Te u Tokoniʻi Fēfē ʻa e Fānaú Ni?
ʻOkú ke ngāue mo ha fānau Palaimeli ʻoku ʻi ai hanau ngaahi faingataʻaʻia fakaʻatamai? Ko ha ngaahi fakakaukau ʻeni ki hono akoʻi kinautolú.
ʻOku tokolahi e kau faiako mo e kau taki ʻi he Palaimelí ʻoku nau fehuʻia pe ʻe anga fēfē ʻa e ngāue mo ha fānau ʻoku faingataʻaʻia fakaʻatamai, hangē ko e autism, Down syndrome, pe ADHD. Mahalo te nau fehuʻi: Te u lava fēfē ʻo akoʻi ʻa e fānaú ni? ʻOku totonu nai ke ne ʻi he lokiako tatau pē mo e niʻihi hono toʻú? Te ne lava nai ʻo kau mai ki he taimi feʻinasiʻakí pe ngaahi ʻekitivitií?
Ko ha faʻē au ʻa ha tamasiʻi ʻoku moʻua he autism pea mo e faiako Palaimeli ʻa ha fānau ʻoku nau faingataʻaʻia fakaʻatamai, pea kuó u ako ha meʻa lahi ʻo kau ki hono feau ʻo e ngaahi fie maʻu ʻa e fānau ko ʻení. Ko ha niʻihi pē ʻeni ʻo e ngaahi tefitoʻi moʻoni kuó u akó. ʻOku ou ʻamanaki ʻe ʻaonga kiate koe ʻi hoʻo ala atu ʻo tokoni mo fakakau mai ʻa e fānau hono kotoa ʻi he Palaimelí ʻi homou uōtí pe koló.
Tokoni ʻo Hangē Ko ia Ne Fai ʻe Sīsuú
Naʻe fakahā mai ʻe hotau Fakamoʻuí ʻa e founga ke tokoniʻi ʻaki e niʻihi kehé ʻaki hono fakafeʻungaʻi ʻEne pōpoakí mo ʻEne ngaahi ngāué ke tuha mo e ngaahi fie maʻu fakafoʻituituí.1 Hangē ko ʻení, ʻi he taimi naʻá Ne ʻaʻahi ai ki he kau Nīfaí, naʻá Ne tānaki fakataha mai ʻenau fānau īkí kiate Ia peá Ne “fua hake [kinautolu], taki taha, ʻo ne tāpuakiʻi ʻa kinautolu mo hufakiʻi ʻa kinautolu ki he Tamaí” (3 Nīfai 17:21; ko e toki tānaki atu hono fakamamafaʻí). Naʻe toki “takatakai ʻa e fānau īkí” ʻaki ʻa e afi ʻe ha kau ʻāngelo pea nau “tauhi kiate kinautolu” (3 Nīfai 17:24).
ʻOku tau kau ʻi he ngāue ʻa e ʻEikí ʻi heʻetau akoʻi ʻa e fānau kotoa pē. ʻOku fakamanatu mai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá kiate kitautolu ʻo pehē: “Ko kitautolu ko ia kuo foaki ki ai e fānau mahuʻinga ko ʻení, kuo tuku mai ki ai ha fatongia tauhi toputapu mo fakaʻeiʻeiki, he ko kitautolu kuo fili ʻe he ʻEikí ke tau takatakaiʻi ʻa e fānau ʻo e ʻaho ní ʻaki ʻa e ʻofa mo e afi ʻo e falala pea mo hono ʻiloʻi ko hai kinautolu.”2 ʻI heʻetau fakahoko hotau fatongia ke tokoniʻi ʻa e fānau ʻoku faingataʻaʻia fakaesinó, ʻe tokoniʻi kitautolu ʻe he ʻEikí ke tau fakafeʻungaʻi ʻetau tokoní mo e akonakí ke feau ʻenau ngaahi fie maʻú.
