Ko ʻEtau Tamai ʻi Hēvaní

ʻOku tau ako ki he Tamai Hēvaní mei he kamataʻanga pē ʻo e meʻa ʻoku tau aʻusia ʻi he Siasí—mei heʻetau fuofua lotú ki he fuofua taimi ne tau hivaʻi ai ʻa e “Fānau Au ʻa e ʻOtuá” (Ngaahi Himi, fika 193). ʻOku makehe e meʻa ʻoku ʻilo ʻe he Kāingalotú ʻo kau ki he ʻOtua ko e Tamaí, pea ko e faikehekehe mātuʻaki mahuʻinga ia.

Ko e Mamata ki he Tamaí

Ko ha fakamatala ʻeni ʻe tolu ʻi he folofolá ki ha kakai kuo nau mamata ki he Tamaí:

• Sitīveni (vakai, Ngāue 7:56)

• Siosefa Sāmita (vakai, Siosefa Sāmita—Hisitōlia 1:17)

• Siosefa Sāmita mo Sitenei Likitoni (vakai, T&F 76:20)

Kae hangē ko e folofola ʻa Sīsuú, “ko ia kuó ne mamata kiate aú, kuo mamata ia ki he Tamaí” (Sione 14:9).

Moʻoni mo Fakafoʻituitui

“Ko e taha ʻo e ngaahi tokāteline fakalūkufua maʻongoʻonga ʻo e Siasí ni ko ʻetau tui ko ia ki he ʻOtua ko e Tamai Taʻengatá. Ko ha Tokotaha moʻui, moʻoni, mo fakafoʻituitui Ia. Ko e Pule aoniu Ia ʻo e ʻunivēsí, ka ko ʻetau Tamaí Ia, pea ko ʻEne fānau kitautolu.

“ʻOku tau lotu kiate Ia, pea ko e ngaahi lotu ko iá ko e fetalanoaʻaki ia ʻi he vahaʻa ʻo e ʻOtuá mo e tangatá. ʻOku ou tui fakapapau ʻokú Ne fanongo mai mo tali ʻetau ngaahi lotú.”

Palesiteni Gordon B. Hinckley (1910–2008), “Ko e Ngaahi Meʻa ʻOku Ou ʻIló,” Liahona mo e Ensign, Mē 2007, 83.

Ko e ʻOtua Moʻoni ʻe Tahá

“Ko e Tamaí ko e ʻOtua moʻoni ia ʻe tahá. ʻOku pau ʻa e meʻa ko ʻení: he ʻikai ha taha ʻe teitei māʻolunga hake ʻiate Ia; he ʻikai ha taha te ne teitei fetongi Ia. … Ko ʻElohimi Ia, ko e Tamaí. Ko e ʻOtuá Ia. ʻOku taha pē ʻa e Tamaí.”

Palesiteni Boyd K. Packer, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “The Pattern of Our Parentage,” Ensign, Nov. 1984, 69.

Ko e Fanongo ki he Tamaí

ʻI he taimi ʻoku folofola ai ʻa e ʻOtua ko e Tamaí, ʻokú Ne fakamoʻoni ki Hono ʻAlo ʻOfaʻangá, ko Sīsū Kalaisi. Hangē ko ʻení:

• ʻI he papitaiso ʻo Sīsuú (vakai, Mātiu 3:17)

• Kia Pita, Sēmisi, mo Sione ʻi he Moʻunga ʻo e Liliú (vakai, Mātiu 17:5)

• ʻI ha fakahā kia Nīfai (vakai, 2 Nīfai 31:11, 15)

• ʻI he hā ʻa Sīsū ʻi he ongo ʻAmeliká (vakai, 3 Nīfai 11:7)

• ʻI he ʻUluaki Mata-Meʻa-Hā-Maí (vakai, Siosefa Sāmita—Hisitōlia 1:17)

Ko e Misiona ʻo e Fakamoʻuí ke Fakahā ʻa e Tamaí

“Ko e ngaahi meʻa kotoa pē naʻe hāʻele mai ʻa Sīsū ke Ne lea ʻaki mo fakahokó, … ko ʻEne [fakahaaʻi mai kiate kitautolu ko hai pea ko e tokotaha fēfē ʻa e] ʻOtua ko ʻetau Tamai Taʻengatá, pea mo ʻEne tokanga kakato mai ki Heʻene fānaú ʻi he kuonga mo e puleʻanga kotoa pē. Naʻe feinga ʻa Sīsū ke fakahā mai [ʻi he lea mo e ngāue] pea ʻai ke tau ʻilo fakafoʻituitui ʻa e anga totonu ʻo ʻEne Tamaí, ʻa ia ko ʻetau Tamai ʻoku ʻi he Langí.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Ngeia ʻo e ʻOtuá,” Liahona mo e Ensign, Nōv. 2003, 70.

