Muimui e Kāingalotú ʻi Māmani Kotoa he Faleʻi Fakaepalōfita ke Fakahoko e ʻAho Ngāue Tokoní
Ne fakahā ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, ʻi ʻEpeleli ʻo e 2011 ʻe fakaafeʻi e ngaahi ʻiuniti ʻo e Siasí ʻi he feituʻu kotoa pē ke nau kau ʻi ha ʻaho ngāue tokoni ke fakamanatu e taʻu ʻe 75 ʻo e polokalama uelofea ʻa e Siasí. Naʻe ʻomi tonu e fakaafé ʻi ha tohi ʻa e Kau Palesitenisī ʻUluakí naʻe ʻoatu ki he ngaahi ʻiuniti kotoa pē. Ne vahevahe leva ʻe Palesiteni ʻAealingi ha tefitoʻi moʻoni ʻe fā naʻá ne pehē ne nau tataki ia ʻi he taimi naʻá ne “fie tokoni ai ʻi he founga ʻa e ʻEikí” mo e taimi ne tokoniʻi ai ia ʻe ha niʻihi kehe (vakai, “Ngaahi Faingamālie ke Fai Lelei,” Liahona mo e Ensign, Mē 2011, 22).
ʻI he toenga ʻo e ngaahi māhina ʻo e 2011, naʻe tali ai ʻe he kāingalotú ʻi māmani kotoa ʻa e ui fakaepalōfita ko iá, ʻi ha founga ne hāsino kakato ai e ngaahi tefitoʻi moʻoni ne fakamatala ki ai ʻa Palesiteni ʻAealingí.
Tefitoʻi Moʻoni 1: “ʻOku fiefia ange ʻa e tokotaha kotoa pē mo ongoʻi ʻene fakaʻapaʻapaʻi pē iá ʻi he taimi ʻoku lava ke nau tokonaki ai maʻanautolu mo honau fāmilí pea nau toki tokoni ke tokangaʻi ha niʻihi kehé.”
Naʻe kau ʻi he ngaahi ʻuluaki siteiki ke tali e fakaafe ʻa e Kau Palesitenisī ʻUluakí ke kau ʻi he ʻaho ngāue tokoní ʻa e siteiki Tēvitá ʻi Panamā, ʻa ia naʻá ne fokotuʻutuʻu hano fakaʻaliʻali ʻo e mateuteú maʻá e ngaahi tukui koló. Naʻe fakahoko ʻeni ʻi ʻEpeleli pea naʻe poupouʻi ia ʻe ha ngaahi kautaha lahi, ʻo nau fai ha ngaahi kalasi ako mo fakaʻaliʻali ha ngaahi tefito naʻe fekauʻaki mo e tokonaki mo tauhi ʻo e meʻakaí ʻi ʻapí, ngaahi meʻa fakapaʻanga ʻa e fāmilí, mateuteu ki ha faʻahinga meʻa ʻe hoko fakatuʻupakē, pea mo e moʻui leleí.
Naʻe pehē ʻe ʻItiseli Volatesi Konisālesi ʻa ia ne kau ʻi he ʻaho ngāue tokoní ʻoku ʻikai feʻunga pē ʻetau ʻiloʻi e ngaahi tefitoʻi moʻoni ko ʻení. ʻOku mahuʻinga foki ke tau tokoniʻi e niʻihi kehé ʻaki ʻetau vahevahe ia mo kinautolu.
Naʻá ne pehē, “Ko e tokoni ki he niʻihi kehé ko ha ʻulungāanga mahuʻinga ia ʻo e kau muimui ʻo Sīsū Kalaisí. ʻOku ʻomi ʻe he meʻá ni ha ngaahi faingamālie maʻá e kāingalotu ʻo e Siasí ke foaki honau taimí mo e ngaahi talēnití ke faitāpuekina ai ʻa kinautolu ʻoku faingataʻaʻiá.”
Tefitoʻi Moʻoni 2: “ʻI heʻetau fetakinima ke tokoniʻi e faingataʻaʻiá, ʻoku fetaiaki leva ai ʻe he ʻEikí hotau lotó.”
Ne fakakaukau e kāingalotu ʻo e Kolo ʻAlusá ʻi Tenisēniá ke nau ngāue tokoni ʻi he Fale ko Sengá (Shanga House), ko ha feituʻu ʻoku ako ngāue ai e kakai ʻoku faingataʻaʻia fakaesinó pea akoʻi ai kinautolu ke tokonaki maʻanautolu mo honau fāmilí.
