Fiekaia ki he Folofolá ʻi ʻEkuatoa
“ʻOku monūʻia ʻa kinautolu kotoa pē ʻoku fiekaia mo fieinua ki he māʻoniʻoní, he ʻe fakafonu ʻa kinautolu ʻaki ʻa e Laumālie Māʻoniʻoní” (3 Nīfai 12:6).
Naʻe falala atu ʻa ʻAna Visapaikati ʻi he ʻū laʻipapa he holisi ʻi tuʻa hono falé mo malimali pē. Naʻe tangutu ʻene fānaú mo ia ʻi ha sea lōloa mo takitaha malimali hangē pē ko iá. Ko ha hoʻatā Tokonaki māfana mo laʻalaʻā ʻeni. ʻOku nofo ʻa ʻAna ʻi Pueto Felenisisikou ti ʻOliana, ko ha kiʻi kolo ʻi he vaotā ʻo ʻEkuatoa hahaké. Ne toki ʻaʻahí ni mai e kau palesitenisī ʻo e Kolo ʻOlianá, neongo naʻe ʻikai ke nau ʻuhinga ke motuhi e talanoa ʻa ʻAna mo e ongo sisitaá, ka naʻe ʻikai tokanga ki ai ʻa ʻAna ia. ʻOkú ne talitali fiefia ʻenau ʻi aí. Naʻe lahi e ngaahi meʻa ia naʻá ne fakamālō aí peá ne fakahā tauʻatāina pē ʻa ʻene fakamāloó.
ʻOku ʻikai pehē ia naʻe hao ʻa ʻAna mei he fekuki mo e ngaahi faingataʻá. ʻOkú ne nofo toko taha pē mo ʻene kiʻi fānau ʻe toko nimá. ʻOku faingataʻa e kumi ngāue fakaʻahó. Pea ʻi hono papitaiso ia ʻi ʻAokosi ʻo e 2009, ko e toko taha pē ʻo ʻene fānaú naʻe papitaiso mo iá.
Ka ʻi he taʻu hono hokó, naʻe maʻu e ngaahi tāpuakí ʻi ha muimui ha toko tolu kehe ʻo ʻene fānaú ʻi heʻene faʻifaʻitakiʻangá ʻo papitaiso pea hilifakinima kinautolu (naʻe fuʻu kei siʻi ʻa e toko taha he taimi ko iá).
ʻIo, naʻe mata fiefia ʻa ʻAna ʻi heʻene loto houngaʻiá. Naʻá ne tatau pē mo e kāingalotu kehe ʻo e Kolo ʻOlianá, ʻo ʻiloʻi ʻa e fiefia haohaoa ʻoku maʻu mei hono moʻui ʻaki e ongoongolelei ʻo Sīsū Kalaisí.
ʻOku Kamata ʻAki e Fiefiá ʻa e Holi ʻo e Lotó
ʻI Tīsema ʻo e 2008, naʻe ʻikai ha fokotuʻutuʻu maau ia ʻo e Siasí ʻi Pueto Felenisisikou ti ʻOliana. Naʻe nofo ai ha kāingalotu he taimi ko iá, pea ko honau niʻihi kuo taʻu lahi ʻa e ʻikai ke nau maʻulotu.
Ka ne ʻi ai e meʻa naʻe hoko. Naʻe ongo e Laumālié ki ha ngaahi loto pea liliu ai e moʻui ʻa ha niʻihi ʻo ne ueʻi ha fāmili ʻe fā ke nau kamata fakataha ʻo ako e folofolá mo feakoʻiʻaki ʻiate kinautolu. Pea naʻa mo e taimí ni, ʻoku mafola e ongo ko ʻení ʻi he koló.
ʻOku pehē ʻe Fane Pēleni Kāsia, ko e mēmipa ʻo e koló, “ʻOku fiekaia mo fieinua e kakai hení ki he ongoongoleleí.”