Ke mahino lelei ange ʻa e ngaahi fie maʻu ko ʻení, ʻe lava ke talanoa e kau faiakó pea mo e kau taki ʻo e Palaimelí mo e fānaú pea mo ʻene mātuʻá, ʻa ia ko ha taimi lelei ia ke kamata fakamaheni ai e faiakó ki he fānaú. ʻOku faʻa meimei ko e feituʻu lelei taha pē ke fai ai ʻa e fakamahení ko hono ʻapí, he ko e feituʻu ia ʻokú ne ongoʻi fiemālie ange aí mo fetaulaki ai mo ha kakai foʻoú.
Ako pea Ngāue Fakataha
ʻOku totonu ke tuku taimi ʻa e kau faiakó mo e kau takí ke ʻiloʻi ʻa e faingataʻaʻia ʻo e fānaú. Ko ha feituʻu lelei ʻa e uepisaiti ʻa e Siasí lds.org/disability ke fakahoko ai ʻeni (ʻoku maʻu ʻi ha ngaahi lea fakafonua lahi), ʻa ia te nau lava ke lau ai e ngaahi fakamatala kau ki he ngaahi faingataʻaʻia fakaesino tukupau, ako ai e ngaahi founga akoʻí, pea maʻu ai mo ha toe ngaahi maʻuʻanga tokoni kehe.
Hili ha fakatotolo ʻa e kau faiakó mo e kau takí ʻi he uepisaití, ʻe lava ke nau toe talanoa mo e mātuʻa ʻa e fānaú ʻo vahevahe ha ngaahi fakakaukau, aleaʻi ha ngaahi meʻa ʻoku nau hohaʻa ki ai, pea fokotuʻu mo ha ngaahi taumuʻa. ʻE lava ke vahevahe ʻe he mātuʻá ha ngaahi fakamatala kau ki heʻenau fānaú ʻa ia ʻe tokoni ki he lavameʻa ʻa e kau faiakó, hangē ko e ʻiloʻi e founga ʻoku fetuʻutaki ai e fānaú, ʻa e ngaahi ʻekitivitī ʻokú ne fiefia aí mo ia ke fakaʻehiʻehi mei aí, mo e founga hono fakaʻaiʻai ʻo e ʻulungāanga ʻoku totonu ke hā meiate kinautolú. ʻOku mahuʻinga ʻa e ngāue mo e mātuʻá ki hono fokotuʻu ʻa e uouangatahá, ngāue fakatahá, mo e hokohoko atu ʻo e fetalanoaʻaki ʻe fie maʻu ke tokoniʻi lelei taha ai ha fānau ʻoku ʻi ai hono ngaahi faingataʻaʻia fakaesinó.
ʻOku totonu foki ke feongoongoi e kau faiakó mo e kau takí mo ʻenau kau taki lakanga fakataulaʻeikí ʻi heʻenau faʻufaʻu ha ngaahi founga ke tokoniʻi ʻaki e fānaú. ʻI he taimi ne fuofua fakahā mai ai ʻe he toketaá ʻoku moʻua homa fohá ʻi he autism, naʻe ʻikai ke ma ʻiloʻi pe ʻe fēfē haʻane hiki hake mei he nēsilií ki ha kalasi he Palaimelí mo hono toʻú. Naʻe haʻu ha fefine ko ha faiako ʻi homau uōtí, ki heʻemau pīsopé mo e palesiteni ʻo e Palaimelí ke ne hoko ko e tokoni ki homa fohá. Ne u fakataha mo ia, palesiteni Palaimelí, mēmipa ʻo e kau pīsopelikí, pea mo hoku husepānití, peá ne fakamatala mai e founga ke tokoniʻi ai homa fohá. Naʻa mau fokotuʻu ha ngaahi taumuʻa mo faʻu ha palani ke tokoni ke mahino kiate ia e founga angamaheni ʻa e Palaimelí. Naʻe faʻa fie maʻu ke mau fetongitongi e palaní ʻi he taʻu ʻe tolu hoko maí, ka ʻi heʻene ako ʻo mahino e ngaahi meʻa naʻe hoko takai ʻiate iá, naʻe kamata leva ke toe fakamānako ange ki ai e fengāueʻaki mo hono toʻú mo kau ʻi he ngaahi lēsoní. Naʻe hanga ʻe he mahino mo e loto ʻaki ʻe he fefiné ni e meʻa naʻá ne faí ʻo faʻu ʻa e fakavaʻe ʻoku kei hokohoko atu ke tuʻu ai homa fohá. Kuo hanga ʻe heʻene ʻofá mo e anga fakakaumeʻá ʻo akoʻi ange ko ha fānau ʻofeina ia ʻa e ʻOtuá. Koeʻuhí ko ia, ʻoku kei hokohoko atu ʻene hoko ʻa e maʻu lotú ko ha feituʻu ʻe lava ke ʻalu ki ai pea tali ai mo ʻofeina ia.
