Vakai Naʻá Ke Tafia
ʻOku fakamatala ha finemui Tonga ki he ʻuhinga lelei ʻo e ʻi ai ha ngaahi ʻā pamu maluʻí.
ʻOku fakaofo ʻa e fakaʻofoʻofa mo e mālohi ʻo e pupuʻa puhi ko Mapu ʻa Vaeá ʻi Tongá. ʻI he haʻu ʻa e peaú ʻo faʻaki ʻi he ʻotu maka maile ʻe tolu (km ʻe 4.8) ko ʻeni ʻi he matāfanga ʻo e motu ko Tongatapú, ʻoku hū atu ia ʻi ha ngaahi ava ʻe lauteau ʻi he maka velá ʻo ne puhiʻi hake ʻa e tahí ki he ʻataá ʻi ha fute nai ʻe 60 (m ʻe 18).
ʻOku manako ʻa Saane F., taʻu 16, ʻi he fakaʻofoʻofa ʻo e feituʻú—ʻa e fetāiaki lelei ʻa e laʻaá mo e aafu ʻo e puhi ʻa e foʻi peau kotoa pē.
Ka neongo e fakaʻofoʻofa ʻo e mālohi ʻo natulá ʻe toe lava pē ke fakatuʻutāmaki. Kuo ʻi ai ha kau ʻaʻahi ne nau fuʻu ofi ki ai, ʻo tatau pe ko ʻenau fie ʻilo pe koeʻuhí pē ko ʻene fakaʻofoʻofá, ʻo ʻikai ke nau fakatokangaʻi kae maʻu kinautolu ʻe he mālohi ʻo e peaú, pea ʻikai ke nau hao mei he ʻaú kae ʻave atu ai pē kinautolu ki tahi.
ʻOku ʻomi ʻe he tafaʻaki fakatuʻutāmaki ʻo e Mapu ʻa Vaeá ha fakatokanga fakalaumālie fekauʻaki mo e mālohi ʻo e ʻahiʻahí—tautautefito ki he angamaʻa fakasekisualé. ʻOku fakaʻofoʻofa ʻa e mālohi ke fakatupu ha moʻuí ʻi he taimi ʻoku tau tauhi ai ki he ngaahi fakangatangata totonú, ka kapau te tau tuku ke fakataueleʻi kitautolu ʻe he ʻahiʻahi ke tau mavahe mei he feituʻu malú, te tau ʻauhia.
Ko e Mahino hono ʻUhinga ʻOku Mahuʻinga Ai ʻa e Angamaʻá
Naʻe lava pē ke mamata ʻa Saane ki he fiefia ʻa hono tokouá ʻi he ʻaho naʻe mali ai ʻi he Temipale Nukuʻalofa Tongá. ʻOku pehē ʻe Saane, “Naʻá ne ʻai au ke u fie moʻui taau ke ʻi ai ha ʻaho te u mali ʻi ai.”
Neongo ia, ʻe feinga ʻa Sētane ke taʻofi haʻane hoko ki ha taha pē ʻiate kitautolu. Kuó ne ʻosi fakalotoʻi ʻe ia ha tokolahi ʻoku tali lelei pē ʻa e feohi fafale fakasekisualé pea ʻoku ʻikai hano nunuʻa ʻoʻona. Ka ko ha angahala mamafa ʻa hono ngāue hala ʻaki ʻa e mālohi kuo foaki mai ʻe he ʻOtuá ke fakatupu ai ha moʻuí, pea ʻe lava ke fakatuʻutāmaki fakalaumālie, fakaeloto, mo fakaesino ia.1
ʻOku pehē ʻe Saane, “ʻOku feinga mālohi ʻa Sētane ke ne taʻofi kitautolu mei haʻatau toe foki ki ʻapi ki heʻetau Tamai Hēvaní. Kapau he ʻikai ke u tokanga ke tauhi ʻa e fono ʻo e angamaʻá, ʻe ala mole meiate au ʻa e faingamālie ke u mali ʻi he temipalé.”
Fakaʻapaʻapaʻi e Ngaahi ʻĀ Maluʻi ʻa e ʻOtuá
Kuo hanga ʻe he puleʻanga ʻo Tongá ʻo fokotuʻu ha ngaahi ʻā pamu maluʻi ʻi he ngaahi feituʻu pau ke tokoni ki he kau ʻaʻahí ke nau malu pē lolotonga ʻenau mamata he fakaʻofoʻofa ʻo e Mapu ʻa Vaeá.
ʻOku tui ʻa Saane kuo tuku mai ʻe he Tamai Hēvaní ha ngaahi ʻā pamu maluʻi—pe ngaahi tuʻunga moʻui—ke maluʻi kitautolu mei haʻatau tō ki he ʻahiʻahí. Kuo ʻosi fokotuʻu ʻe he kau taki ʻo e Siasí, ngaahi folofolá, mo e Ki Hono Fakamālohia ʻo e Toʻu Tupú ha ngaahi fakangatangata mahino, pea te tau malu ʻo kapau te tau talangofua ki ai. Kae mahuʻinga tahá, ka tau muimui ʻi he ngaahi ueʻi ʻa e Laumālie Māʻoniʻoní, te tau malu ai.
