Ngaahi Ongoongo Nounou Mei Māmani
Fuofua Taimi ke Fanongo ai e Kāingalotú ki he Konifelenisí ʻi he lea Faka-Siōsiá
Ne fakataha mai ha Kāingalotu ʻe toko 35 ʻi he ʻaho 9 ʻo ʻOkatopa 2011, ke mamata he konifelenisi lahí—pea ke fanongo ʻi hono fuofua fakamafola mai ia ʻi heʻenau lea fakafonua faka-Siōsiá. Kimuʻa ʻi ʻOkatopá, ne lava ke fili ai e kāingalotu mālohi ʻe meimei toko 50 he fonuá ke fanongo ki he konifelenisí ʻi he lea faka-Lūsiá, ʻAmēniá, pe faka-Pilitāniá. Neongo ia, ne tokolahi ha niʻihi ne lea faka-Siōsiá pē, ko ia ko e meʻa lahi ʻa hono lava ke liliu mai ʻi he lea fakafonua ko iá.
Naʻe pehē ʻe Lela Sinoupilase, “Ne u fiefia ʻaupito ʻi he lava ke u fanongo ki he lea ʻa Palesiteni Tōmasi S. Monisoní ʻi he lea faka-Siōsiá. Ko e fai kehekehe lahi ʻoku hoko ʻi hoʻo fanongo ki he konifelenisí ʻi hoʻo lea fakafonua pē ʻaʻaú.”
Tokoni ʻa e Siasí ki ha Maumau ne Hoko ʻi ha Matangi ne Tō ʻi Filipainí
Hili e ongo matangi ko Nesati mo Nolokī ʻi Filipaini he konga kimui ʻo Sepitemá ʻa ia ne uesia ai ha kakai ʻe meimei toko 200,000, ne kamata tokoni ʻa e Potungāue Uelofea Faka-ʻĒlia ʻa e Siasí ʻaki ha tangai laise ʻe 600, ʻa ia ne ʻave ki Pemipanga. Ne tufaki e laise ko ʻeni ne foakí ʻe he Senitā Ngāue Fakasōsiale ʻo Pemipanga ʻo e ʻAlekitaiosisi ʻo Seni Fenanitō Pemipangá, ko ha kautaha hoa ngāue ʻoku ʻikai ko ha kautaha fakapuleʻanga.
Ne ngāue fakataha e kau ngāue tokoni ʻa e Katoliká mo e Siasí ke toe faʻo foʻou mo tufaki e laise ne foakí ki he ngaahi kolo ʻe 352 ʻi Pemipanga ne uesiá.
Kau Atu e Kāingalotu ʻi ʻAfiliká ki he ʻAho Ngāue Tokoni hono Nimá
Ko e taʻu hokohoko ʻaki ʻeni ʻe nima ʻa e kau atu e kāingalotu ʻi ʻAfiliká ki ha ʻAho Nima Fie Tokoni Kotoa ʻa e Māmongá ʻa ʻAfilika Kotoa, ʻa ia ko ha fengāueʻaki ʻi he vahaʻa ʻo e ʻĒlia ʻAfilika Tongahahaké mo e ʻĒlia ʻAfilika Hihifó. ʻOku fakahoko ʻe he kāingalotu ʻi he ongo ʻēliá ni ha ngaahi ngāue tokoni kehekehe ʻi honau tukui kolo fakalotofonuá ʻi ha ʻaho ʻe taha he taʻu kotoa pē. Ne fakahoko e ngāue ʻo e taʻu ní ʻi he ʻaho 20 ʻo ʻAokosi, 2011; ʻe lava ke maʻu e ngaahi lipooti ki ha niʻihi ʻo e ngaahi ngāué ʻi he news.lds.org.
Kau Atu e Kāingalotu ʻi Lākosi ʻi Naisīliá , ki he ʻAho Nima Fie Tokoni ʻa ʻAfilika Kotoa ʻi he ʻaho 20 ʻo ʻAokosi, 2011.
faitā ʻa ebere evans