Fokotuʻu ha Feohi Fakakaumeʻa mo ha Falala
ʻI heʻetau hoko ko e kau faiakó, ʻe lava ke tau “muimui ʻi he sīpinga ʻa e Fakamoʻuí ʻo foaki ha ʻamanaki lelei, mahino, mo ha ʻofa kiate kinautolu ʻoku faingataʻaʻia fakaesinó.”3 ʻI heʻetau fakahā ʻa e tokanga moʻoni ki he fānau ʻoku faingataʻaʻia fakaesinó, ʻe tupulaki ai ʻetau feohi fakakaungāmeʻa mo kinautolú.
Mahalo ʻe kehe e fetuʻutaki ia ʻa e fānau ʻoku faingataʻaʻia fakaʻatamaí mei he niʻihi kehé. ʻI he taimi ko ē ʻoku ʻiloʻi ai ʻe he kau faiakó ʻa e founga fetuʻutaki fakafoʻituitui ʻa ha fānau, ʻoku lava leva ke nau fokotuʻu ha falala mo ha vā fakakaumeʻa ʻo nau hoko ai ko ha kau faiako lavameʻa ange. Ko ha founga ʻeni ʻe ua ke fakaleleiʻi ʻaki ʻa e fetuʻutakí:
-
Pukepuke e fetuʻutaki mata ki he matá.4 ʻI hono fakahoko ʻeni ʻe he kakai lalahí, ʻe siʻisiʻi ange ʻa e ongoʻi lotosiʻi ʻa e fānaú pea nau ongoʻi ʻoku lahi ange hono fakakau atu kinautolu ki he lēsoní. ʻE tokoni foki ia ki he fānau ʻoku faingataʻa ke tuku ʻenau tokangá ki ha meʻa ʻoku fai fakakulupu. ʻE lava ke maʻu ʻe he faiakó pe tokotaha tokoní e tokanga ʻa e fānaú pea ʻai pē mo ne vahevahe atu ha foʻi sētesi ʻe taha pe ua kau ki he lēsoní lolotonga e kalasí.
-
ʻAi ke ʻiloʻi e ngaahi meʻa ʻoku manako ai e fānaú. ʻOku ongoʻi ʻe he fānaú ʻoku ʻi ai honau mahuʻinga ʻi he taimi ʻoku fakahā ai ʻe he niʻihi kehé ʻoku nau manako ʻi he ngaahi meʻa ʻoku nau saiʻia aí. ʻOku faʻa pipiki e fānau ʻoku faingataʻaʻia fakaesinó ki ha faʻahinga meʻa, hangē ko ha meʻavaʻinga, ha monumanu, pe ha vaʻinga. ʻE lava ke kole ʻe he faiakó ki he fānaú ke fakamatala ki he ngaahi meʻa ʻokú ne manako aí pea ʻohake ʻa e meʻa ko ʻeni ʻoku manako aí ʻi he lēsoní. Neongo he ʻikai ke lea ʻa e fānaú, ka ʻe kei lava pē ke talanoa e faiakó kau ki he meʻa ʻokú ne manako aí.