ʻOkú ne pehē, “ʻOku ʻikai tokanga ha kakai ʻe niʻihi ki he ngaahi ʻā maluʻi ʻa e ʻEikí. ʻOku ʻikai mahino kiate kinautolu ʻa e ngaahi nunuʻá, pe ʻoku nau pehē te nau lava pē ʻo fakaʻehiʻehi mei ai. ʻI heʻete puna mei he lilifá, ʻokú te ongoʻi ʻoku hangē pē ʻokú te puna he ʻataá, ka kuo pau pē ke te iku tō ki he kelekelé.”
Ko ʻEtau Fokotuʻu ʻEtau Ngaahi ʻĀ Maluʻi pē ʻAtautolu
ʻI heʻene fekauʻaki mo e maʻa fakasekisualé, kapau te tau fie ʻilo pe ko e hā hono mamaʻo ʻetau lava ke fakalaka atu ʻi he ʻā maluʻí, kuo pau pē ke tau tō. Ko ʻetau fakangofua ko ē ke tau ofi ange ki he feohi fafale fakasekisuale ʻoku ʻikai totonú, ko e faingataʻa ange ai pē ia ke tau matuʻuaki ʻene fakatauelé.
Koeʻuhí ʻoku ʻikai ke lava ʻe he Siasí ʻo tala mai ʻa e meʻa ke tau fai ʻi he tūkunga kotoa pē, kuo hanga ai ʻe Saane ʻo faʻu ʻene ʻā maluʻi pē ʻaʻana ʻaki ʻene tomuʻa fakakaukauʻi e founga hono fakaʻaongaʻi ʻo e ngaahi tuʻunga moʻui ʻo e ongoongoleleí ki ha ngaahi tūkunga ʻe ala fehangahangai mo ia.
Kuó ne ʻosi faʻu ha pousitā ʻoku hiki ai ha palōmesi ʻe hiva kiate ia pē pea ki heʻene Tamai Hēvaní ke hoko ko ʻene ʻā maluʻi fakatāutaha, kau ai ʻa e faʻahinga kakai ʻe teiti mo iá, vala te ne tuí, mo e lea te ne fakaʻaongaʻí. ʻE lava pē ke kau ʻi ha ngaahi ʻā maluʻi kehe ʻa e fili ko ia ke fakaʻehiʻehi mei he sio, lau, pe fanongo ki ha faʻahinga meʻa te ne fakatupu ha ngaahi ongo fakasekisualé.2
ʻOku pehē ʻe Saane, “ʻE maluʻi au ʻi haʻaku fokotuʻu ke māʻolunga ʻeku ngaahi tuʻunga moʻuí.”
Foki ki he Feituʻu Malú
ʻOku tuʻu ʻa kinautolu ʻoku tukulolo ki he ʻahiʻahí ʻi ha feituʻu fakatuʻutāmaki, ʻo hangē pē ko kinautolu ʻoku tafia ʻi he ʻau ʻo e tahí ʻi he Mapu ʻa Vaeá. ʻE lava pē ke faingataʻa ha hao mei he mālohi hono maʻu kita ʻe he angahala fakasekisualé—ka ʻe malava ia ʻi he tokoni ʻa e Fakamoʻuí mo ʻEne kau tamaioʻeikí.
ʻI hono fakaʻosingá, tatau ai pē pe naʻe ʻikai mavahe ha taha mei he feituʻu malú pe kuó ne foki mai ki ai ʻi he hala faingataʻá, ko e taumuʻá ke nofo maʻu ai. ʻE hanga ʻe heʻetau fakaʻapaʻapaʻi e ngaahi ʻā maluʻi ʻa e ʻEikí mo e mahino kiate kitautolu e founga ke fakaʻaongaʻi ʻaki kinautolu ki hotau ngaahi tūkunga fakatāutahá ʻo teuteuʻi kitautolu ke tau fiefia ʻi he mālohi fakaʻofoʻofa kuo foaki ʻe he ʻOtuá kiate kitautolú—ʻi he taimi totonú pea ʻi he founga totonú.
ʻOku pehē ʻe Saane, “Ko e meʻa tēpuú ʻa ʻeku hanganaki atu ke u mali ʻi he temipalé. ʻOku ou ʻiloʻi kapau te u tauhi e ngaahi fekaú, kau ai ʻa e fono ʻo e angamaʻá, te u moʻui feʻunga ke maʻu ʻa e ngaahi tāpuaki ʻoku ou fakaʻānaua ki aí.”
ʻOku fakafiefiaʻi ʻe Saane (toʻomataʻú) mo ʻAmelia (lotomālie) mo hona tokoua ko Manatú ʻa e ʻaho naʻe mali ai he temipalé.
Ngaahi faitā ʻa Adam C. Olson