Fakatātaaʻi e Ngaahi Talanoa mei he Tohi ʻa Molomoná ʻi he Ngaahi Vitiō Fakamuimuitahá
ʻOku fakatātaaʻi e ngaahi talanoa mei he Tohi ʻa Molomoná ʻi he ngaahi vitiō fakamuimuitaha ʻo e Ngaahi Talanoa ʻo e Tohi ʻa Molomoná, pea ʻoku maʻu atu ia ʻi he lea faka-Kenitoní, faka-Pilitāniá, Falanisē, Siamane, ʻĪtali, Siapani, Kōlea, Menitalini, Potukali, Lūsia, mo e faka-Sipeiní ʻi he konga ʻo e ngaahi talanoa mei he folofolá ʻi he LDS.org.
Naʻe ʻuluaki maʻu ia ʻi he ʻInitanetí ko ha ngaahi ʻata pē naʻe fakahokohoko, pea fakafaivaʻi e ngaahi ʻatá ʻo hangē ha meʻa moʻoní ʻi he founga ʻoku ui ko e parallax. ʻOku kosi e ngaahi ʻīmisí ʻo toʻo pea ʻunuaki holo ia ʻi he laá, pea ʻoku toe fakamānako ange hono muimuiʻi ʻo faitaaʻi ha meʻa ʻoku ngaue, ʻai e meʻa ʻe niʻihi ke hā nenefu, mo ʻunuaki mai ke hā ʻata lahi ange.
ʻOku fakaʻaongaʻi foki he ngaahi vitioó ha ngaahi ongo kuo hiki tatau mo e ngaahi ongo moʻoni ʻo ha meʻa (hangē ko e maná) mo e ngaahi ongo totonu pē.
Naʻe pehē ʻe Peleni Misinga, ko e pule ngāue ʻi he Scriptures Coordination Division (Vaʻa Fakafekauʻaki ʻo e Folofolá) ʻo e Potungāue ki he Nāunau Fakalēsoni ʻa e Siasí, “ʻE tokoni e ngaahi talanoa fakafolofolá ni ki hono tō e tenga ʻo e fakamoʻoní ʻi he loto ʻo e fānaú mo ha niʻihi kehe ʻe mamata ʻi he ngaahi vitiō ko ʻení ʻi hono akoʻi e ngaahi moʻoni ʻo e ongoongoleleí. ʻOku ʻomai ʻe he ngaahi vitioó ha ngaahi taukei te ne poupouʻi e fengāueʻaki maʻu pē mo e folofolá mo akoʻi e ngaahi pōtoʻi ngāue te ne teuteuʻi ʻa kinautolu ʻoku sio he vitioó ki hano toe ako lahi ange ʻo e folofolá.”
ʻOku ʻi he vitiō ko ʻeni kuo fakaleleiʻí ha ngaahi fakamatala ʻoku laka hake he houa ʻe tolú ʻa ia kuo vahevahe ki ha kontga kehekehe ʻe 54, ʻo kamata pē mei he “How We Got the Book of Mormon” (Vahe 1) ki he “The Promise of the Book of Mormon” (Vahe 54).
Ko e ngaahi ʻata ʻi he ngaahi vitioó ni ko ha ngaahi tā fakatātā ia ʻa Jerry Thompson mo Robert T. Barrett. Ne pulusi hokohoko ʻena ngaahi tā fakatātaá ʻi he Friend mo e Liahoná ʻi ha meimei taʻu ʻe hongofulu, ʻo kamata ʻi he 1989, pea toki pulusi fakataha ʻi he 1997 ʻo ui ko e Ngaahi Talanoa mei he Tohi ʻa Molomoná.
ʻE lava foki ke mamata hokohoko (podcasts) ʻa kinautolu ʻoku sio he ngaahi vitiō ʻi he iTunes pe ko ha ngaahi vitiō nounou ʻi he YouTube mo e Roku. ʻE saiʻia foki mo e ngaahi fāmilí ʻi he polokalama “Scripture Stories” ʻi he Mormon Channel, ʻa ia ʻoku laukonga ai ha fānau mo ha taha ʻokú ne tokangaʻi kinautolu mei he ngaahi talanoá, nau aleaʻi, hivaʻi ha ngaahi hiva, pea vahevahe ʻenau ngaahi fakamoʻoní fekauʻaki mo e ngaahi lēsoni ʻi he folofolá.
Ne toki fakatātaaʻi foki e New Testament Stories (Ngaahi Talanoa mei he Fuakava Foʻoú) ʻi ha ngaahi lea fakafonua ʻe 11. ʻOku lava foki ke maʻu kinautolu ʻi he LDS scripture page (peesi ʻo e ngaahi folofola ʻa e LDS), iTunes, mo e Mormon Channel ʻi he YouTube.