Taimi o le Talanoaga
“O le a ou ava i o’u matua ma fai la’u vaega e faamalosi ai lo’u aiga” (O Ou Tulaga Faatonuina Faaletalalelei).
Ua lelei, tagata uma. O le taimi mo le talanoaga,” o le valaau lea a Tina.
Na alu le aso atoa o tulimatai atu Sose i le taimi o le talanoaga. O afiafi uma lava, e faapotopoto ai Sose, ma ona tuagane laiti o Peni ma Uesi, i le potu malolo faatasi ma Tina ma Tama e talanoa i mea o loo tutupu i o latou olaga.
O nanei lea sa fai mai Tama o le a fesoasoani ai ia Sose i le faitauga o ana faamatalaga mo faaaliga i le taeao. O le faitauina o faaaliga i le taeao o se avanoa faapitoa lea i le aoga a Sose. O taeao o le a tata ai e Sose se vaega itiiti o le pese e sili ona fiafia i ai i luga o sipika a le aoga ma faaaoga le mea faaleoteleleo e faasilasila atu ai gaoioiga ma le meaai o le aso.
Sa momoe atu Sose i le potu malolo, ma le fiafia e faataitai ana faamatalaga.
“A le tatou teine faasalalau lauiloa lale!” o le tala lea e Tama ina ua oso atu Sose i luga o le nofoa i ona autafa. “O le a sou lagona e uiga i le aso a taeao?”
“O lea ou te fiafia ae fai foi si ou popole laitiiti. Ou te fefe ina ne’i i ai sa’u mea sese i luma o le aoga atoa,” o le tala lea a Sose.
“O le mafuaaga lena tatou te faataitai ai,” o le tala lea a Tama. “Ia faitau loa au faamatalaga, ae o le a ou faalogologo mo ni vaega e mafai ona e faaleleia atili.”
“Faafetai, Tama,” o le tala lea a Sose.
Sa la iloiloina ma Tama ia faamatalaga i le tele o taimi o lea na le maitau ai e Sose pe ua faafia. Ona tu lea i luga o Sose ma faatino ana faamatalaga mo le taimi mulimuli mo lona aiga. Sa alalaga fiafia Tina ma Tama. Sa faafetaui maualuga o la alofilima ma Peni, ae o Uesi sa ataata ma patipatia ona lima.
Sa alu Sose e moe ma le fiafia ma le to’a.
O le aso sa sosoo ai, sa sologa lelei lava mea uma. E ui lava sa popole o ia, ae sa ataata Sose ina ua ia faalogoina le tata mai o lana musika i sipika a le aoga. Sa fiafia ona sa ia faataitaia ana faamatalaga ma lona Tama, ma sa ia faitauina faagesegese ma manino e aunoa ma se sese.
“Matuai matagafie lava lau faatinoga,” o le tala lea a Mrs. Blake, le puleaoga fesoasoani.
Ina ua tuua le aoga, sa tu Sose i le laina mo le pasi. Sa faliu ane se tamaitiiti matua atu ma fesili, “O oe lea na faitauina ia faasilasilaga ananei?”
Sa ataata Sose. “I,” o lana tala lea.
“Aisea na e filifilia ai lena pese?” o le fesili lea a le tamaitiiti. “O se pese mataga. Ua e matuai faaleagaina lava faasilasilaga o le taeao.” Ona ia lafo atu lea o se upu faalealofa ia te ia ma talie ma ana uo.
Sa saofai toatasi Sose i le pito i luma o le pasi. Sa ia lagona le faafaufau.
Ina ua oo atu Sose i le fale, sa tau atu o taaalo Tina ma Uesi.
“Tina, ou te iloa e le’i oo i le taimi o le talanoaga, ae sa ou mafaufau pe mafai pea ona ta talanoa i le taimi lenei,” o le tala lea a Sose.
“Ua lelei, Sose,” na fai atu ai Tina. “O le a le mea na tupu?” Na i ai se mea sa faaletonu i faasilasilaga o le taeao?”
“Leai,” o le tala lea a Sose. “Sa lelei lava mea uma. Ia o lo’u manatu lena, seia oo ina fai mai se tamaitiiti ia te a’u sa ou filifilia se pese mataga. Sa tago foi lafo mai se upu faalealofa lava ia te a’u.”
Sa pōpō e Tina le fola i ona autafa. Sa savali atu Sose ma saofai ai. Sa tago atu Tina ma opo mai o ia. Sa talanoa Sose ma Tina e uiga i mea uma sa tutupu i lena aso, e aofia ai le tala faamālō a Mrs. Blake.
“Faamalie atu ona o le le mafaufau o lena tamaitiiti ma ana uo ia te oe,” na fai atu ai Tina. “Ae e foliga mai o isi tagata e te faaaloalogia, e pei o Mrs. Blake, sa matuai fiafia i lou faitauga o faasilasilaga. Ma te matuai mitamita lava ma Tama ia te oe. Sa e galue malosi, ma ua tauia lava!”
Sa toe opo e Sose ia Tina. “Faafetai, Tina,” o le tala lea a Sose. “Ua lelei mai o’u faalogona.” Sa fiafia Sose ona o soo se taimi lava e mafai ona avea ma taimi e talanoa ai.
Ata na tusia e Jared Beckstrand