Naʻe ueʻi ʻe he fiekaia ko ʻení ʻa e kāingalotu ʻi Pueto Felenisisikou ti ʻOlianá ke nau fetuʻutaki ki he Siasí pea kole ha ngofua ke nau maʻu e sākalamēnití. Ko e manatu ʻeni ki ai ʻa Tīmote Siloane, ko e palesiteni kimuʻa ʻo e Misiona ʻEkuatoa Kitó, “Naʻe ʻikai ke mau haʻu kiate kinautolu. Naʻa nau telefoni ange kiate au. Naʻe ʻosi ʻi ai pē ia—ʻa e holi ke ngāue ʻo fakatatau ki he ngaahi ongo ko iá—ke muimui ʻi he fakaafe ʻa e Fakamoʻuí ʻi he kotoa ʻo e Tohi ʻa Molomoná ke ngāue ʻaki ʻa e tui kiate Iá pea fakatomalá. Ko ha pōpoaki ia maʻatautolu hono kotoa.”
Naʻe ʻi he loto ʻo kinautolu naʻe hiki ki Pueto Felenisisikou ti ʻOlianá ʻa e holi tatau. ʻI he konga ki muʻa ʻo Sānuali 2009, naʻe fakakaukauʻi ʻe Mākō Viavisesio—ko e palesiteni fakakolo ia he taimi ní—mo hono uaifi ko Kalōtia Lamilasí, ha faingamālie fakangāue ke na hiki ai mei hona ʻapi ʻi Masala ʻi he tafaʻaki ʻe taha ʻo ʻEkuatoá, ki Pueto Felenisisikou ti ʻOliana.
ʻOku pehē ʻe Palesiteni Viavisesio, “Ko ʻeku ʻuluaki fehuʻí pē, ‘ʻOku tuʻu ai e Siasí?’ Ne ma talanoa ki ai mo hoku uaifí mo homa fāmilí, pea mau lotu ke ʻiloʻi pe naʻe totonu ke mau hiki. ʻI he maʻu pē ʻo e ngāué, naʻá ma ʻiloʻi kuo fokotuʻu e Siasí ʻi Pueto Felenisisikou ti ʻOliana. Ne ma hiki mai ki heni ʻi Fēpueli ʻo e 2009, pea naʻe fokotuʻu e koló ʻi Sepitema hono hokó.”
Ko e Fiefia ʻo e Ngāue Tokoní
ʻOku fakanatula pē hono fakatupu ʻe he holi ke haʻu kia Kalaisí ʻa e holi ke tokoní. ʻOku fakatou liliu ʻe he ongoongolelei ʻo Sīsū Kalaisí ʻa kinautolu ʻoku foaki atú mo kinautolu ʻoku maʻu maí. ʻOku hoko e founga ko ʻeni ʻo e foaki atu mo e maʻu maí ʻi he taimi ʻoku loto fakatōkilalo aí, tauʻatāina e fakakaukaú, pea fakahoko e tokoní. Kuo hoko e ngāue tokoní ko ha tefitoʻi konga ʻi he tupulaki ʻa e Siasí ʻi Pueto Felenisisikou ti ʻOliana pea kuó ne fakamālohia ʻa kinautolu kuo nau tokoní.
Ko e fehuʻi ʻeni ʻa Kelela Lusi Fāfeini ʻa ia naʻe uiuiʻi ʻi Sepitema ʻo e 2010 ke kau ʻi he kau palesitenisī ʻo e Fineʻofa, “Ko e hā e ongo ʻoku ou maʻu kau ki hoku uiuiʻí? Ko e fiefia, he ʻoku ou ʻiloʻi te u lava ʻo tokoniʻi ha kau fafine kehe ke nau haʻu ki he lotú mo fakamālohia e kau fafine foʻou kuo papitaisó.”
