Ko e Lea ʻi he ʻAho ní
ʻAʻahi ʻa ʻEletā Pālati, ʻEletā Seniseni ki he Kāingalotu ʻi Mekisikoú
Naʻe feʻiloaki ʻa ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá pea mo ʻEletā Sei E. Senisoni ʻo e Kau Palesitenisī ʻo e Kau Fitungofulú mo e kāingalotu mo e kau faifekau ʻi Kiunavaka ʻi Mekisikoú ʻi he fakaʻosinga ʻo e uiké ʻi he ʻaho 10–11 ʻo Sepitema, 2011. Naʻe kole ʻa ʻEletā Pālati ki he kāingalotú ke nau tō ki he loto ʻo e kakai ʻo Mekisikoú ʻa e ongoongoleleí ʻo fakafou ʻi ha ngaahi aʻusia fakalaumālie. Naʻá ne pehē, “ʻOku fuʻu lahi hono tali fakaʻatamai ʻo e ongoongoleleí kae ʻikai ke nau tali fakalaumālie ia. ʻOku fie maʻu ʻa e ului moʻoni ʻo e laumālié ʻi hotau kāingalotú ke nau fakahū ki honau lotó ʻa e meʻa naʻa nau tali ʻi honau ʻatamaí.”
ʻAʻahi ʻa ʻEletā ʻOakesi, ʻEletā ʻEnitaseni ki Pelū mo Poliviá
Ne folau atu ʻa ʻEletā Tāleni H. ʻOakesi mo ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ki Polivia mo Pelū ʻi ʻAmelika Tongá ʻi ʻAokosi ʻo e 2011. Naʻe kau ʻi he ngaahi pōpoaki ʻa ʻEletā ʻEnitasení ʻa ʻene akonaki ʻo pehē ʻoku fefaʻuhi e kakai kotoa pē ʻi māmani ke fili ki he leleí pe koví. Naʻá ne pehē, “ʻOku faingataʻa tatau pē kiate koe pea mo au ʻa hono fai ʻo e ngaahi fili fekauʻaki mo e moʻui matelié. ʻOku tau ʻi hení ke tau ako e founga ke moʻui ʻaki ai e tuí.”
Fakahoko ʻe ʻEletā Petinā ha Ngāue ne Vahe ki Ai ʻi ʻIulope
Lolotonga e konga ʻuluaki ʻo Sepitemá, ne feʻiloaki ai ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá mo e Kāingalotu ʻi ʻIngilaní, Siamané (ʻa ē ne ngāue fakafaifekau taimi kakato ai he taʻu ʻe meimei 40 kuo hilí), mo Tenimaʻaké. ʻI he feituʻu takitaha, ne akonaki ʻaki ai ʻe ʻEletā Petinā ʻa e tokāteline ʻa Kalaisí mo fakamamafaʻi e mālohi ʻo e Fakaleleí. Naʻá ne hoko atu foki ke akoʻi e tefitoʻi moʻoni ʻo e tauʻatāina ke filí mo hotau fatongia fakafoʻituitui ke ngāué. Naʻá ne pehē, “Ko e tauʻatāina ke filí ko e mālohi ia mo e malava ke ngāue tauʻatāina. Pea ʻi heʻetau ngāue ʻi he founga ʻoku tāú pea fakatatau ki he ngaahi akonaki ʻa Sīsū Kalaisí, ʻoku liliu hotau natulá ʻo fakafou ʻi Heʻene Fakaleleí pea ʻi he mālohi ʻo e Laumālie Māʻoniʻoní.”
caption here?
faitā ʻa Craig T. Olson