Mātuʻa Fakalangi: Ko ha Moʻoni ʻOku Mālohi

“Fakakaukau ki he mālohi ʻo e foʻi fakakaukau ʻoku akoʻi mai ʻi heʻetau foʻi hiva ʻoku tau manako ai ʻKo e Fānau Au ʻa e ʻOtuá’ (Ngaahi Himi, 1985, fika 193). … Ko e tali ʻeni ki he taha ʻo e ngaahi fehuʻi maʻongoʻonga ʻo e moʻuí, ʻKo hai au?’ Ko e fānau au ʻa e ʻOtuá pea ʻoku ʻi ai ʻeku fehokotaki fakalaumālie mo ha mātuʻa fakalangi. ʻOku fakamatalaʻi ʻe he hohoko fakaemātuʻa ko iá e malava ke tau aʻusia ʻa e taʻengatá. ʻOku taʻofi ʻe he fakakaukau mālohi ko iá ʻa e mafasia ʻo e lotó. Te ne lava ʻo fakamālohia kitautolu takitaha ke tau fai ʻa e ngaahi fili ʻoku māʻoniʻoní pea fekumi ki he lelei taha ʻoku ʻiate kitautolú.”

ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, “Powerful Ideas,” Ensign, Nov. 1995, 25.

ʻOku Akonaki ʻa Siosefa Sāmita ʻo kau ki he ʻOtua ko e Tamaí

Naʻe akoʻi ʻe Siosefa Sāmita ha meʻa lahi kiate kitautolu ʻo kau ki he natula totonu ʻo e ʻOtuá koeʻuhí he naʻá ne mamata ki he Tamai Hēvaní mo Sīsū Kalaisi pea maʻu mo ha ngaahi fakahā lahi.

Ko ha tokotaha fēfē Ia? “Naʻe ʻi he tuʻunga ʻoku tau ʻi ai he taimi ní ʻa e ʻOtuá ʻi ha taimi ʻe taha, ka kuo hoko ia ko ha tangata kuo hakeakiʻi, pea ʻokú ne ʻafio kuo fakakalauni ʻi he langí!”¹

ʻOkú Ne fōtunga fēfē? “ʻOku maʻu ʻe he Tamaí ʻa e sino ʻo e kakano mo e hui ʻoku ongoʻingofua tatau mo e sino ʻo e tangatá.”² “Kapau te mou mamata kiate Ia he ʻahó ni, te mou mamata kiate Ia ʻokú Ne fōtunga tatau mo e tangatá—ʻo hangē ko kimoutolú.”³

Ko e hā ʻetau fetuʻutaki ki he ʻOtuá? “Kapau he ʻikai mahino ki he tangatá ʻa e ʻulungāanga ʻo e ʻOtuá, ta ʻoku ʻikai ke nau ʻiloʻi ʻa kinautolu.”⁴ “ʻOku ʻafio ʻa e Mātuʻa Maʻongoʻonga ia ʻo e ʻunivēsí ki he kotoa ʻo e fāmili ʻo e tangatá … ko ʻEne fānau.”⁵

Ko e hā naʻá Ne fokotuʻu ai e palani ʻo e fakamoʻuí maʻatautolú? “Naʻa mo e ʻOtuá, ʻi Heʻene ʻafioʻi ʻa ʻEne ʻi he lotolotonga ʻo e ngaahi laumālié mo e nāunaú, … [ke fokotuʻu] ha ngaahi fono ke faingamālie ai hono toé ke nau fakalakalaka ʻo hangē ko iá.”⁶

Ko e hā ʻa e kī ki he ʻunuʻunu ofi ange ki he ʻOtuá? “Ko e taimi ʻoku mahino ai ʻa e ʻulungāanga ʻo e ʻOtuá, ʻoku tau ʻilo leva ʻa e founga ke tau fakataufolofola ai kiate Iá, ʻokú Ne kamata leva ke fakaava ʻa e langí kiate kitautolu.”⁷

Maʻuʻanga Fakamatalá

1. Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 47.

2. Tokāteline mo e Ngaahi Fuakava 130:22.

3. Ngaahi Akonaki: Siosefa Sāmita, 48.

4. Ngaahi Akonaki: Siosefa Sāmita, 46.

5. Ngaahi Akonaki: Siosefa Sāmita, 45.

6. Ngaahi Akonaki: Siosefa Sāmita, 241.

7. Ngaahi Akonaki: Siosefa Sāmita, 48.

Ko e ʻUluaki Mata-Meʻa-Hā-Maí, tā ʻe Gary L. Kapp