Maʻu ha Valenitaine Fiefia!
Taine O. ʻo Nailopi, Kiniā
ʻOku fakamanatua ʻi he ngaahi feituʻu lahi ʻi māmani ʻa e ʻAho Valenitainé—14 ʻo Fēpuelí—ko e ʻaho ʻo e ʻofá. Ka ʻe fēfē kapau ko ho hingoá ko Valenitaine? ʻOku hoko nai ʻe ʻaho kotoa pē ko ha ʻaho ʻo e ʻofa?
Ko e ongo ia ʻa e taʻahine taʻu hiva ko Taine O. ʻo Nailopi ʻi Kiniā ʻo kau ki aí. ʻOku ui ia ʻe he taha kotoa pē ko “Taini,” ka ko hono hingoa kakató ko Valenitaine.
Ko ʻene fakamatalá ʻeni, “Naʻe fakahingoa au ko Valenitaine he naʻe fāʻeleʻi au ʻi he ʻaho 14 ʻo Fēpuelí.” Pea ʻoku moʻoni pē hono hingoá he ʻokú ne feinga ke ʻofa ʻi he kakai kotoa pē. ʻOkú ne pehē, “ʻI he taimi naʻe papitaiso ai aú, naʻá ku toʻo kiate au ʻa e huafa ʻo Sīsū Kalaisí. ʻA ia ko hono ʻuhingá ʻoku totonu ke u ʻofa ʻi he kakai kotoa pē ʻo hangē ko ia te Ne faí.
ʻOku fakahoko fēfē ʻe Taine ʻa e ʻaho kotoa pē ko ha ʻaho ʻo e ʻofá? ʻOku lahi e ngaahi foungá.
ʻOkú ne pehē, “Ko e ʻuluaki meʻá pē ko e fai ʻeku lotú. ʻOku ou fakamālō ki he Tamai Hēvaní koeʻuhí ko Hono ʻAló he ʻoku ou ʻofa ʻia Sīsū Kalaisi. ʻOku ou fakamālō ki he Tamai Hēvaní ko hoku fāmilí mo hono fakatahaʻi ʻe he temipalé ʻa e ngaahi fāmilí he ʻoku ou ʻofa ʻi hoku fāmilí. Hili ko iá ʻoku ou kole ki he Tamai Hēvaní ke Ne tāpuakiʻi e kakai ʻoku puké he ʻoku ou ʻiloʻi ʻoku Ne ʻofa foki ʻi he kakai ʻoku puké.”
Ko e Fāmili ʻo Tainé
Ko Taine ʻoku siʻisiʻi taha ʻi hono fāmilí pea ʻoku ʻi ai hono ngaahi tuongaʻane lalahi ʻe toko tolu mo e ongo tokoua lalahi. ʻOku pehē ʻe he tuongaʻane ʻo Taine ko Siaosí, “ʻOkú ne tokoni mai ʻi he taimi ʻoku ou fie maʻu ai ha faʻahinga meʻa. Hangē ko e taimi naʻe mole ai ʻeku pení ʻi ʻapiakó, naʻá ne ʻomai maʻaku ha taha ʻo ʻene ʻū pení.” ʻOku pehē ʻe hono tokoua ko Pelenitaá ʻoku ʻikai ke ʻita ʻa Taine ia he taimi ʻoku fakatonutonuʻi ai ia ʻe ha taha kehe.
ʻOku fakatou lea faka-Suāhili mo faka-Pilitānia e fāmili ʻo Tainé ʻi honau ʻapí. ʻOku nau saiʻia hono fakahoko ʻenau efiafi fakafāmili ʻi ʻapí. ʻOku pehē ʻe Taine, “ʻOku mau ako folofola fakataha. ʻOku mau ako kau ki he Fakamoʻuí, pea ʻoku mau taufetongi pē hono tataki e lotu fakafāmilí.”
ʻOku pehē ʻe Taine, “ʻOku ou feinga ke u hangē ko Sīsuú ʻaki ʻeku angaʻofa, maʻulotu, mo talangofua ki heʻeku ongomātuʻá.”
ʻOku ʻofa ʻa Valenitaine ʻi hono fāmilí. ʻOkú ne saiʻia foki ʻi he ako ʻo kau kia Sīsū Kalaisí.
ʻŪ taá naʻe fai ʻe Richard M. Romney