Fakatahaʻi
ʻI he ngaahi meʻa lahi, ʻoku totonu ke ʻave ʻa e fānau ʻoku ʻi ai hono faingataʻaʻia fakaʻatamaí ki heʻene kalasi Palaimeli angamahení pē. ʻOku fakatou mahuʻinga ʻeni ki he fānaú mo hono toʻú. ʻOku tokoni hono fakatahaʻi kinautolú ke nau ako ai e founga feohi fakasōsiale totonú mo e ʻulungāanga ke fai ʻi he lotú mo teuteuʻi ai ia ki haʻane hiki hake ki he ngaahi kalasi ʻa e toʻu tupú. ʻI heʻenau fakataha ʻi ha kalasí, ʻe maʻu ai ʻe hono toʻú ʻa e ngaahi faingamālie ke tokoni mo aʻusia e ngaahi ʻilo taʻe-hano-tatau ʻe lava ke maʻu mei he fānau ʻoku ʻi ai honau ngaahi faingataʻaʻia fakaesinó. ʻE poupouʻi ʻe heʻenau fakatahá ʻa e feohi fakakaungāmeʻá—ʻa ia ko ha konga mahuʻinga ia ʻo ha ongoʻi ʻoku fakakau pea ʻoku fie maʻu kinautolu ʻi he lotú.
ʻI he taimi ne taʻu motuʻa feʻunga ai homa fohá ke hū ki he akó, naʻe faʻa tangutu maʻu pē ha kiʻi taʻahine ʻi hono tafaʻakí ʻi he Palaimelí. Ka ʻikai ke ne ʻalu ki he kalasí, ʻe hanga ʻe he kiʻi taʻahiné ʻo faʻu ha fanga kiʻi kaati mo ha ʻū fakatātā maʻana. Naʻe ʻikai lava ʻe homa fohá ʻo talamai hono hingoá, ka naʻá ne puke mai hono nimá mo ui ia “ko hoku kaumeʻá.” Naʻe hanga ʻe heʻena feohi fakakaungāmeʻá ʻo ʻoange kiate ia ʻa e ngaahi faingamālie ke ne ngāue mo tokoni ki homa fohá ke ne fiefia he ʻalu ki he lotú.
Ke fakafaingofuaʻi e ngaahi feohi fakakaungāmeʻá, ʻe ala fili ʻe he mātuʻá pe faiakó ke fakafeʻiloaki e fānaú ki hono toʻú ʻi he ʻuluaki ʻaho ʻo e kalasí pea fakamatalaʻi ia ko ha tokotaha—ʻo vahevahe hono ngaahi talēnití, ngaahi meʻa ʻoku poto aí, mo e ngaahi ʻekitivitī ʻoku manako aí. Hili iá pea ʻe lava leva ke nau talanoa kau ki hono faingataʻaʻiá koeʻuhí ke mahino ki hono toʻú ʻene ngaahi fie maʻú mo ha ngaahi tōʻonga ʻe ngali kehe kiate kinautolu. Kapau ʻe ongoʻi tauʻatāina e mātuʻá mo e kau taki ʻo e Siasí ʻi hono fakamatalaʻi ʻo e ngaahi meʻá ni, ʻe faʻa ongoʻi fiemālie ange hono toʻú ke fakakaungāmeʻa kiate ia.
Fakakaukau ke fai ha fetuʻutaki ki ha kau mataotao ʻe lava ke nau tokoni ki he kau faiako Palaimelí ʻi hono faʻu ha palani ʻe lava ke kau kakato mai ai ʻa e fānaú. ʻOku ʻi ai e taimi ʻe niʻihi ʻe fie feʻiloaki ai e faiako ʻa e fānaú ʻi ʻapiakó ke feʻiloaki mo e mātuʻá pea mo e kau taki ʻo e Palaimelí ke akoʻi kiate kinautolu ʻa e ngaahi founga ko ia ʻe ola lelei ki he fānaú ʻi ʻapiakó. Mahalo naʻa fie maʻu foki ʻe he faiakó ke ʻalu ki he lotú ʻo fakaʻaongaʻi ha ngaahi sīpinga ke nau sio ki ai.