ʻI he ʻaho 20 ʻo ʻAokosi 2011, ne ngāue fakataha ai ha toko 35—ko e kakai lalahi, toʻu tupu, mo e fānau; kāingalotu ʻo e Siasí, kau fiefanongo, mo e kau faifekau—mo ha kakai naʻe faingataʻaʻia fakaesino ʻo ngaohi ha ngaahi ngāue fakameaʻa mo ha ʻū meʻa teuteu ke toki fakatau atu. Ne tokoni foki mo e kau ngāue tokoní ʻi he ngaahi ngāue fakaʻapi hangē ko e fakamaʻá mo e tafí.
Kimuʻa pea mavahe atu e kulupú, ne kole ange e kau kouʻotineita ʻo e Fale ko Sengá ke nau omi ki ha feituʻu ʻe lava ke nau lulululu mo fakamālō ange ai ʻa e kakai ne nau tokoniʻí. Naʻe pehē ʻe Sisitā Sanitulā Laitasi ʻa ia ‘okú ne lolotonga ngāue fakafaifekau mo hono husepāniti ko ʻEletā Lisi Laitasí ʻi he feituʻu ko iá, “Ko ha aʻusia fakamāfana moʻoni ʻeni.” ʻOku fakamatala ʻa Sisitā Laitasi ʻo pehē ko e talu mei ai, ko ʻene sio pē ʻa e kakai mei he Fale ko Sengá ki he kāingalotu ʻo e koló ʻi loto koló, “ʻoku nau fakatokangaʻi kimautolu, taʻataʻalo mai, pea nau tuʻu hifo ke mau talanoa.”
ʻOku fakamahinoʻi mai ʻe Peitieni Lisa, ʻa ia naʻá ne fokotuʻutuʻu e ngāue ʻa e koló ʻi he malumalu ʻo e fakahinohino ʻa e kau taki lakanga fakataulaʻeikí, naʻe ʻikai ngata pē ʻene lelei ʻa e ngāue tokoní maʻanautolu ʻi he Fale ko Sengá ka naʻe toe lelei foki kiate kinautolu naʻa nau fai e tokoní. Naʻá ne pehē, “Naʻe fakatupulaki ʻe he kakaí ha ongoʻi ʻofa ʻaki ʻenau tokoni ki he niʻihi kehé, pea ʻi he lolotonga ʻenau tokoní, naʻa nau ako mei he kakai ʻo e tukui koló ha ngaahi meʻa ne ʻikai ke nau ʻiloʻi kimuʻa. Kuo fakamālohia ʻeku fakamoʻoní ʻe he meʻa ne u fai mo mamata aí—mei he kau mai ʻa e kāingalotú pea mo e tukui koló fakakātoa.”
Tefitoʻi Moʻoni 3: “Fakakau ho fāmilí ʻi he ngāué ke nau lava ʻo ako ke fetauhiʻaki ʻiate kinautolu lolotonga ʻenau tokangaʻi e niʻihi kehé.”
ʻOku ʻiloʻi ʻe he kāingalotu ʻo e Siteiki Koimipā Potukalí ʻoku ʻikai ke fai tuʻo taha pē ʻa e ngāue tokoní. Ko hono moʻoní, ʻoku kau ʻa e siteikí ki ha ngaahi ʻekitivitī lahi ʻi he taʻu takitaha ʻi he malumalu ʻo e Nima Fie Tokoni ʻa e Māmongá. Naʻe kau he ngaahi ʻekitivitī ʻo e taʻu kuo ʻosí ʻa hono fakamaʻa ʻo ha paʻake fakapuleʻanga mo hono ʻave ʻo e fānau Palaimelí ke nau ō ʻo ʻaʻahi ki ha fānau ne nau nofo ʻi he feituʻu ʻoku tauhi ai e fānau paeá. ʻOku pehē ʻe ʻAnapela Soatao Felila ko e talēkita ʻo e fetuʻutaki mo e kakaí ʻi he Siteiki Koimipaá, ʻoku mahuʻinga ke fakakau kotoa e fāmilí ʻi he ngaahi ʻekitivitī ko ʻení mo ha ngaahi ʻekitivitī kehe pē.
