Kiʻi Tohi Fakamatala ʻo e Konifelenisi ʻo ʻOkatopá
“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).
ʻI hoʻomou ako ko ia ʻa e konifelenisi lahi ʻo ʻOkatopa 2011, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Konifelenisi ʻi he ngaahi pulusinga he kahaʻú) ke tokoni atu ki hoʻo ako mo fakaʻaongaʻi ʻa e ngaahi akonaki fakamuimuitaha ʻa e kau palōfita mo e kau ʻaposetolo moʻuí.
Ko ha Talaʻofa Fakaepalōfita
“Ka ‘oku pau e ola ia ‘oku maʻu ʻe he Tohi ʻa Molomoná ki ho ʻulungāangá, mālohí, mo e lototoʻa ke hoko ko ha fakamoʻoni ʻo e ʻOtuá. ʻE hanga ʻe he tokāteline mo e ngaahi sīpinga lototoʻa ʻi he tohi ko iá ʻo hiki hake, tataki mo fakamālohia koe.
“ʻE faitāpuekina e faifekau kotoa pē ʻokú ne talaki e huafa mo e ongoongolelei ʻo Sīsū Kalaisí, ʻi heʻene keinanga fakaʻaho mei he Tohi ʻa Molomoná. Ko e ngaahi mātuʻa ko ia ʻoku fefaʻuhi ke fakatō ki he loto ʻo e fānaú ha fakamoʻoni ʻo e Fakamoʻuí, ʻe faitokonia kinautolu ʻi heʻenau fekumi ki ha founga ke ʻomi ʻaki e fakalea mo e laumālie ʻo e Tohi ʻa Molomoná ki ʻapi mo e tokotaha kotoa pē ʻi he fāmilí.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ko ha Fakamoʻoni,” Liahona, Nōvema 2011, 69.
Ki he Houʻeiki Fafine ʻo e Siasí
“Naʻe fakataumuʻa koe ke ke aʻusia ha meʻa lahi ange ʻi hoʻo fakakaukaú. Hokohoko atu hoʻo tupulaki ʻi he tuí mo e angatonu fakafoʻituituí. Tali ʻa e ongoongolelei ʻo Sīsū Kalaisi kuo toe fakafoki maí ko hoʻo founga moʻuí ia. Mataʻikoloa ʻaki ʻa e meʻafoaki ko e mālohi he Siasi moʻoni mo maʻongoʻongá ni. Mataʻikoloa ʻaki ʻa e meʻa foaki ko e ngāue ʻi he kautaha mohu tāpuekina ko e Fineʻofá. Hokohoko atu hoʻo fakamālohia e ngaahi ʻapí mo e fāmilí. Hokohoko atu hoʻo fekumi mo tokoniʻi ʻa kinautolu ʻoku nau fie maʻu hoʻo tokoní pea mo e tokoni ʻa e ʻEikí.”
Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “ʻOua Naʻa Ngalo Au,” Liahona, Nōvema 2011, 123; toki tānaki atu hono fakamamafaʻí.
Ko Hono ʻIloʻi ʻIate Koe Peé
“Ko Sīsū Kalaisi pē ʻa e ʻAlo Tofu Pē ʻe Taha naʻe Fakatupú pea ko e ʻAlo ʻOfaʻanga Ia ʻo e ʻOtuá. Ko Ia ʻa hotau Tupuʻangá. Ko Ia ʻa e Maama ʻo e Māmaní. Ko Ia ʻa hotau Fakamoʻui mei he angahalá mo e maté. Ko e ʻilo mahuʻinga taha ʻeni ʻi he māmaní, pea te ke lava ke ʻiloʻi ia.”
ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ngaahi Akonaki ʻa Sīsuú,” Liahona, Nōvema 2011, 93.
Ngaahi Tali Maʻaú
ʻI he konifelenisi kotoa pē, ʻoku ʻomi ai ʻe he kau palōfitá mo e kau ʻaposetoló ha ngaahi tali fakalaumālie ki ha ngaahi fehuʻi ʻa e kāingalotu ʻo e Siasí. Fakaʻaongaʻi hoʻo makasini konifelenisí pe vakai ki he conference.lds.org ke maʻu mei ai e ngaahi tali ki he ngaahi fehuʻi ko ʻení:
-
ʻOku ʻuhinga nai ki he hā ko e “fānau kitautolu ʻo e fuakavá”? Vakai, Russell M. Nelson, “Ngaahi Fuakavá,” 86.
-
Ko e hā ʻoku hoko ai e ngaahi meʻa fakamamahí ki he kakai leleí? Vakai, Robert D. Hales, “Ko e Tatali ki he ʻEikí: Ke Fai Pē Ho Finangaló,” 71; mo e Quentin L. Cook, “Ko e Hiva Naʻe ʻIkai Lava Ke Nau Hivaʻí,” 104.
-
Ko e hā ʻoku tau kei fie maʻu ai e Tohi ʻa Molomoná ʻo kapau kuo tau ʻosi maʻu e Tohi Tapú ke ne akoʻi kitautolu ʻo fekauʻaki mo Sīsū Kalaisi? Vakai, Tad R. Callister, “Ko e Tohi ʻa Molomoná—ko ha Tohi mei he ʻOtuá,” 74.
-
Te u ʻilo fēfē ʻa e meʻa ke faí ʻi he taimi ʻoku ou fefaʻuhi ai mo ha palopalemá? Vakai, Barbara Thompson, “Maʻu Fakahā Fakatāutahá mo e Fakamoʻoní,” 9.
Tā valivalí ne fai ʻe Paul Mann; Tā valivali ʻo e ʻū taá ne fai ia ʻe Les Nilsson, Weston Colton, Derek Israelsen, Craig Dimond, mo Thiago Leon de Oliveria Quiroz
Fakaikiiki mei he Christ with Boy, ne tā ʻe Carl Heinrich Bloch; faitaá ne fai ʻe Emily Leishman