ʻOku lava pē ke ʻi ai ha ngaahi fakaʻatā makehe he taimi ʻe niʻihi ʻo akoʻi mavahe ai pē ʻa e fānaú, pe ko hano fai pē ha ngaahi fetongi kehe ke feʻunga mo ia. ʻOku ʻomi ha toe ngaahi fakahinohino lahi ange kau ki he meʻá ni ʻi he konga maʻá e Palaimelí he Ngāue ʻi he Siasí he LDS.org5
Poupou ʻi Lokiakó
ʻE lava pē ke faingataʻa hono feau e ngaahi fie maʻu ʻa e fānaú kotoa ʻi ha faʻahinga kalasi Palaimeli pē. ʻI he taimi ʻoku kau ai ha fānau ʻoku ʻi ai hono faingataʻaʻia fakaesino ʻi he kulupu ko iá, ʻe fie maʻu ia ke ui ha kaungā-faiako pe ha tokoni faiako. ʻE taufetongi e kau kaungā-faiakó ʻi hono akoʻi ʻo e lēsoní mo tokoniʻi e fānaú, pe ko hano ui ha tokoni ke ngāue tāfataha pē ia mo e fānau ʻoku ʻi ai hono faingataʻaʻia fakaesinó. ʻOku totonu ke fakafekauʻaki ʻe he kau ngāue ʻi he Palaimelí ʻa e taimi-tēpile ʻo e ngaahi lēsoní, faʻufaʻu ha founga fetuʻutaki, mo aleaʻi e founga te nau fai ʻi ha ngaahi tūkunga kehe ʻe hoko. Hangē ko ia ʻoku fie maʻu maʻu peé, ʻoku mahuʻinga ʻaupito e lotú, fetuʻutakí, mo e palani ke ola lelei ʻa e ngāue fakatahá mo faiako ke fakamāmaʻi e fānaú.
ʻI hono uiuiʻi ʻo ha kaungā-faiako pe tokoní, fakaʻatuʻi e ngāue ʻa e mātuʻá mo ʻenau fānaú pea mo ʻenau feʻao mo e ngaahi faingataʻa ʻoku hoko ʻi hono ʻohake ʻo ha fānau ʻoku faingataʻaʻia fakaesino ʻi he houa ʻe 24 he ʻahó. Te nau fie maʻu ha faingamālie ke nau ō ai ki heʻenau ngaahi kalasí he ʻaho Sāpaté pe fakahoko ha ngaahi fatongia kehe; ʻe ala tokoni e kiʻi mālōlō ko ʻení ke fakafoʻou ai honau iví mo teuteu atu ke fehangahangai mo e ngaahi tukupā ʻo e uike hoko maí.
Fulihi e Palani ʻo e Ngaahi Lēsoní ke Feʻunga
ʻOku akoʻi ʻi he tohi tuʻutuʻuni ʻa e Siasí “ʻoku totonu ke fakakau kakato ʻe he kau takí mo e kau faiakó ʻa e kāingalotu ʻoku faingataʻaʻia fakaesinó ʻi he ngaahi fakatahaʻangá, ngaahi kalasí, mo e ngaahi ʻekitivitií ʻi he lahi taha ʻe lavá. ʻOku totonu ke fulihi e ngaahi lēsoní, ngaahi malangá, mo e ngaahi founga fakafaiakó ke ne feau e ngaahi fie maʻu ʻa e tokotaha takitaha.”6 ʻOku fie maʻu ʻa e lotú, mohu fakakaukaú, mo e ngāué ki hono akoʻi ʻo e ngaahi lēsoní ʻi ha founga te ne feau e ngaahi fie maʻu ʻa e kāingalotú.
Kamata ʻaki ha fekumi ke ʻiloʻi e founga lelei taha ʻe ako ai e fānaú. ʻOku ʻi he fehokotakiʻanga ko e Leader and Teacher Resources ʻi he lds.org/disability ʻa e fakamatala kau ki hono fulifulihi e ngaahi lēsoní ke feʻungá. ʻOku lisi ʻi lalo he ʻuluʻi fakamatala ʻo e faingataʻaʻia fakaesino takitaha mo ha toe ngaahi fokotuʻu. Ko ha maʻuʻanga tokoni fakaʻofoʻofa ʻe taha e konga ʻa e Palaimelí ʻi he Ngāue he Siasí ʻi he LDS.org. ʻE ʻaonga pē foki ki he fānau kehé ʻa e ngaahi fulifulihi ko ia ʻe fai ke feʻunga mo ha fānau ʻoku ʻi ai hano faingataʻaʻia fakaesinó. Naʻe ʻaonga e ngaahi founga ko ʻení kiate au:
-
Ngaahi fakatātaá: ʻOku tokolahi e fānau ʻoku nau ako mei he ngaahi fakatātaá, ʻa ia ko e pehē ʻoku tokoni e ngaahi fakatātaá pe ngaahi meʻa ʻoku nau sio ki aí ke mahino e ngaahi fakakaukaú kiate kinautolu. ʻE lava ke nofo e kaungā-faiakó pe tokoní ʻi he tafaʻaki ʻo e fānau ʻoku faingataʻaʻia fakaesinó he taimi lēsoní kotoa ʻo fakaʻaliʻali ki ai ha ngaahi tā fakatātā pe ngaahi fakatātā ke fakahaaʻi ʻaki e meʻa ʻoku akoʻí. Kapau ʻoku manako e fānaú he tā fakatātaá, mahalo pē te ne fie maʻu ha laʻipepa ke tā ai mo hono tokoní. Te na lava ʻo tā fakataha e ngaahi meʻa ko ia ʻoku lau ki ai he lēsoní.