ʻOku pehē ʻe Sisitā Soatao, “ʻOku mau faʻa pehē he taimi ʻe niʻihi ʻoku mau tali e kakai māhina ʻe 8 ki he taʻu 88 ke kau mai ki heʻemau ngaahi ngāue tokoní. ʻOku moʻoni ʻaupito pē ia. ʻOku mau mamata ki ha ngaahi faʻē mo ʻenau fānau valevale pea ki ha ngaahi kuitangata ʻoku faingataʻa ʻenau ʻalu holó, ka ʻoku nau maʻu ha fakamoʻoni mālohi mo ha holi ke ngāue maʻá e ʻEikí.”
Tefitoʻi Moʻoni 4: “ʻOku fekauʻi mai ʻe he ʻEikí ʻa e Laumālie Māʻoniʻoní ke tau lava ʻo ʻkumi pea te mou ʻilo’ ʻi hono tokangaʻi ʻo e masivá ʻo hangē pē ko ia ʻokú [Ne fai] ʻi he fekumi ki he moʻoní.”
ʻI hono vahe kia Maikolo Hetisi, ʻa ia ʻokú ne ʻi he fakataha aleaʻanga māʻolunga ʻi he Siteiki Fāmingitoni Niu Mekisikoú, ke fokotuʻutuʻu ha ʻaho ngāue tokoni ʻa e siteikí ko hono tali ʻo e fakaafe ʻa Palesiteni ʻAealingí, naʻá ne fifili pe te nau maʻu mei fē ha ngaahi fakakaukau ke tokoniʻi ʻaki e kakai masiva ʻi honau tukui koló. Naʻá ne fai ha fakataha alēlea mo ʻene kōmití, pea nau kau fakataha mo e kau taki fakasiteiki kehé ʻo fakalotolahiʻi e kāingalotu ʻo e ngaahi siteikí ke vahevahe mai ʻenau ngaahi fakakaukau fekauʻaki mo e ngaahi fie maʻu ʻi he tukui koló.
Naʻe ʻiloʻi ʻe Lōpeta Lousa ha fie maʻu pau ʻi he ngaahi kautaha lahi ʻi honau feituʻú—kau ai ʻa e falemahaki ʻokú ne ngāue ai ʻi he ngaahi vā fetuʻutaki fakaekoló. Neongo naʻe faʻa maʻu ʻi he ngaahi feinga tānaki valá ha ngaahi foaki ʻaonga hangē ko e ngaahi talausese, sote, sū, mo e ngaahi kote, ka naʻe kei fie maʻu pē ʻe ha ngaahi kautaha tokoni ʻofa lahi e ngaahi meʻa hangē ko e sitōkeni, vala loto, mo e vala mohe—ʻa ia ko ha ngaahi foaki tokoni naʻe fie maʻu ke ʻomi ʻoku kei foʻou. Naʻe fokotuʻu ange ʻe Sisitā Lousa ke fokotuʻutuʻu ʻe he siteikí hano tānaki mai ʻo e ngaahi meʻa ko iá.
ʻI he ʻaho 15 ʻo ʻOkatopá, ne tufaki ai ʻe he kāingalotu ʻo e siteikí ʻi honau tukui ʻapí ha ngaahi kaati ʻe 1,000 ʻoku tautau he ngaahi matapaá ʻo fakamatalaʻi ai ʻa e ngāue tokoní, fakaafeʻi ai e tukui koló ke nau kau mai, pea hiki ai mo e ngaahi meʻa ko ia ʻoku fie maʻú. Hili mei ai ha uike ʻe taha, ne foki atu ʻe kāingalotu ʻo e siteikí ke tānaki mai e ngaahi foaki ʻofá pea ʻomi ia ki he siteiki senitaá ke fili fakafaʻahinga pea tufaki ki he ngaahi kautaha tokoni ʻofa fakalotofonua ʻe 10.
Ne feau ʻe he ngāue fakataha ko iá ha fie maʻu vivili ʻi honau tukui koló, naʻe pehē ʻe Sisitā Lousa. “Ko ha founga ia naʻe kehe, pea naʻe tokoni ki he kakaí. Pea koeʻuhí naʻe ʻikai ke fuʻu lahi e fakamole ki aí, naʻe lava ke fakamoleki ʻe he fāmili ʻe taha ha paʻanga siʻisiʻi pē ka naʻe lava ke tokoniʻi moʻoni ai ha taha.”
Naʻe palani mo kau atu e kāingalotú ʻi māmani kotoa ki ha ngāue tokoni ki honau tukui koló ko e tali ki he fakaafe ʻa e Kau Palesitenisī ʻUluakí.
© 2011 ronald k. nielsen