Naʻe maʻu e ongo tatau ʻe he loto ʻo e kāingalotu e koló. ʻOku pehē ʻe Lōtesi Senisei, ko e palesiteni ʻo e Fineʻofá, ʻoku fie maʻu ke fakamālohia e kau fafiné, ka ʻokú ne fiefia pē ke fai e ngāue ko iá: “ʻOku mau ʻaʻahi ki he kau fafiné ʻi heʻemau hoko ko e kau palesitenisī mo e kau mēmipa ʻo e Fineʻofá. ʻOku mau ofi kiate kinautolu ʻi he taimi ʻoku ʻi ai ʻenau palopalemá. ʻOku mau ʻoange ʻa e meʻakai ʻi he taimi ʻoku fie maʻu aí. ʻOku mau fakahā ke nau ʻiloʻi ʻoku ʻikai te nau tuēnoa, pea ʻoku tokoni mai kiate kimautolu ʻa Sīsū Kalaisi mo e koló. Pea ʻoku mau akoʻi kinautolu ke fakakakato ʻenau tafaʻakí—lotu, ako folofola, mo teuteuʻi kinautolu. ʻOku mau lotu mo kinautolu, ʻoku mau fakafiemālieʻi kinautolu, pea ʻoku mau ʻofa lahi ʻiate kinautolu.”
Ka ʻoku ʻikai fai e ngāué ʻe he kau fafiné pē. ʻOku pehē ʻe Lōtesi, “ʻOku mau talanoa mo e palesiteni fakakoló ke sio pe ko e hā e meʻa ʻe lava ke faí. ʻOku mau vahevahe mo ia pea mo e fakataha alēleá ʻenau ngaahi fie maʻú koeʻuhí ke mau lava ʻo fakapapauʻi e meʻa ʻoku fie maʻu ke mau faí.”
Ko e tukupā ko ia ʻa e kau fafiné ke fai honau fatongiá ko ha ongo ia ʻoku ʻinasi tatau kotoa ai e koló. ʻI ha ngāue tokoni ʻe taha ki ha fāmili ʻi he koló, ʻoku pehē e Lōtesi “naʻa mau kau kotoa ki ai. ʻA e fānaú, toʻu tupú, kakai lalahí, Fineʻofá, mo e kau faifekaú. Ne fuʻu langaki fakalaumālie kimautolu ʻe he meʻa naʻa mau faí. ʻOku ou ʻiloʻi “ka tau ka ʻi he tauhi ʻo [hotau] kāingá, ʻoku tau ʻi he tauhi pē ʻo [hotau] ʻOtuá’ [Mōsaia 2:17]. ʻI he taimi ʻoku ou tokoni aí, ʻoku hangē pē haʻaku fai ia maʻa Sīsū Kalaisí. Ko e taumuʻa ia ʻo e puleʻangá.”
Ko e Fiefia ʻo e Fakafeohí
ʻOku ʻi ai e meʻa ia fekauʻaki mo e uouangatahá ʻokú ne fakamālohia kitautolu, ʻa e ongoʻi ko ia ʻoku tau kau ki he tukui kolo ʻo e Kāinga Māʻoniʻoní. ʻOku maʻu e ngaahi tāpuakí ʻi he taimi ʻoku tau hoko ai ko e “kaungā kolo mo e kāinga māʻoniʻoní, pea mo e fale ʻo e ʻOtuá” (ʻEfesō 2:19) pea tau nofo ʻo hangē ko e kau mēmipa ʻo ha fāmili ʻoku nau “loto ke fefuaʻaki ʻa hoʻomou ngaahi kavengá koeʻuhi ke nau maʻamaʻa; ʻio, pea ʻoku mou loto ke tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9).