-
Fanongó: Ko e fānau ko ia ʻoku nau ako ʻaki ʻenau fanongó, ʻoku nau manako he fanongo ki he ngaahi talanoá. ʻOku nau saiʻia foki ʻi hono fakaʻaongaʻi ʻe he faiakó ʻa hono leʻó ke fakatātaaʻi ʻaki e talanoá—ʻi haʻane fanafana, anga hono leʻó ʻi haʻane ʻohovale, pe ko e toe vave ange hono leʻó ʻi he ngaahi konga ʻoku mālié. ʻE fie maʻu ke hanga ʻe he faiakó ʻo ʻai ke faingofua pe fakanounou e ngaahi talanoa mei he lēsoní ke lava ʻo mahino ki he fānau ʻoku faingataʻaʻia fakaesinó pea kei fie fanongo ki he lēsoní. Fakakaukauʻi hano fai e talanoá pea toʻo e ngaahi tefitoʻi moʻoní mei he talanoá ʻo fakaʻaongaʻi ia ki ha meʻa moʻoni ʻoku hoko pe ha talanoa pe meʻa ʻoku maheni mo e fānaú.
-
Alá: ʻOku fiefia e fānau ʻoku nau ako ʻi heʻenau ala ʻo pukepuke mo ongoʻi ha meʻa. Kapau ʻoku hoko ʻi tuʻa ha talanoa ʻi he lēsoní, ʻe lava ke ʻomai ʻe he faiakó ha foʻi maka ʻoku hamolemole, vaʻakau, pe ha kiʻi manu meʻavaʻinga molū ke fakaʻaliʻali lolotonga hono fai ʻo e talanoá pea paasi takai e meʻa ko iá ke ala mo vakavakaiʻi ʻe he tokotaha kotoa pē. Ko e ngaahi meʻa ʻaonga ʻe niʻihi ʻa e fanga kiʻi meʻa fakameaʻá mo ha ngaahi peesi ke valivali.
Kau ʻi he Taimi Feʻinasiʻakí mo e Ngaahi ʻEkitivitī Kehé
ʻOku mahuʻinga ke kau he lēsoní ʻa e fānau ʻoku ʻi ai honau ngaahi faingataʻaʻia fakaesinó. Mohu founga ʻi hono kumi ha ngaahi founga ke fakakau ai kinautolu ʻi he lau folofolá, lotú, mo taufetongi ʻi hono fai e lea ʻi he taimi feʻinasiʻakí. Hangē ko ʻení, kapau ʻoku faingataʻa ki ha fānau ke lea, mahalo pē ʻe lava ke ne fakaʻaongaʻi ha ngaahi fakatātā ke fai ʻaki ʻene fetuʻutakí. Pe ʻoku ʻi ai e fānau ia ʻe niʻihi te nau saiʻia he tuʻu mei muʻá ka ʻoku nau fuʻu mā pe ʻikai pē ke nau fie lea kinautolu. ʻI heʻene peheé leva, tuku ke ne tuʻu pē ia ʻi muʻa mo fiefia ai kae tokoni ki ai ʻene mātuʻá ʻo fai ʻene leá maʻana. Te ne lava ʻo tokoni ʻaki hono pukepuke hake ʻa e fakatātā ki heʻene leá pe hoko ko ha sīpinga ʻi heʻene kūnima he lotú.
