Aoaoina o Ni Mea Se Tele Mai le Konafesi Aoao

Saunia e Michael Barber ma David Marsh

Matagaluega o Mataupu Aoaoina

E ui ina tatou fai atu “amene” i le faaiuga o le sauniga mulimuli o le konafesi aoao, e le faapea ai e uma ai iina le fafagaga faaleagaga. E mafai ona faaauau pea a o tatou suesue ma faaaoga aoaoga mai lena konafesi. I le aluga o tausaga, sa uunaia lava i tatou e perofeta e fai le mea tonu lava lena. Mo se faataitaiga, i le 1946, sa uunaia ai e Peresitene Harold B. Lee (1899–1973) le au paia ina ia avea saunoaga o le konafesi “e taitaia a latou faatinoga ma faamatalaga i le aluga o le isi ono masina e sosoo ai.” Sa ia faamalamalama mai, “O mea taua nei ua silafia e le Alii e tatau ona faaali mai i lona nuu i lenei vaitaimi.”¹

I le 1988, sa ta’ua ai foi e Peresitene Ezra Taft Benson (1899–1994) lena fautuaga ina ua ia aoao mai, “I masina e ono o le a sosoo ai nei, e tatau ona tuu faatasi lau kopi o le Liahona ma au tusi faavae o le Ekalesia, ma faitau soo i ai.”²

I le tapunia ai o le konafesi aoao o Oketopa 2008, sa toe faamautuina mai ai e Peresitene Thomas S. Monson le taua o le suesueina o saunoaga o le konafesi. Na saunoa o ia: “Ia tatou saga manatua pea mea sa tatou faafofoga ma faalogologo i ai i lenei konafesi aoao. O savali sa tuuina mai, o le a lolomiina i mekasini o le Ensign ma le Liahona i le masina a sau. Ou te fautuaina outou ina ia suesue i ai ma mafaufau loloto i a latou aoaoga.”³

A o e suesue ma mafaufau loloto i savali o le konafesi, o le a se mea e mafai ona e faia ina ia anoa atili ai ia savali i lo’u olaga? O nisi nei o fautuaga e fesoasoani e te sauniuni ai mo le, mauaina, ma le faatinoina o saunoaga musuia:

Sauni e maua musumusuga. Pe e te matamata, faalogologo, pe faitau foi i saunoaga o le konafesi, e tatau ona matala lou loto ma lou mafaufau i musumusuga faalelagi. Na aoao mai Elder David A. Bednar o le Korama a Aposetolo e Toasefululua e faapea, e tusa lava pe o le a le mataina o le aoao mai a se failauga, “seiloga lava e faataga e le tagata le aano o se savali ma le molimau a le Agaga Paia e ulufale atu ia te ia, ona faatoa tuia ai lea o lona loto.” Sa ia faamalamalama mai o le mauaina o musumusuga “e manaomia ai taumafaiga malosi faaleagaga, faalemafaufau, ma faaletino ae le o le faalogologo toa’i.”⁴

O manatu nei e mafai ona fesoasoani ia te oe ina ia saunia e aoaoina e le Agaga:

Faataatia ese se taimi ma ia fai se siosiomaga e le faalavelaveina e mafai ona e maua ai musumusuga faaleagaga.
Saili le taitaiga faalelagi e ala i le tatalo.
Lisi ni fesili po o ni atugaluga patino o loo e sailia ni tali.

Malamalama i savali. O perofeta ma aposetolo soifua e aoao mai, faamalamalama mai, lapatai mai, ma molimau mai. O le ua’i atu ma le totoa i a latou saunoaga o le a fesoasoani e te malamalama atoatoa ai i a latou savali. O nisi nei o metotia aoga mo suesuega:

Fai fesili. Mo se faataitaiga: O le a se mea ua finagalo le Alii ia ou aoaoina mai i lenei savali? E faapefea ona faaleleia e lenei saunoaga lo’u malamalama i se mataupu faavae o le talalelei po o se fuaiupu o le mau? O a ni tala o faaaoga e faamalamalama ai mataupu faavae o le talalelei, ma o le a se mea ua ou aoao mai ai?
Tusi se auivi. Faalogo totoa pe o le a le auivi o le lauga. Vaevae le lauga i vaega ma tusi se otootoga e faamatala ai le manatu autu na tautalagia i vaega taitasi.
Ia iloa elemene eseese o le lauga. Ia tusitusi faamatalaga o mea e pei o aoaoga faavae, mau, tala, lapataiga, lisi, molimau, valaaulia e faatino, ma faamanuiaga folafolaina mo le usitaia o fautuaga.
Sili atu ma le faatasi ona suesue le lauga. E manaomia ona suesueina upumoni o le talalelei ia sili atu ma le faatasi ina ia maua ai o latou aano ma taua atoatoa. O taimi uma e te suesue ai, ia tusi ni faamatalaga o vaaiga manino fou e te maua.

Faatino mea ua e aoaoina. Afai e te suesue ma le agaga tatalo i lauga, o le a e iloa ai le auala e faaaoga ai savali i lou olaga. E mafai ona e iloa le ala e fai ai suiga anoa e ala i le fai o fesili e pei o le, O le a le mea e finagalo le Alii ou te faia i mea ua ou aoaoina? ma le O le a se mea ua ou aoaoina o le a fesoasoani ia te a’u i lo’u aiga, galuega, po o le valaauga i le Ekalesia? Tusi i lalo manatu ina ia le galo ia te oe. A o e faia faapea, o le a musuia oe e ola i aoaoga ma o le a e maua faamanuiaga folafolaina.

O le konafesi aoao o le taimi lea e faaali mai ai e le Alii ia Lona finagalo ia te oe e ala mai i Ana auauna. Na aoao mai Peresitene Spencer W. Kimball (1895-1985) e faatatau i lauga o konafesi, “E leai se anotusi po o se lomiga e i tua atu o tusitusiga faavae o le Ekalesia e tatau ona i ai se nofoaga faapitoa i luga o lau fata tusi patino—e le ona o le susua o faaupuga po o le mataina o le kilivaina mai, ae ona o aoaoga o loo faapea ona faasino mai ai le ala i le ola e faavavau.”⁵