Ko e fakamatala ʻeni ʻa Fané, “ʻOku ou tui ʻoku maʻu hotau mālohí mei he foʻi moʻoni ko ia ʻoku tau ongoʻi ʻe kitautolu kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku tau hangē pē ha fāmilí. Pea ʻoku ou pehē ko e lelei lahi kuo hoko ʻi heʻetau fetauhiʻakí. ʻOku tau foaki atu ha meʻa pē ʻe fie maʻú, pea ʻokú ne fakatupu ʻe ia ha ongoʻi uouangataha. ʻOku tau tali lelei ʻa e tokotaha foʻou kotoa pē ʻoku haʻu ki he lotú. ʻOku tau talitali fiefia kinautolu. ʻOku ou tui ʻoku mahuʻinga ange haʻatau fāʻofua kiate kinautolu ʻi ha lea ʻe lauiafe.”
ʻOku fakamoʻoniʻi ʻeni ʻe he ngaahi meʻa ne aʻusia ʻe ʻAná. Ko ha faʻē ia ʻoku nofo toko taha pē mo haʻane fānau ʻe toko nima, pea ʻokú ne fehangahangai maʻu pē mo ha ngaahi faingataʻa fakapaʻanga ʻi heʻene feinga ke tokonaki maʻa hono fāmilí ʻi ha taimi ʻoku faingataʻa ai ke maʻu ha ngāué, pea ko ha ngāue ia ʻoku fakaongosia fakaeloto mo fakalaumālie. Ko ha tokoni mahuʻinga kiate ia mo hono fāmilí ʻa e fakafeohi ʻa e kāingalotu ʻo e koló lolotonga e ngaahi taimi faingataʻá. ʻOku pehē ʻe ʻAna, “ʻOku ō mai e kāingalotú ʻo mau lau folofola. ʻOku nau tokangaʻi au. ʻOku nau ʻi ai ʻi he taimi ʻoku mau faingataʻaʻia aí. ʻOku fuʻu mahuʻinga ia ki he kau mēmipa foʻoú.”
Ko e konga e fakafeohi ko ʻení ʻa hono ʻuhinga e tupu vave ʻa e koló. Ko e kāingalotu ʻe toko 28 he koló ʻi hono ʻuluaki Sāpaté, pea ʻosi pē ʻa e taʻu ʻe taha mei ai kuo ʻalu hake ʻa e maʻulotú ki he toko 83, kau ai ha kau ʻaʻahi ʻe toko hongofulu mā ua naʻe ʻikai ke nau kau ki hotau siasí.
ʻI he ʻaho Tokonaki kimuʻa ʻi heʻenau konifelenisi fakakoló, ne ʻalu ai e kau taki fakakoló ʻo ʻaʻahi ki he kāingalotú mo e kau fiefanongo ki he Siasí. Ne nau fevahevaheʻaki e folofolá, mo poupouʻi kinautolu ke nau hoko ʻo lelei ange.
Ne ʻi ai ha tangata ne toki papitaiso kimuí ni mai ʻa ia ne fakaului ʻe heʻene ako e folofolá—ʻi heʻene lau ʻiate ia pē mo lau mo e kāingalotú mo e kau faifekaú. ʻOkú ne pehē, “Ko e kií ʻa e Tohi ʻa Molomoná. Ko e kī ia kiate aú.” Kuó ne maʻu ha fiefia ʻi he Siasí. ʻOku pehē fau hono mālohi ʻo e fusi ʻa e ongoongoleleí ʻo ne kamata totongi vahehongofulu ai pē ia kimuʻa pea toki papitaisó.
Ka ʻoku hulu atu ʻa e feohi fakakaungāmeʻá ia ʻi hono vahevahe pē ʻo e ongoongoleleí mo e niʻihi kehé. Te ne lava ʻo liliu ʻa e founga moʻuí.
