Ko e Ngāue ʻi he Siasí
Ko e Meʻa ke Fai ki he Fakaangá ʻi Hotau Ngaahi Uiuiʻí
Ko ha tāpuaki mo ha poletaki mālie ia fekauʻaki mo ha siasi ʻoku ʻikai totongi hono kau ngāué ke tau fekātakiʻaki mo kātakiʻi pe kītaki ʻi heʻetau ako ko ia mo tupulaki ʻi hotau ngaahi uiuiʻí. ʻI he taimi naʻe hoko ai ha tūkunga faingataʻa mo pelepelengesi ʻi hoku uiuiʻí—ha meʻa ne kau ki ai ha kāingalotu tokolahi ʻo e uōtí—ne u fai e lelei taha ne u lavá peá u hoko atu, mo ʻeku tui kuo ʻosi e faingataʻa ko ʻení.
Ka naʻe hala ʻeku maʻú. Naʻe ʻikai fiemālie ʻa e tokotaha kotoa ʻi homau uōtí ki he founga ne fakaleleiʻi ʻaki e meʻa naʻe hokó, pea naʻe lahi leva hono tālangaʻí. Naʻe fiemālie ʻa e niʻihi ki he meʻa kuó u faí. Pehē ʻe he niʻihi ia ko e fehālaaki lahi ne u faí. Ne u ongoʻi faingataʻaʻia, ka koeʻuhí kuó u ʻosi fai ʻa hoku lelei tahá, ne u feinga ai ke ʻoua te u fuʻu hohaʻa ki ai.
Ka ʻi hono tukuange au hili ha taimi nounou pē mei aí, ne u ongoʻi loto mamahi ʻaupito. Ko e moʻoni ne u ʻiloʻi ʻoku fakataimi pē ʻa e ngaahi uiuiʻi ʻi he Siasí, ka koeʻuhí ko e taimi naʻe tukuange ai aú, ne u ongoʻi hangē naʻe tukuakiʻi pe tauteaʻi nai au ʻe hoku kau takí koeʻuhí ko e meʻa kuo hokó.
Hangē ne toe lahi ange hono fakaangaʻi au ʻe he kakaí, pea naʻe ʻikai ke u fakapapauʻi pe ne u fie fesiofaki nai mo ha taha he uōtí. Ko ia ne u nofo pē ʻi ʻapi he uike hili hoku tukuangé ʻo ʻikai ke u ʻalu ki he lotú. Ne u toe fai pehē pē he uike hokó—mo e uike hono hokó. Ko e fuoloa ange ʻa e ʻikai ke u maʻulotú, ko e ngali faingataʻa ange ai pē ia ʻeku fokí.
Ne ʻosi atu ha taimi peá u kamata fakakaukau ki he meʻa kuo hokó. Ne u ʻiloʻi neongo ko ha meʻa fakamamahi ʻeni, ka naʻe ʻikai hano mahuʻinga ke u liʻaki ai ʻeku ngaahi fuakavá. Naʻe moʻoni nai e Siasí pe ʻikai?
Mahalo pē naʻá ku fakahoko e founga naʻe ʻikai tuha mo e meʻa ne hokó ʻi hoku uiuiʻí; mahalo pē naʻe ʻikai. Ko hono moʻoní, ʻoku tau ako kotoa pē, pea ʻoku tau fai kotoa pē ha ngaahi fehālaaki.
Neongo naʻe fakamamahi ke fakahā, ka naʻe ʻikai ke fuʻu mahuʻinga ia pe ko hai naʻe tonú pe halá ʻi hono fakafehoanaki atu ki he ngaahi fokotuʻutuʻu ʻoku mahuʻinga angé. Ko e meʻa ʻe mahuʻingá pe ne u tauhi ʻeku ngaahi fuakavá. ʻE mahuʻinga—ki hoku fāmilí pea kiate au—kapau te u maʻulotu, fakafoʻou ʻeku ngaahi fuakavá ʻi he houalotu sākalamēnití, pea hokohoko atu ʻeku ngāué. Pea ʻe mahuʻinga ʻa e founga ʻeku tali ki he mafai ʻo e lakanga fakataulaʻeikí.
Ne u foki ki he siasí. Taimi nounou pē mei ai kuó u maʻu ha toe uiuiʻi ʻe taha. ʻI he uiuiʻi ko iá—mo e ngaahi uiuiʻi hoko atu aí—naʻe fie maʻu ke u ngāue ai mo ha niʻihi ʻo e kakai naʻa nau fakaangaʻi e ngaahi meʻa naʻá ku faí. Ko ha meʻa faingataʻa ia. Ka ʻoku ou fiefia naʻe ʻikai ke u tuku ke taʻofi au ʻe he ngaahi lea naʻa nau faí mei heʻeku fiefia ʻi he ngaahi tāpuaki ʻo e mālohi ʻi he Siasí.