Kuo Foaki Mai ʻe he ʻEikí ha Fono ʻo e Moʻui Leleí

Ko e taha ʻo e ngaahi tāpuaki maʻongoʻonga taha naʻa tau maʻu ʻi heʻetau haʻu ki he māmaní ko ha sino fakamatelie. ʻOku māʻoniʻoni mo mahuʻinga fau hotau sinó ʻoku ui ai ia ʻe he ʻEikí ko e temipale ʻo e ʻOtuá (vakai, 1 Kolinitō 3:16). ʻOkú Ne fakahā mai foki ʻoku ʻikai ha taha ʻo ʻEne ngaahi fekaú ʻe fakamatelie ka ʻoku “fakalaumālie [kotoa] ʻa [ʻEne] ngaahi fekaú” (T&F 29:35). Ko ia ko ʻEne ngaahi fekau ʻoku fekauʻaki mo ʻetau moʻui lelei fakatuʻasinó ʻoku maʻa ʻetau lelei fakalaumālié foki ia (vakai, T&F 89:19–21).

Koeʻuhí ko e finangalo ia ʻo ʻetau Tamai Hēvaní ke tau tokangaʻi lelei hotau sinó, naʻá Ne fakahā mai ai ha fakamatala mahuʻinga kau ki hono fakahoko ʻení. ʻOku maʻu e konga lahi ʻo e fakamatala ko ʻení ʻi he Tokāteline mo e Ngaahi Fuakava 89 pea ʻoku ʻiloa ia ko e Lea ʻo e Potó.

ʻOku tau ako heni ha ngaahi meʻa lahi ʻoku totonu pea ʻikai totonu ke tau fai ke moʻui lelei ai hotau sinó. Ko e laumālie ʻo e fono ko ʻení ke kai ʻa e ngaahi meʻakai fakatupu iví pea ʻoua ʻe fakaʻaongaʻi ha meʻa ʻe tupu haʻatau ʻulungāanga ʻaki pe fakatuʻutāmaki ki hotau sinó. ʻOku kau ʻi he ngaahi meʻa ʻoku fekauʻi ʻe he ʻEikí ke ʻoua naʻa tau ʻai ki hotau sinó ʻa e kava mālohí mo e tapaká, ʻa ia ko ha faitoʻo kona tapu (vakai, T&F 89:5–8). ʻOku ʻikai totonu ke tau fakaʻaongaʻi ha faʻahinga faitoʻo kona tapu tuku kehe ʻo ka ʻaonga ia ko ha faitoʻo. Ko kinautolu ʻoku nau ngāue hala ʻaki ʻa e faitoʻo ʻoku fakalao pe taʻefakalaó, ʻe fie maʻu ke nau fekumi ki ha tokoni kae toe maʻa honau sinó mo ʻataʻatā mei he maʻunimaá. ʻE nofoʻia ange ʻe he Laumālie Māʻoniʻoní ha sino ʻoku maʻa.

ʻOku faleʻi foki kitautolu ʻe he ʻEikí ke ʻoua naʻa tau fakaʻaongaʻi ʻa e “ngaahi inu velá” (T&F 89:9). Kuo fakamatalaʻi e he kau palōfitá ʻoku ʻuhinga ʻeni ki he kofí mo e tií, ʻa ia ʻoku ʻi ai ha ngaahi meʻa fakatuʻutāmaki. ʻOku totonu ke tau fakaʻehiʻehi mei he ngaahi inu kotoa pē ʻo tatau ai pē pe ko e inu vela pe momoko ka ʻoku ʻi ai ha ngaahi meʻa fakatuʻutāmaki.

ʻOku totonu foki ke tau fakaʻehiʻehi mei ha faʻahinga meʻa pē ʻoku fakatuʻutāmaki ki hotau sinó, hangē ko e kai lahí pe fakafisi ke kai ha meʻakai fakatupu moʻui lelei feʻunga ke tau kei moʻui lelei ai.

Makehe mei he ngaahi meʻa ʻoku talamai ʻe he Lea ʻo e Potó ʻoku ʻikai totonu ke tau faí, ʻokú ne talamai foki mo e ngaahi meʻa ko ia ʻoku totonu ke tau faí. ʻOku fakahaaʻi atu heni ha konga lahi ʻo e ngaahi meʻa ko iá.

Ko kinautolu ʻoku talangofua ki he fono ʻo e moʻui lelei ʻa e ʻEikí, “te nau maʻu ʻa e moʻui lelei ki honau pitó mo e uho ki honau ngaahi huí; pea te nau maʻu ʻa e potó mo e ngaahi fuʻu koloa mahuʻinga ʻo e ʻiló, ʻio ʻa e ngaahi koloa mahuʻinga fufū; pea te nau lele kae ʻikai ongosia, pea ʻalu ʻo ʻikai pongia” (T&F 89:18–20).

Kuo fakahā ʻe he ʻEikí ʻi he Lea ʻo e Potó pea ʻi ha ngaahi potufolofola kehe ʻa e ngaahi fakahinohino fekauʻaki mo e moʻui leleí:

Ke ngāue ʻaki ʻa e fuaʻiʻakaú, vesitapoló, mo e ʻakau iiki ʻoku fakamoʻuí “ʻi hono faʻahitaʻu totonú” pea “ʻi he anga-fakapotopoto mo e fakafetaʻi” (vakai, T&F 89:10–11).
Ko e kakano ʻo e fanga manú mo e fanga manupuná kuo “[tuʻutuʻuni] ke fakaʻaongaʻi ʻe he tangatá ʻi he fakafetaʻi; ka ʻoku totonu ke ngāue fakasiʻisiʻi ʻaki ia” (T&F 89:12).
“ʻOku lelei ʻa e kēleni kotoa pē ki he meʻakai ʻa e tangatá” (T&F 89:16).
‘Oku ‘ikai totonu ke tau “ngāue ʻo lahi ange ʻi he ivi ʻoku [tau maʻú]” (T&F 10:4).
ʻOku totonu ke tau fakatupulaki ʻa e ʻulungāanga totonu fekauʻaki mo e mohé koeʻuhí “ke longomoʻui ʻa [hotau] sinó mo [hotau] ʻatamaí” (T&F 88:124).

ʻI laló: tā fakatātaaʻi ʻo e ʻatá ʻe he © Getty Images; toʻomataʻú: tā fakatātaaʻi ʻo e ʻū ʻatá ʻe Welden C. Andersen, John Luke, Robert Casey © Corbis