Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni.
“Ko e Tokāteline ʻa e Tamaí,” peesi 20: Kamata ʻaki hoʻo kole ki he kau mēmipa ʻo e fāmilí ke nau vahevahe mai ʻa e meʻa ʻoku nau ʻiloʻí kau ki he natula ʻo e Tamai Hēvaní. Aleaʻi e fakamatalá, fakamatalaʻi fakanounou e ngaahi meʻa mahuʻinga ʻi he konga takitaha ʻoku nau ʻomi ha fakakaukau pe ko hai ʻa e ʻOtua ko e Tamaí. Fakakaukau ke fakaʻosi ʻaki hoʻo fakamoʻoni ki he ʻofa ʻa e Tamai Hēvaní mo Hono ʻAlo ko Sīsū Kalaisí.
“Ko Hoʻomou Ngāué ʻEni,” peesi 42: ʻUluakí, lau ʻa e puha ʻoku ui “Ko e Hā ʻe Lava Ke u Faí?” pea fili ha taha ʻo e ngaahi fakakaukau te ne tokoniʻi koe mo ho fāmilí ke mou fai e hisitōlia fakafāmilí mo e ngāue fakatemipalé (vakai foki, lds.org/familyhistoryyouth). Lau e fakamatalá mo ho fāmilí lolotonga e efiafi fakafāmili ʻi ʻapí, pea toki ʻeke ange pe ko e hā e ngaahi tāpuaki ne talaʻofa ʻaki ʻe Sisitā Peki kiate kinautolu ʻoku nau fai e ngāue mahuʻingá ni. Fakahoko e fakakaukau naʻá ke palaní pea fakakaukau ke hokohoko atu e ngāué ni ʻi he ngaahi uike hoko maí.
“Ko e Ngaahi ʻAloʻofa Ongongofua ʻa e ʻEikí,” peesi 48: Lau e talanoa ki he fāmili ʻoku kei iiki ʻenau fānaú ʻa ia ne nau maʻu ha kaati Kilisimasi makehé mo e talanoa ki he taki lakanga fakataulaʻeiki naʻá ne ako ke ʻiloʻi e hingoa ʻo e toʻu tupu ʻi hono siteikí. Kole ki he kau mēmipa ʻo e fāmilí ke nau fakakaukau ki he ngaahi ʻaloʻofa angongofua kuo nau maʻu mei he ʻEikí. Fakakaukau ke fehuʻi ange, “Ko e hā ʻa e ngaahi ʻaloʻofa ongongofua? Ko hai ʻokú ne maʻu e ngaahi ʻaloʻofa ongongofuá? Te ke lava fēfē ʻo fakahā ʻa e loto houngaʻia ʻi he ngaahi ʻaloʻofa ongongofua kuó ke maʻú?” Mahalo te ke fie tānaki atu ki ai e ngaahi tali ʻa ʻEletā Petinā ki he ngaahi fehuʻi ko ʻení mei he fakamatalá.
“Kuo Toʻo e Palakí,” peesi 61: Lau e meʻa ʻoku fai ʻe he fānau ko ʻení mo honau fāmilí ke fakaʻaongaʻi ha mītiá ʻoku leleí. Mahalo te mou fie aleaʻi e founga ʻoku tauhi ʻaki ʻe homou fāmilí ke potupotutatau hono fakaʻaongaʻi ʻa e TV, komipiutá, mo e “taimi tv” kehé. Naʻe lea ʻa ʻEletā ʻIeni S. ʻĀteni ʻo e Kau Fitungofulú ʻi he konifelenisi lahi ʻo ʻOkatopa 2011 ʻo kau ki hono fakaʻaongaʻi fakapotopoto ʻo e ngaahi tekinolosia kehekehé: “Ka neongo e lelei ʻo e ngaahi meʻá ni, he ʻikai lava ke tau tuku ke nau fetongi e ngaahi meʻa ko ia ʻoku mahuʻinga tahá” (“Ko ha Taimi ke Teuteu” Liahona mo e Ensign, Nōvema 2011, 32). Fakakaukau ke fokotuʻu ha ngaahi taumuʻa tatau mo e ngaahi taumuʻa ʻi he fakamatala ko ʻení ke ngaohi homou ʻapí ko ha feituʻu ʻe lava ke nofoʻia ʻe he Laumālié.
Ngaahi Lēsoni ʻo e Sāpaté he Pō Mōnité
Ne u fie maʻu moʻoni ke fai ha lēsoni efiafi fakafāmili lelei ʻi ʻapi ʻi he uike takitaha, ka naʻe faingataʻa maʻu pē kiate au ke fakakaukauʻi ha tefito pea teuteuʻi ha lēsoni.
ʻI ha ʻaho Mōnite ʻe taha ne u fakatokangaʻi hake kuo ngalo ke teuteu ha lēsoni. Ka ne u toki ʻiloʻi ai ʻa e tāpuaki fakapulipuli ʻo e hoko ko ha faiako Palaimelí. Ne toki uiuiʻi au ke u faiako ki he fānau taʻu nimá pea ne u toki akoʻi pē ha lēsoni ʻaneafi. Ne u fakakaukau ke fakaʻaongaʻi ha fakanounou (ke feʻunga mo e taʻu motuʻá) ʻo e meʻa naʻá ku akoʻi he Sāpaté ʻi he Efiafi Fakafāmili ʻi ʻApí. Ne mau talanoa he pō Mōnite ko iá kau ki he talangofuá, pea ne u toe fai ha talanoa ʻe tolu ne u vahevahe he Palaimelí ʻi he ʻaho kimuʻá.
Naʻe hoko hono fakafeʻunga ʻeku lēsoni Palaimelí ke feʻunga mo hoku fāmilí ko ha founga fakaʻofoʻofa ʻaupito ke u lavaʻi ai ʻa ʻeku taumuʻa ke fakahoko he uike takitaha ha lēsoni efiafi fakafāmili ʻi ʻapi kuo teuteuʻi lelei pea ola lelei.
Kilisitina Sēuti, ʻAlesona, USA