Ko ʻEtau Tafaʻakí
Founga ke Maʻu Ai ha Ngaahi Fakakaukau ʻOku Maʻá
Naʻe pehē ʻe Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ko kinautolu ʻoku nau lava ʻo mapuleʻi ʻenau ngaahi fakakaukaú kuo nau ikunaʻi pē kinautolu.1 Ko e taha ʻo e ngaahi founga ke mapuleʻi ʻaki hoʻo ngaahi fakakaukaú ko hono fili ʻa e himi ʻokú ke manako taha aí pea ʻi ai haʻo fakatātā ʻo e temipalé. Fakaʻaliʻali e fakatātaá ʻi ho lokimohé. ʻI he taimi kotoa pē ʻokú ke sio ai ki ha taha ʻoku teunga taʻetaau, toe vakai fakalelei ki he himí ʻi ho ʻatamaí peá ke fakakaukau ki he temipalé. Kapau ʻe ʻikai mavahe ʻa e ngaahi fakakaukau taʻefeʻungá mei ho ʻatamaí, lotu mo ʻaukai ke ke fakangaloʻi kinautolu.
Siosefa D., taʻu 20, Haiti
ʻOua ʻe Mole ʻa e ʻAmanakí
Ko e taha ʻo e ngaahi ʻahiʻahi ne kātekina ʻe homau fāmilí ko e taimi ko ia ne puke ai hoku tuongaʻane lahi tahá, pea taimi siʻi pē kuó ne siʻi mālōlō. Ne faingataʻa moʻoni kiate kimautolu ʻi he kamataʻangá, ka ne malava pē ʻe homau fāmilí ke ikunaʻi e ʻahiʻahi ko iá. Naʻe ʻosi sila foki homau fāmilí he temipalé, ko ia ne mau ʻiloʻi te mau toe fakataha mo hoku tuongaʻané pea mo e Tamai Hēvaní mo Sīsū Kalaisí ʻo ka hokosia e taimi totonú.
ʻOku ou ʻiloʻi ko e ʻahiʻahí ni ko e taha ia e ngaahi founga kuo teuteuʻi ʻaki kimautolu ʻe he ʻEikí ki ha ngaahi ʻahiʻahi kehe—ke tokoniʻi kimautolu ke mau mālohi ange. ʻOku ʻi ai e ngaahi ʻahiʻahi ki he tokotaha kotoa pē ke ne kātekina, pea ʻoku ʻafioʻi ʻe heʻetau Tamai Hēvaní te tau lavaʻi kinautolu. Ko ia ʻoku totonu ke ʻoua naʻa mole ʻetau ʻamanakí.
Kamila R., taʻu 18, Takaloka Saute, Filipaini
Fuʻu Lahi e Ngaahi Laó?
ʻI he taʻu kuo mahili atú ne u pehē ʻoku fuʻu lahi fau e ngaahi lao ʻi he Siasí, peá u fakakaukau ai, “ʻE lava fēfē ke fakafiefia haʻate ʻi hēvani?” Ne u ongoʻi ʻe au kuó u pōpula ki he Siasí pea naʻe ʻikai ke u lava ʻo tauʻatāina mei ai.
Ne u vakavakaiʻi leva e moʻui ʻa hoku ngaahi kaungāmeʻá. Ko e hā nai ne ʻikai hoko mai ai kiate au ʻa e ngaahi ʻahiʻahi ne nau fouá? Ne tau ʻeku fakakaukaú ʻi he pō ʻe taha—naʻe ʻikai ke hoko kiate au ʻa e ngaahi palopalema ne nau moʻua aí he naʻá ku muimui ʻi he ngaahi lao naʻe fokotuʻu ʻe he Tamai Hēvaní maʻakú. Ne u toe fakakaukau atu leva kapau te ke muimui ʻi he ngaahi laó, ʻe lava ke ke fiefia pea ʻohake hao fāmili pea nofo fakataha mo e Tamai Hēvani mo Sīsū ʻo aʻu ki ʻitāniti.
Sitefanī H., taʻu 13, ʻIutā, USA
“Fanga pea … ʻio. Fanga puaka … ʻio. Fanga pokiupaini …”
Tā fakatātaaʻi ʻe Val Chadwick Bagley
Tā ʻo e Temipale Sōlekí naʻe fai ʻe Craig Dimond