Kuo lahi fau e ngaahi meʻa fakatekinolosia fakafiefia ʻoku lava ke tau maʻú, ʻo faingofua ai ʻetau fakamoleki ha fuʻu taimi lahi ki ai kae ʻikai ha taimi feʻunga ke fai ai ʻa e ngaahi meʻa ʻoku mahuʻingá hangē ko e laukongá, vaʻinga ʻi tuʻá, pe ʻi ai ha taimi mo e fāmilí mo e ngaahi kaungāmeʻá. Kuo ʻosi fakakaukauʻi ʻe ha niʻihi ʻo ʻetau kau lau makasiní mo honau ngaahi fāmilí ha ngaahi founga ke potupotutatau ai ʻenau moʻuí—ʻa ia ko hono manatuʻi ʻoku nofo ʻa e Laumālié ʻi he ngaahi ʻapi ʻoku fiefia mo moʻui leleí.
Kuo mau ʻosi downloaded e ngaahi talanoa mei he folofolá mo e mūsika ʻoku tāú ki heʻemau ʻū MP3. ʻOku fokotuʻu ʻemau komipiutá ʻi he feituʻu ʻe lava ke sio ki ai ʻa e tokotaha kotoa pē. ʻOku ʻikai te mau sio TV kimuʻa he taimi akó pe kae ʻoua kuo ʻosi ʻemau ngāue fakaako ʻoku fai mei ʻapí mo ʻemau ngaahi ngāué he efiafí. ʻOku polokaʻi ʻa e ngaahi sēnolo ʻe niʻihi ʻi heʻemau TV ʻo ʻikai pē fai ha sio ai. ʻOku ʻikai ke mau sio TV ka ʻoku mau vaʻinga ʻi tuʻa, ngāue ʻi heʻemau ngoué, pe veimau pe monopoli fakataha. ʻI he taimi ʻoku potupotutatau ai ʻemau moʻuí, ʻoku fakalongolongo mo nonga ange homau ʻapí.
Ko Sela, Sitīveni, Kilisi, mo Seisoni L: taʻu 7, 15, 20, mo 18; Kuinisilani, ʻAositelēlia
ʻOku tufa mai ki homau fāmilí ha “Tikite TV” ʻe ono ʻi he kamataʻanga ʻo e uiké. Ko e tikite ʻe taha ʻoku feʻunga ia mo e houa sio TV ʻe taha. ʻOku lisi ʻi he tuʻa tikite takitaha ʻa e ngaahi meʻa ʻoku fie maʻu ke mau fai kimuʻa pea ʻoange e tikité ke fetongi ʻaki haʻamau sio TV, hangē ko hono fakamaʻa homau lokí, fakaʻosi ʻemau ngāue fakaako mei ʻapí, mo fai ʻemau ngaahi ngāué. ʻOku mau manako ke lautohi, vaʻinga fakataha, pea vaʻinga mo homau ngaahi kaungāmeʻá ʻi tuʻa kae ʻikai fakaʻaongaʻi maʻu pē ʻa e ngaahi meʻa fakatekinolosiá.
Taleva mo Nikoleti C., taʻu 10 mo e 13, ʻIutā, USA
Tikite TV ʻe Taha
ʻOku mau manako ange ʻi he laukongá he sio TV he taimi kotoa peé! ʻOku lava ke mau fakaʻaongaʻi ʻa e ʻInitanetí ʻi ha ʻosi kotoa ʻemau ngaahi ngāué pea maʻa e falé. ʻOku mau taimiʻi hono lōloa ʻemau fakaʻaongaʻi e komipiutá.
ʻEli, Sēleti, ʻĪteni, mo ʻEpi H.; taʻu 8, 11, 2, mo e 6; Kalefōnia, USA