He ʻIkai Ke u Teitei Tuēnoa ʻi Heʻeku Tui ki he ʻOtuá

Fai ʻe Donna Hollenbeck

“ʻOku fakamoʻoni ʻe he Laumālie pē ko iá mo hotau laumālié, ko e fānau ʻa e ʻOtuá ʻa kitautolu” (Loma 8:16).

“ʻOku ʻikai te ke teitei tuēnoa ʻi he taimi ʻokú ke tui ai kia Sīsū Kalaisi mo e Tamai Hēvaní.” Kuo tuʻo lahi ʻeku fanongo ʻi he ngaahi kupuʻi lea peheni hangē ko ʻení, ka ne teʻeki ai ʻaupito ke mahino lahi pehē kiate au ʻo hangē ko e mahino ʻoku ou maʻu he ʻaho ní.

Ko e tokotaha kotoa pē ʻe iku fehangahangai mo e foʻi moʻoni ko ia ʻe ʻi ai e ʻaho te ne toko taha ai pē. Ne u aʻusia ʻe au e ʻaho ko ʻení kimuʻa pē ia ʻi he taimi ne u ʻamanaki ʻe hoko aí ko e tupu mei heʻeku vete mo hoku malí, mavahe ʻa e fānaú mei ʻapí, mo ʻeku mālōlō mei he ngāué kimuʻa he taimi totonú. Ko e faingataʻa lahi taha ne u fie maʻu ke u lavaʻí ko e fakafokifā ʻeku nofo lōngonoa mo toko taha hili ia e ngaahi taʻu lahi ʻo ha taimi mahuʻinga ne u fakataha ai mo hoku fāmilí mo e kaungāmeʻá, malí mo e fānaú, mo e kaungā ngāué.

Neongo ne u fiefia he ʻaʻahi ange ʻeku ongo faiako ʻaʻahí mo e faiako fakaʻapí mo hoku ngaahi kaumeʻa kehé, ka ko e taimi lahi ne u ongoʻi tuēnoa ʻaupito, pea naʻe ʻikai ke u saiʻia ai. Naʻe faifai pē ʻa e lōngonoá pea ʻikai ke u kei mapuleʻi hoku loʻimatá. Ne ʻikai ha feituʻu ke u hanga ki ai ke maʻu ha fakafiemālie ka ke u tūʻulutui pē ʻo lotu.

Hili haʻaku tangi ki he Tamai Hēvaní ʻi ha taimi lōloa, ne kamata ke hoko ha liliu ʻi hoku lotó, pea ne u ongoʻi ʻa e Laumālie ʻo e Tamai Hēvaní. Ne kiʻi tuʻu hoku loʻimatá ʻi heʻeku ongoʻi ʻa e hū mai ʻEne ʻofá ki hoku laumālié. Ne u ʻiloʻi naʻe mahino kiate Ia ʻa hoku loto mamahí, peá u ongoʻi fiemālie ai pē ke toe lōloa ange ʻeku tangí, ʻo hangē ko ha tangi ʻa ha kiʻi tamasiʻi naʻe tō ki lalo ʻi heʻene sio ko ia ki heʻene faʻeé. ʻI heʻeku fakakaukau ʻo hangē ʻoku ou ʻolunga atu ʻi he funga ʻo e Tamai Hēvaní, ne u ʻiloʻi ʻa ʻEne loto ke fakafiemālieʻi au ki he lōloa taha te u fie maʻú. Ne faʻa ʻalu hake ʻeku fakakaukau kuó u fuʻu motuʻa ke fai peheni. Ka ne u ʻiloʻi naʻe ʻikai mahuʻinga ki he Tamai Hēvaní pe naʻá ku motuʻa pe kei talavou. Ko e meʻa pē ne u ʻiloʻí ʻokú Ne ʻafioʻi au pea te Ne ʻi ai maʻu pē ke tokoniʻi au.

ʻI he ʻahó ni, kuo kamata ke u fiefia pē ʻi he lōngonoá, neongo ʻeku kei fie malí. ʻOku ou fakafanongo ki he ngaahi peau ʻo tahí mo mamata ʻi he tō ʻa e laʻaá. ʻOku ou tuʻu hifo ʻo nāmuʻi e ngaahi matalaʻi losé. ʻOku ou fakafanongo mo ngāue ʻo fakatatau ki he tataki ʻa e Laumālié. ʻOku ʻikai te u manavahē heʻeku toko tahá he ʻoku ʻikai ke u teitei tuēnoa ʻo kapau te u tui ki he Tamai Hēvaní mo Sīsū Kalaisi. ʻOku ou mamata ki he Laumālie ʻo e Tamai Hēvaní mo Sīsū Kalaisi ʻi he meimei meʻa kotoa pē ʻoku ou fai.

“ʻOku ʻikai te ke tuēnoa ʻi hoʻo tui kia Sīsū Kalaisi mo e Tamai Hēvaní.” ʻI he ʻaho ní, ʻoku ʻi ai ha ʻuhinga foʻou mo loloto ʻo e ngaahi leá ni ʻi hoku lotó, pea ʻoku ou ʻiloʻi taʻeveiveiua ʻoku ʻikai ke u teitei tuēnoa. Ko Hono ʻofefine au, pea ʻokú Ne ʻofa ʻiate au.

Ke maʻu ha fakamatala lahi ange kau ki he tefitó ni, vakai, Siosefa Sāmita—Hisitōlia 1:5–20; Robert D. Hales, “Ko Hono Maʻu ʻo ha Fakamoʻoni ki he ʻOtua ko e Tamaí; Hono ʻAlo ko Sīsū Kalaisí, pea mo e Laumālie Māʻoniʻoní,” Liahona, Mē 2008, 29; mo e Susan W. Tanner, “Ngaahi ʻOfefine ʻo e Tamai Hēvaní,” Liahona, Mē 2007, 106.

Ko e Hā ʻOku ʻOfa ai ʻa e Tamai Hēvaní ʻIate Kitautolú?

“ʻOkú Ne ʻofaʻi kitautolú he ʻokú Ne fonu ʻi ha ʻofa ʻoku māʻoniʻoni, maʻa mo taʻe-fakangatangata ʻoku ʻikai lava ke fakamatalaʻi. ʻOku tau mahuʻinga ki he ʻOtuá ʻo ʻikai koeʻuhi ko hotau ongoongó, ka koeʻuhi ko ʻEne fānau kitautolu. ʻOkú Ne ʻofa ʻiate kitautolu ʻo aʻu kiate kinautolu ʻoku tōnounoú, liʻekiná, faingatāmakí, mamahi pe loto laveá. ʻOku lahi fau e ʻofa ʻa e ʻOtuá ʻa ia ʻoku aʻu ʻEne ʻofá ki he hīkisiá, siokitá, fiemeʻá mo e angahalá.

“ʻOku ʻuhinga ʻeni, neongo pe ko e hā hotau tuʻunga lolotongá, ʻoku ʻi ai ha ʻamanaki lelei kiate kitautolu. Tatau ai pē pe ko e hā hotau faingataʻaʻiá, tatau ai pē pe ko e hā hotau mamahí, tatau ai pē pe ko e hā ʻetau fehālākí, ʻoku fie maʻu heʻetau Tamai Hēvani ʻofa taʻe-fakangatangatá ke tau ʻunuʻunu ke ofi kiate Ia koeʻuhí kae lava ʻo ʻunuʻunu ʻo ofi mai kiate kitautolu.”

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Ko e ʻOfa ʻa e ʻOtuá,” Liahona, Nōv. 2009, 22–23.

Tā fakatātaaʻi ʻo e ʻatá ʻe Robert Casey