻi ʻene moʻuí mo e ongoongoa pea mo e ʻiloa naʻe ō fakataha mo ʻene lavameʻá. Naʻe fakakaukau ʻa Kēsoni ke ne fakaʻaongaʻi ʻa e faingamālie laulōtaha ko ʻení ke malanga ʻaki e ongoongoleleí pea naʻe ʻikai hano taimi kuo ʻiloa ia ʻi he mītia ʻi Potukalí ko e “tama feʻauhi Māmongá” naʻe loto ke ne tali e ngaahi fehuʻi fekauʻaki mo ʻene tui fakalotú.
Naʻe anga fēfē hoʻo fili ke ke kau ʻi he Ídolos? Naʻe anga fēfē hoʻo teuteu ki aí?
Ko e Ídolos ko ha polokalama televīsone ia ne u manako ʻaupito he sio aí. Ne u saiʻia maʻu pē he hivá pea ne u fakaʻānaua ki ha ʻaho ke u kau ai ʻi he feʻauhi hiva. Ne ʻikai ke u toe tatali he taʻú ni; naʻá ku fakamoʻoni hoku hingoá ke u kau peá u ʻalu mo ʻeku tamaí ki hono siviʻi kinautolu ʻe kaú. Mahalo ʻe lava pē ke mou pehē ne u ʻosi teuteu pē au ʻi heʻeku moʻuí kotoa ki he Ídolos. Naʻe fakaofo e taimi kotoa pē ne u kau ai ki he Ídolos, ʻo ʻikai toe kehe ha taimi. Ne u feinga ke fakaʻaongaʻi ʻa e faingamālie kotoa pē ne u maʻu.
Ko e hā ha ngaahi faingamālie ngāue fakafaifekau naʻá ke maʻu lolotonga e feʻauhí?
Lolotonga ʻemau maʻu meʻatokoni efiafi mo e kau feʻauhi kehé, naʻa mau kiʻi talanoa lotu, peá u fakamatala leva ki heʻeku tuí mo e ngaahi tuʻunga moʻui ʻo e Siasí. Ne u ʻoange ki mui ha tatau ʻo e kiʻi tohitufa ko e Ki Hono Fakamālohia ʻo e Toʻu Tupú ke taki taha e kau feʻauhi fakaʻosí koeʻuhí ke toe mahino lelei ange kiate kinautolu ʻa e meʻa ʻoku ou tui ki aí. Naʻe pehē ʻe ha niʻihi ʻoku fuʻu fakakuonga motuʻa ʻaupito e ngaahi tuʻunga moʻui ʻo e Siasí, kae fakahīkihikiʻi au ʻe ha niʻihi ko ʻeku maʻu ha ngaahi tuʻunga moʻui pehē ʻi he ngaahi ʻahó ni.
Pau pē naʻe lahi ho taimi naʻe fakamoleki ki he Ídolos. Naʻe anga fēfē hoʻo kei maʻu taimi ki he ngaahi fatongia faka-Siasí?
Ne kei hokohoko atu pē hono fai ʻeku lotú, lau ʻeku folofolá, kau ʻi he seminelí, mo maʻu ʻa e sākalamēnití ʻi he Sāpate kotoa pē. ʻOku ou lolotonga teuteú ni ke u ʻalu ʻo ngāue fakafaifekau, ʻa ia ko ha meʻa ne u loto ke u fai talu ʻeku kei siʻi. ʻOku ou hoko ko e tokotaha tā piano ʻa e uōtí, faifekau fakauooti, mo e ʻasisiteni ki he pīsopé ʻi he kōlomu ʻo e kau taulaʻeikí. Naʻe fie maʻu ke u fakamoleki ʻa e meimei kotoa hoku taimí ki he feʻauhí, ka naʻá ku fakapapauʻi ke ʻuluaki fakatapui pē hoku taimí ki he ʻEikí.
Taá ʻi he angalelei ʻa Gerson Santos