ʻOku pehē ʻe Pēnape Pātou, ko ha toe tokotaha ne toki ului kimuí ni mai, “Kimuʻa peá u kau ki he Siasí, ko hoku ngaahi kaungāmeʻá pē ʻa e kakai ne mau ō ʻo inu kava mālohí. Ka ko ʻeni kuó u kau ki he Siasí, pea ʻoku tokolahi hoku ngaahi kaungāmeʻá—ngaahi kaungāmeʻa moʻoní. ʻOku nau fakaafeʻi au ke mau lau e Tohi ʻa Molomoná. ʻOku nau fakaafeʻi au ke mau efiafi fakafāmili ʻi ʻapi. ʻOku nau fetauhiʻaki. Kuó u ʻalu mo kinautolu ʻo fakahoko ha ngaahi ngāue tokoni. ʻOku kehe ʻaupito ʻeku moʻuí he taimí ni. Kuó u maʻu ha ngaahi tāpuaki lahi ʻaupito. ʻOku ou totongi ʻeku vahehongofulú, pea kuo tāpuakiʻi au ʻe he ʻEikí.”
Ko ha founga moʻui ia ʻoku ʻikai fakangatangata pē ki he kakai lalahí. ʻOku pehē ʻe Kalōtia Lamilasi, “ʻOku mau akoʻi maʻu pē ʻa e kau finemuí kau ki he mālohi ʻo e fakafeohí, ʻo e lea fakafeʻiloaki mo fakatalanoa ki he niʻihi kehé. ʻI he taimi ʻoku fuofua ʻalu atu ai e kakaí ki he lotú, ko e meʻa ʻoku nau ongoʻi tahá ko e founga ko ia ʻoku talitali ʻaki kinautolú. Ko ia ʻoku mau akoʻi ki he kau finemuí ʻa hono mahuʻinga ʻo e laumālie takitaha ki he ʻEikí. Naʻe tokoni lahi ʻaupito ʻeni. Pea naʻa mau fokotuʻu mo e kau finemuí ha ngaahi taumuʻa ki he Fakalakalaka Fakatāutahá. Naʻe tokoni ʻeni ki hono fakaʻaiʻai kinautolu ke nau lava ʻo vahevahe mo e niʻihi kehé ʻa e anga fakakaungāmeʻá.”
ʻOku fakamatala ʻa Palesiteni Viavisesio ʻo pehē [“ʻoku mau feinga ke fai ki he naʻinaʻi ko ia ʻa Palesiteni Kōtoni B. Hingikelií ʻoku fie maʻu ʻe he tokotaha ului foʻou kotoa pē ke fafangaʻi ia ʻaki e folofola lelei ʻa e ʻOtuá, ke ʻi ai hano kaumeʻa, pea ʻi ai hono fatongia.”]1
Naʻe tokoni ua ʻa ʻAna ʻi he kau palesitenisī ʻo e Palaimelí. Ko ʻene tamasiʻi ko Hōseá naʻe tokoni ʻuluaki ʻi he kōlomu ʻo e kau akonakí.
ʻOku pehē ʻe Palesiteni Viavisesio, “ʻOku mau ʻoange honau fatongia, ha faingamālie ke nau ako ai ʻi he ngaahi tuʻunga fakatakimuʻá, ke ʻi ai ha taha ke tokoniʻi kinautolu.”
Ko e Fiefia ʻo e Liliú
Naʻe tupu mei he ngāue ʻa Kalōtia ʻi he ongoongoleleí ha tupulaki ʻa e falalá ʻi hono lotó. ʻOku pehē ʻe Kalōtia, “Naʻe papitaiso au ʻi hoku taʻu valú. Naʻa mau maʻulotu maʻu pē. Ka ʻi heʻeku tupu ʻo matuʻotuʻa angé, ne u mamata ʻi ha ngaahi nofo mali lahi naʻe ʻikai lelei. Ne u fakakaukau lahi ki ai, pea naʻe hohaʻa hoku lotó naʻa ʻiloange kuo ʻikai ke u mali koeʻuhí naʻa ʻikai ke iku lelei. Ne u manavasiʻi ke fakafalala atu ʻeku moʻuí ki ha taha, naʻa fuʻu faingataʻa ke fai ʻeni. Ka ʻi heʻeku foki mei heʻeku ngāue fakafaifekaú, naʻe ʻikai ke kei tatau ʻeku fakakaukaú. ʻOku liliu koe ʻe hoʻo akoʻi ʻa e tokāteliné.”
