Ko ʻEtau Pēsí
Fetokoniʻakí
ʻOku ou ʻiloʻi kuo kole mai ʻa Palesiteni Tōmasi S. Monisoni ke tau tokoni ki he kakai kehé. ʻI he hoʻatā Sāpate ʻe taha ne u fie ʻaʻahi ai ki heʻeku kui fefiné ʻa ia naʻá ne nofo toko taha pē, pea ke ma mohe he pō ko iá. Naʻe fakangofua ʻe heʻeku faʻeé ke u ʻalu, pea naʻe fuʻu ʻohovale mo fiefia lahi ʻeku kuí he sio mai kia aú. Naʻá ma talanoa, ʻai ʻema kiʻi kai maʻamaʻa, peá ma sio fakataha he Liahoná. ʻOsi pē ʻema lotú, naʻá ma ō ʻo mohe.
Ne tō e fuʻu matangi mālohi lolotonga e poó—havili, ʻuhila, mana, ʻuha, mo ʻuha maka! Ne ma ʻā hake pea naʻe talamai ʻe heʻeku kuí, naʻá ne mei fuʻu ilifia ʻaupito kapau naʻe ʻikai ke u ʻi ai. Naʻá ku fiefia naʻe lava ke u tokoni kiate ia he meʻá ni.
Vinisio R., taʻu 10, Palāsila
Ko e Temipale Sōlekí, tā ʻe Eve D., taʻu 4, ʻIukuleini
Ko ha Faifekau Sisitā ʻi Leti Sikuea, tā ʻe Emile D., taʻu 9, ʻIukuleini
ʻOku ʻosi ako ʻa Mia Lini L., taʻu 5 mei Siamané, ke ne hoko ko ha faifekau. Lolotonga e kai hoʻatā ʻa Mia mo hano kaungāmeʻa he ʻaho ʻe taha, naʻá ne tāpuakiʻi e meʻakaí, ʻo ne fakatupu ha fehuʻi ʻa e faʻē ʻa hono kaungāmeʻá ki he faʻē ʻa Mia ʻo kau ki he ngaahi meʻa ʻoku tui ki ai e Siasí. Mahalo ʻe lava heni ke fakaafeʻi ʻe Mia hono kaungāmeʻá ki he Palaimelí.
ʻOku Fanongo ʻa e Tamai Hēvaní ki Heʻetau Ngaahi Lotú
ʻOku ou tui lahi kia Sīsū Kalaisi pea ki Heʻene ngaahi fekaú, pea taupotu tahá ki he lotú. Naʻá ma ō he Sāpate ʻe taha mo ʻeku kui tangata he tafaʻaki ʻeku tamaí, ʻo ʻaʻahi ki heʻeku kui ua fefiné. Ne u pehē ke u ʻave ʻeku kiʻi kulií. ʻI heʻema foki ki ʻapí, naʻe tuiʻi ʻe ha tamasiʻi naʻe heka pasikala ʻeku kiʻi kulií. Naʻá ne ilifia peá ne tuli e tamasiʻí. Naʻá ma lele mui atu mo ʻeku kuitangatá ka naʻe ʻikai ke ma maʻu. Ne ma foki ki ʻapi ʻo ʻikai kau ai e kiʻi kulií. Naʻa mau loto mamahi kotoa. Naʻe telefoni ange ʻeku kui ua fefiné ʻo talaange ke u kumi ha potu lilo ʻo lotu ai maʻa ʻeku kiʻi kulií.
Pongipongi hono hokó ne hengihengia ʻemau fanongo ki he kālou ʻa ha kulī—kuo foki mai ʻeku kiʻi kulií ki ʻapi! ʻOku ou ʻilo naʻe fanongo mai e Tamai Hēvaní ki heʻeku lotú.
Sitefanī P., taʻu 8, Honitulasi