Ko ha ngaahi ʻekitivitī kehe ʻeni ʻe niʻihi mo e faʻahinga fulifulihi te ke ala fakakaukauʻi ke feʻungá:
-
Polokalama sākalamēniti ʻa e Palaimelí. ʻE fie maʻu ʻe ha fānau ʻoku faingataʻaʻia fakaesino ha poupou lahi ange mo ha faʻahinga meʻa ʻoku faingofua ke fetongi he ʻoku ʻikai ko ha konga e polokalama sākalamēnití ʻo e ngaahi meʻa ʻoku anga maʻu pē ki aí. ʻE tokoni hano fakakau ia ki ha ngaahi ako polokalama lahi ke mahino mo e ngaahi liliú. Ko e fakakaukau lelei ia ke nofo e fānaú ʻo hoko atu ki hono tokoniʻí ke ne lava ʻo fakamanatu ange e ngaahi hivá pe ko ʻene leá kimuʻa pea faí. Kapau ʻoku faingofua ke ne ongoʻi lōmekina ʻi he longoaʻá pe ko ʻene mamata atu ki he haʻofanga, ʻai pē ha sea he tafaʻakí ofi pē ki muʻa ke ne nofo ai mo hono tokoní. ʻE lava leva ke ne valivali, sio fakatātā ʻi ha tohi, pe hū ki tuʻa kae ʻikai fakahohaʻasi e fānau kehé. ʻE lava foki ai ke ne ʻalu ki muʻa ʻo fai ʻene lea pe hiva, pea foki mai ki he seá ke ne ongoʻi fiemālie. Mahalo ʻe sai pē ki ha fānau ia ʻe taha ke nofo mei muʻa ka ʻe fie maʻu ha fanga kiʻi meʻa ia ke ne nonga ai, hangē ko ha meʻa fakamaʻu pepa ʻe ua pe tolu pe ha foʻi maka molemole ke ne pukepuke pē ʻi hono fungá. ʻE ʻaonga ʻeni ki he fānau ʻoku faingataʻa ke nau tokanga ʻi ha ngaahi kulupu tokolahi.
-
Taimi Feʻinasiʻakí Kapau ʻoku ʻoange ki he kalasi ʻoku ʻi ai ha fānau ʻoku faingataʻaʻia fakaesino ke nau kau ʻi he taimi feʻinasiʻakí, fakapapauʻi ʻoku fakakau ʻa e fānau ko iá ʻi ha founga ʻe fakafiemālie kiate iá. Kapau ʻoku fai ʻe he kalasí ha kiʻi foʻi faiva, ʻe lava pē ke ʻoange haʻane kiʻi lea nounou, pe ʻoua ʻe ʻoange haʻane lea kae ʻai pē hano teuteu fakataha mo e fānau kehé pea te ne ongoʻi ʻoku kau. ʻOku mahuʻinga ke ne vahevahe mo hono toʻú e ngaahi meʻa kuó ne aʻusiá ke fakatupulaki honau vā fetuʻutakí.
-
Ngaahi polokalama lahi ange. Kapau ʻoku kau e Palaimelí ʻi ha ʻekitivitī hangē ko ha fakaʻaliʻali talēniti ʻa e uōtí pe koló pe ha polokalama Kilisimasi pea ʻoku ʻikai ke saiʻia e fānau ʻoku faingataʻaʻia fakaesinó ʻi he longoaʻá pe tokolahí, ʻai ke ʻuluaki kamata e polokalama ʻene kalasí. Pea ʻe lava leva ke ʻave ia ki ʻapi ʻe heʻene mātuʻá ʻo ka fie maʻu kimuʻa peá ne ongoʻi lōmekina.
