Fakaafeʻi ʻe he Feʻauhi ʻAati Fakavahaʻa-puleʻangá e Toʻu Tupú ke Vahevahe Honau Talēnití mo e Niʻihi Kehé

ʻI he Tokāteline mo e Ngaahi Fuakava 115:4–6, ʻoku ui ʻe he ʻEikí ʻa e kakai kotoa ʻo Hono Siasí ke nau ngāue, ʻo ne fakaafeʻi kinautolu ke nau “tuʻu hake pea ulo atu” koeʻuhí ke “hoko ʻa [ʻenau] māmá ko ha fuka ki he ngaahi puleʻangá.” ʻOkú Ne kole kiate kinautolu ke nau kau fakataha ʻo fepoupouaki pea hoko “ko ha ungaʻanga mei he afaá.”

ʻI hono toe fakaongo mai ʻe he Musiume Hisitōlia ʻo e Siasí ʻa e ui ko ʻení ʻo fakaafeʻi e toʻu tupu ʻo e Siasí mei he taʻu 13 ki he 18 ke nau kau mai ki he ʻuluaki Feʻauhi ʻAati Fakavahaʻapuleʻanga ʻa e musiumé maʻá e Toʻu Tupú. Kuo taʻu lahi mo hono fakahoko ʻe he musiumé ha feʻauhi ʻaati fakavahaʻapuleʻanga maʻá e kakai lalahi ʻo e Siasí, ka ʻoku toe ʻomi ʻi he feʻauhi foʻoú ni ha faingamālie tatau ki he toʻu tupú.

ʻOku fakatukupaaʻi e toʻu tupú ke nau faʻu ha faʻahinga ngāue fakaʻaati te ne fakahaaʻi ʻene ʻuhinga kiate kinautolu ʻa e kole mei he ʻEikí ke—“tuʻu hake pea ulo atú.” Naʻe kamata hono tali ʻe he musiumé ʻa e ngaahi kole ke kau atú ʻi he ʻaho Mōnite, ko hono 2 ʻo Sānuali 2012.

Naʻe pehē ʻe ʻEniselā ʻEimi, ko e tokoni tauhi ʻo e meʻa fakaako ʻi he musiumé, “Neongo e pehē ʻe hotau toʻu tupú ʻoku ʻikai lelei honau ngaahi talēniti fakaʻātí, ka ʻoku fakaofo ʻa e lava ke ongo ki he laumālie ʻo ha tokotaha kehe ha kiʻi meʻa faingofua hangē ko ha tā fakatātā, laʻi tā, pe ha tā tongitongi pea hoko ia ko ha maʻuʻanga ivi fakalaumālie kiate kinautolu. Pea ʻi hono fakaʻaongaʻi ʻe he toʻu tupú honau ngaahi talēniti ke langaki mo ueʻi fakalaumālie e niʻihi kehé, ʻe ueʻi fakalaumālie mo kinautolu foki.”

Ko e ngāue fakaʻaati ko ia ʻoku fakahū ki he feʻauhí kuo pau ke toki kamata fai e ngāue ki aí hili e ʻaho 1 ʻo Sānuali 2009. ʻE lava ke fakahū ʻe kinautolu ʻoku fie kau maí ʻenau ngāué ʻi he ʻInitanetí ʻo aʻu ki he ʻaho Falaite, 1 ʻo Sune 2012. Kuo pau ke fakahū ʻe he tokotaha ʻātí ʻa e meʻa pē ʻe taha ki he feʻauhí. ʻE lava ke maʻu e fakamatala mo e ngaahi fakahinohino ki hono fakahū ʻo e ngāue fakaʻātí ʻi he lds.org/youthartcomp.

ʻOku tali lelei ki he feʻauhí e ngaahi mītiá mo e faʻahinga meʻa fakaʻaati hono kotoa—ngaahi tā valivali, fakatātaá, laʻitaá, tā tongitongí, meʻa ngaohi mei he ukameá, tupenu lalangá, meʻa teuteú, meʻa ngaohi ʻaki e ʻumeá, mo e ngaahi alā meʻa pehē. Fakatatau ki he ngaahi lao mo e ngaahi fie maʻu ʻa e feʻauhí, “ʻe ala fakahaaʻi ʻi he ngāue fakaʻātí ha ngaahi anga fakafonua mo ha ngaahi talatukufakaholo fakaʻofoʻofa. ʻOku tali lelei ha ngaahi ngāue fakaʻaati ʻoku nau fakaʻuhingaʻi ha faʻahinga meʻa ʻi hono ʻuhinga totonú pe ʻi he fakataipe.”

ʻE vavé ni pē hano kamata ʻi he saiti ki he feʻauhí ha vitiō fekauʻaki mo ia ʻi he konga ko e “Your Creative Process” ke vakai ki ai e toʻu tupu ngāue fakaʻātí kapau te nau fie maʻu ha tokoni ke maʻu ha fakakaukau pe fili e founga ke fakahoko mai ʻaki ʻenau fakakaukaú.

Hili hono fakamāuʻi tuʻo ua ʻe ha kau fakamaau tokolahi, ʻe fili e kau ikuná pea ʻe kole kiate kinautolu ke ʻomi ʻenau ngāue totonú ki he musiumé. ʻE fakaʻaliʻali ai ʻenau ngaahi ngāué mei he ʻaho 16 ʻo Nōvema 2012, ʻo aʻu ki he ʻaho 17 ʻo Sune 2013.

ʻE aʻu ki ha ngaahi ngāue fakaʻaati ʻe 20 mei he ngaahi meʻa ʻe fakaʻaliʻalí te nau maʻu ʻa e Ngaahi Pale Fakalāngilangi (Merit Awards) ʻa ia ʻe foaki ke fakalāngilangiʻi e ngaahi ngāue tuʻukimuʻá, pea maʻu ʻe he ngāue ʻe tolu ʻa e Visitorsʻ Choice Awards (Ngaahi Pale ko e Fili ʻe he Kau ʻAʻahí), ʻa ia ʻe foaki kimuʻa pea toki ʻosi ʻa e fakaʻaliʻalí.

ʻOku fakaafeʻi atu e Toʻu tupu ʻo e Siasí mei he taʻu 13 ki he 18 ke fakahū mai haʻanau ngāue fakaʻaati ki he fuofua feʻauhi ʻaati maʻá e toʻu tupú.