Naʻe kaumeʻa ʻa Kalōtia mo Mākō Viavisesio kimuʻa pea ʻalu ʻa Kalōtia ʻo ngāue fakafaifekaú. Taimi siʻi pē mei heʻene foki maí, naʻa nau ō fakataha mo hona ngaahi kaungāmeʻa ki he temipalé. Naʻe hoko ai ha meʻa makehe. Ko e fakamatala ʻeni ʻa Kalōtiá, “Ne u ongoʻi naʻe tali ʻe he ʻEikí ʻeku ngaahi lotú, ʻe lava ke u mali mo e tangata ko ʻení. ʻOku ou maʻu ʻa e tāpuaki maʻongoʻonga tahá ke ʻi ai haku husepāniti lelei.”
Ko e Fiefia ʻi hono Moʻui ʻAki ʻo e Ongoongoleleí
ʻOku pehē ʻe ʻOsikā Leisi, taʻu 15, “ʻOku ʻikai makatuʻunga ʻetau fiefiá ʻi he ngaahi meʻa fakamāmaní, ka ʻi heʻetau founga moʻuí. Ko hono ʻuhinga ia ʻoku ou tauhi ai e ʻaho Sāpaté ke māʻoniʻoní, he ʻoku fakahōifua ia ki he ʻOtuá. Pea ko hono ʻuhinga ia te u ngāue fakafaifekau aí mo e ʻuhinga ʻoku ou manako ai ke tokoni ki he niʻihi kehé.”
Kuo maʻu ʻe he kāingalotu ʻo e Kolo ʻOlianá ʻa e fiefia moʻoní ʻi heʻenau moʻui ʻaki ʻa e ongoongoleleí. ʻOku vahevahe mai ʻe Lōtesi, “Neongo ʻoku ou mamaʻo ʻaupito mei hoku fāmilí, ka ʻoku ʻi ai pē mo hoku fāmili ʻi heni, ko ha fāmili fakalaumālie. ʻOku ʻi ai ʻeku fakamoʻoni mālohi ki he ngāué ni. ʻOku ou ʻilo ʻoku moʻui ʻa Sīsū Kalaisi, pea kapau te tau talangofua, te Ne tāpuakiʻi kitautolu.”
Ko ha fiefia ia ʻoku mafola ʻi he tapa kotoa ʻenau moʻuí neongo e ngaahi faingataʻa ʻoku nau fetaulaki mo iá. Ko ha fiefia ʻoku maʻu mei he moʻui anga māʻoniʻoní.
Toʻohemá: ʻOku fiefia ʻa ʻAna Visapaikati mo ʻene fānaú ʻi he ongoongoleleí. ʻOlungá: ʻOku fakataha mai e kāingalotu ʻo e Kolo ʻOlianá ki ha konifelenisi fakakolo ʻi he 2010.
ʻI lalo, ki toʻohemá: Ko e palesiteni fakakoló ko Mākō Viavisesio mo hono uaifi ko Kalōtiá, mo hona fohá. ʻI lalo, ki toʻomataʻú: Ko e kau atu ʻa Kelela Lusi Fāfeini mo ha kāingalotu kehe ʻo e koló ki ha faeasaiti.
Ko e talanoa ʻa Palesiteni Viavisesio mo ha kāingalotu kehe pea mo Lōtesi Senisei, ko e palesiteni Fineʻofa ʻo e koló mo e faiako semineli.
Mei toʻohemá: Ko Palesiteni Viavisesio mo Pēnape Pātou, ko ha papi ului kimuí ni mai; fakataha ʻa e Fineʻofá; ko Fane Pēleni Kāsia mo hono husepānití, ko Likato, mo ʻena fānaú; kalasi Tokāteline ʻo e Ongoongoleleí.
Ngaahi faitā ʻa Joshua J. Perkey