Utu e Ngaahi Tāpuakí
ʻOku ou fakamālō ki heʻeku tamasiʻi ʻoku moʻua ʻi he autism, he ʻoku ou maʻu ai ha ʻilo foʻou ki hono mahuʻinga ʻo ʻete hoko ko e fānau ʻa e ʻOtuá. Kuó u ako ʻo ʻiloʻi ʻoku ʻafioʻi mo ʻofa moʻoni ʻa e Tamai Hēvaní ʻiate kitautolu fakafoʻituitui. ʻOkú Ne ʻafioʻi ʻetau ngaahi fie maʻú peá Ne ueʻi e ngaahi mātuʻá mo e kau takí ʻi he Laumālie Māʻoniʻoní ke nau tokangaʻi mo faitāpuekina e moʻui hotau ngaahi fāmilí mo e fānau ʻoku tau tokoniʻí. Kuó u maʻu foki ha loto houngaʻia mo ha ʻofa ki he kau faiako Palaimeli ʻa ʻeku tamasiʻí mo e kau taki ʻo e Siasí kuo nau tuku ha taimi ke fakakaungāmeʻa ai mo ia. Ko ha ngaahi sīpinga fakaʻofoʻofa kinautolu ʻo e ʻofa ʻa e Fakamoʻuí.
ʻOku fie maʻu ha taimi mo ha ngāue lahi ange ki hono akoʻi ʻo ha fānau ʻoku faingataʻaʻia fakaʻatamai, pea taimi ʻe niʻihi ʻoku faʻa ʻi ai e ngaahi momeniti ʻoku hoko ai e taʻefiemālie mo e hela. Ka te tau lavameʻa ʻi heʻetau fakahoko hotau ngaahi fatongia tauhi ke tokoniʻi e fānau makehe ko ʻení ʻi he lotu, ueʻi ʻa e Laumālié, mo e falala ki he ʻEikí.
Ko hono fai ʻe Ketinī T., taʻu ono, ʻa ia ʻoku moʻua ʻi he Down syndrome, ha lea ʻi he Palaimelí pea tokoni ange hono tuongaʻane ko Sasitiní. ʻOku akoʻi mai ʻe he tohi tuʻutuʻuni ʻa e Siasí “ʻoku totonu ke fulihi e ngaahi lēsoní, ngaahi malangá, mo e ngaahi founga fakafaiakó ke ne feau e ngaahi fie maʻu ʻa e tokotaha takitaha.”
Ko Tanieli Fekasoní, ʻa ia ʻoku ʻaʻana e fakamatalá, mo ʻene tama ko ʻAisaké, ʻa ia ʻoku moʻua ʻi he autism.
Ko ʻEmelī S. mo ʻene tamasiʻi taʻu fā ko Lenitoní, ʻa ia naʻe ʻikai kakato e tupu e ngaahi konga ʻo hono sinó, (pervasive developmental disorder) ʻokú ne talanoa mo Tēpola Malufi, ko e palesiteni Palaimelí, ʻo kau ki he ngaahi meʻa ʻoku manako ai ʻa Lenitoní mo ha ngaahi founga ʻe ola lelei ai hono akoʻi iá. ʻE lelei taha pē hono tokoniʻi ha fānau ʻoku faingataʻaʻia fakaesinó ʻi he taimi ʻoku ngāue fakataha ai e fānaú mo ʻene mātuʻá mo e kau takí ʻi he laumālie ʻo e uouangatahá mo e ngāue fakatahá.
ʻOku fakatou tokoni hono fakatahaʻi ʻo e fānaú ʻi ha kalasi Palaimeli pē mo ha fānau ʻoku faingataʻaʻia fakaʻatamaí mo hono toʻú. ʻOku hā heni ʻa ʻOtilī S. ʻokú na lau folofola mo ʻAisake.
ʻOku manako ʻa Pulukilini C. (fika tolu mei toʻohemá), taʻu fā pea ʻoku moʻua ʻi he autism, he taimi hiva ʻi he Palaimelí; ʻoku pehē ʻe heʻene ongomātuʻá naʻá ne saiʻia maʻu pē ia he mūsiká, pea ʻoku toe fakamānako ange foki kia Pulukilini mo e fānau kehé ʻenau fakatātaaʻi ʻaki honau louhiʻinimá.
Toʻohemá: faitā ʻa Robert Casey; toʻomataʻú: faitā ʻa Erin Jensen
Toʻohemá: faitā ʻa Robert Casey; toʻomataʻú: faitā ʻa Erin Jensen
Ngaahi faitā ʻa Robert Casey